இந்தி மொழி படித்தால் கட்டிட வேலைகளை தான் செய்ய வேண்டும்- எ.வ‌.வேலு விமர்சனம்

திருவண்ணாமலை மாநகர திராவிட முன்னேற்ற கழகம் சார்பில் முதலமைச்சர் மு.க.ஸ்டாலின் 72-வது பிறந்த தினத்தையொட்டி மாபெரும் பொதுக்கூட்டம் மற்றும் நலத்திட்ட உதவிகள் வழங்கும் விழா நடைபெற்றது. இந்நிகழ்ச்சியில் பொதுப்பணித்துறை மற்றும் நெடுஞ்சாலைகள் துறை அமைச்சர் எ.வ‌.வேலு பொதுக்கூட்டத்தில் கலந்துகொண்டு சிறப்புரையாற்றி பொதுமக்களுக்கு நலத்திட்ட உதவிகளை வழங்கினார்.

நிகழ்ச்சியில் அமைச்சர் எ.வ.வேலு பேசியதாவது, “நம் நாட்டை 253 ஆண்டு காலம் ஆண்ட பிரிட்டிஷ்காரர்கள் (லண்டன்) நாங்கள் ஆண்டதுதான் தமிழ்நாடு என்றும் ஆனால் எங்கள் நாட்டை விட தமிழ்நாடு மிகுந்த வளர்ச்சி அடைந்த நாடாக தற்போது உள்ளது என்றும்  தமிழ்நாட்டில் செயல்பட்டு வரும் காலை உணவு திட்டத்தை அந்நாட்டு அரசு செயல்படுத்த உள்ளதாக கூறியுள்ளனர்.

பொறியியல் மற்றும் மருத்துவ படிப்புகளை ஆங்கிலத்தில் படித்தால் தான் ஜெர்மன், கனடா, மலேசியா, சிங்கப்பூர் போன்ற நாடுகளில் சென்று பணி செய்ய முடியும். திருவண்ணாமலை கிராமப் பகுதியில் உள்ள இளைஞர்கள் அனைவரும் ஆங்கில மொழிகளில் படித்ததன் காரணமாக தான் அமெரிக்கா, லண்டன், சிங்கப்பூர் உள்ளிட்ட நாடுகளில் பணி செய்து வருகின்றனர்.  

ஆகையால் தான் ஆங்கில மொழி இணைப்பு மொழியாக இருக்க வேண்டும் என்று இரு மொழி கொள்கையை கொண்டு வந்தவர் பேரறிஞர் அண்ணா. மேலும், கலைஞர் கருணாநிதி,   முதலமைச்சர் மு.க.ஸ்டாலின் உள்ளிட்டோர் அதனை தொடர்ந்து கடைபிடித்து வருகின்றனர். மத்திய அரசு தமிழ்நாட்டிற்கு தரக்கூடிய நிதியை தர மறுக்கிறது.

அதாவது, இந்தி  மொழியை படித்தால் தான் நிதி தரப்படும் என்றும் இல்லையென்றால் சமஸ்கிருதம் படித்தால் தான் நிதி வழங்கப்படும் என்றும் மத்திய அரசு கூறி வருகிறது. தமிழ்நாட்டில் இந்தி மொழியை திமுக எதிர்க்கவில்லை. அதனை பள்ளிகளில் கட்டாயப்படுத்துவதையும் திணிப்பதையும் தான் எதிர்க்கிறது” என்று தெரிவித்தார்.

அமெரிக்கா, ஜப்பான், ஜெர்மனி, ரஷ்யா உள்ளிட்ட நாடுகளில் சென்று இந்தி மொழியில் பேச முடியுமா என ஆவேசமாக பேசிய அவர், ஆங்கில மொழியை படிக்காமல் இந்தி மொழியை படிக்கும் மாநிலங்களான டெல்லி, உத்தரப் பிரதேசம், பீகார், ஹரியானா,  மத்தியப் பிரதேசம் உள்ளிட்ட மாநிலங்களில் இந்தி படித்த அனைவரும் தமிழ்நாட்டில் கட்டிட வேலை, பெயிண்ட் வேலை, தார் சாலை அமைக்கும் வேலை, டோல்கேட் உள்ளிட்ட வேலைகளை செய்து வருவதாகவும் தமிழ்நாட்டில் ஆங்கிலம் படித்த அனைவரும் வெளிநாடுகளில் சென்று வேலை செய்து வருவதாகவும் கூறினார்.

மேலும், இந்தி படித்தால் தான் தமிழ்நாட்டுக்கு தரக்கூடிய நிதி தரப்படும் என்று மத்திய அரசு தெரிவிக்கும் நிலையில் பத்தாயிரம் கோடி ரூபாய் நிதி கொடுத்தாலும் இந்தி மொழியை கற்க மாட்டோம் என்றும் அதே நேரத்தில் தமிழ் மொழியை மறக்க மாட்டோம் என்றும், அதற்கு ஒரு பிரச்சனை வரும்போது  தமிழோடு என்றும் நான் நிற்பேன் என்று முதலமைச்சர் கூறியதாகவும் அவர் தெரிவித்தார்.