”நான் குஜராத் முதல்வராக இருந்தபோது” ரத்தன் டாடாவுடனான நினைவை பகிர்ந்த பிரதமர் மோடி..

ரத்தன் டாடா மறைவுக்கு குடியரசுத் தலைவர் திரவுபதி முர்மு, பிரதமர் நரேந்திர மோடி உள்ளிட்டோர்  இரங்கல் தெரிவித்துள்ளனர்.

ரத்தன் டாடா மருத்துவமனையில் அனுமதிக்கப்பட்டுள்ளதாகவும், தீவிர சிகிச்சை பிரிவில் இருக்கும் அவரின் உடல் நிலை கவலைக்கிடமாக உள்ளதாகவும் நேற்று தகவல் வெளியானது. இந்நிலையில் நேற்று இரவு சிகிச்சை பலனின்றி ரத்தன் டாடா உயிரிழந்ததாக அறிவிக்கப்பட்டது. இந்நிலையில், தொழிலதிபர் ரத்தன் டாடா மறைவுக்கு பிரதமர் மோடி மற்றும் குடியரசு தலைவர் திரௌபதி முர்மு இரங்கல் தெரிவித்துள்ளனர்.

குடியரசுத் தலைவர் திரௌபதி முர்மு வெளியிட்டுள்ள இரங்கல் செய்தியில், ரத்தன் டாடாவின் மறைவால், கார்ப்பரேட் வளர்ச்சியின் மூலம் தேசத்தைக் கட்டியெழுப்பிய, நெறிமுறைகளுடன் சிறந்து விளங்கிய ஒரு ஆளுமையை இந்தியா இழந்துவிட்டதாக குறிப்பிட்டுள்ளார். பத்ம விபூஷன் மற்றும் பத்ம பூஷன் விருதுகளைப் பெற்ற அவர், டாடாவின் பெருமையை உலகளாவிய அளவிற்கு கொண்டு சென்றார் என்றும் தெரிவித்துள்ளார்.

ரத்தன் டாடா அனுபவமிக்க தொழில் வல்லுநர்கள் மற்றும் இளம் மாணவர்களை ஊக்கப்படுத்தினார் என்றும், தொண்டு மற்றும் சேவை ஆகியவற்றில் அவரது பங்களிப்பு விலைமதிப்பற்றது என்றும் கூறியுள்ளார். அவரது குடும்பத்தினருக்கும், டாடா குழுமத்தின் ஒட்டுமொத்த குழுவினருக்கும், அவர் மீது பெருமதிப்பு கொண்டவர்களுக்கும் தனது இரங்கலை தெரிவித்துக் கொள்வதாகவும் திரௌபதி முர்மு தெரிவித்துள்ளார்.

பிரதமர் மோடி வெளியிட்டுள்ள இரங்கல் செய்தியில், ரத்தன் டாடாவுடன் தான் மேற்கொண்ட எண்ணற்ற சந்திப்புகள் என் மனதில் நிறைந்திருக்கின்றன என தெரிவித்துள்ளார்.

முதலமைச்சராக இருந்தபோது குஜராத்தில் அவரை அடிக்கடி சந்தித்து, பல்வேறு விவகாரங்களில் கருத்துகளை பரிமாறிக்கொள்வோம் என்றும், அவருடைய சிந்தனைகள் மிகவும் செழுமையாக இருந்ததைக் கண்டேன் எனவும் கூறியுள்ளார். 

மேலும் படிக்க: ”பிரம்மாண்டத்தை இழந்தது இந்தியா..” டாடா மறைவுக்கு முதல்வர் இரங்கல் 

அவரது மறைவு மிகுந்த வேதனை அளிக்கிறது என்றும், ஓம் சாந்தி எனவும் பிரதமர் மோடி குறிப்பிட்டுள்ளார்.