சென்னை, ஆதம்பாக்கம், சிட்டி லிங்க் ரோடு, பிருந்தாவன் அடுக்குமாடி குடியிருப்பில் வசித்து வந்த வெங்கடேசன் (45) என்பவர் வழக்கறிஞர் மற்றும் ஒரு அரசியல் கட்சியின் வழக்கறிஞர் பிரிவில் பொறுப்பு வகித்து வந்துள்ளார். இந்த நிலையில், வெங்கடேசன் விருகம்பாக்கம், கணபதிராஜ் மெயின் ரோட்டில் உள்ள பால்ராஜ் அடுக்குமாடி குடியிருப்பில் உள்ள அவருக்கு தெரிந்த நபரான கார் ஓட்டுநர் கார்த்திக் என்பவரது வீட்டுக்கு அடிக்கடி வந்து செல்வது வழக்கம்.

வழக்கறிஞர் கொலை

கடந்த மார்ச் 30ம் தேதி விருகம்பாக்கம், பால்ராஜ் அடுக்குமாடி குடியிருப்பில் உள்ள பூட்டிய வீட்டிலிருந்து துர்நாற்றம் வீசுவதாக அங்கு வசிப்பவர்கள் கொடுத்த தகவலின்பேரில், R-5 விருகம்பாக்கம் காவல் நிலைய ஆய்வாளர் தலைமையிலான போலீசார் சம்பவ இடத்திற்கு சென்று மேற்படி வீட்டில் பார்த்தபோது, வெங்கடேசன் வெட்டுக் காயங்களுடன் அருகில் அரிவாளுடன் இறந்து கிடப்பது தெரியவந்தது. 

Read more: மக்களவையில் நிறைவேறியது வக்ஃபு வாரிய சட்டத்திருத்த மசோதா

போலீசார் இறந்துபோன வெங்கடேசனின் உடலை மீட்டு பிரேத பரிசோதனைக்காக அரசு மருததுவமனைக்கு அனுப்பி வைத்தனர். மேலும், இறந்துபோன வெங்கடேசனின் மனைவி கொடுத்த புகார் மீது R-5 விருகம்பாக்கம் காவல் நிலையத்தில் கொலை பிரிவில் வழக்குப்பதிவு செய்து விசாரணை மேற்கொள்ளப்பட்டது.

2 பேர் கைது

காவல் ஆய்வாளர் தலைமையிலான காவல் குழுவினர் தீவிர விசாரணை செய்து, இக்கொலை வழக்கில் தொடர்புடைய கார்த்திக் (32) மற்றும் ரவி (42) ஆகிய 2 நபர்களை நேற்று மதுரவாயல், பைபாஸ் அருகே கைது செய்தனர். அவர்களிடமிருந்து இறந்துபோன வெங்கடேசனின் கார் உட்பட எதிரிகளின் செல்போன் மற்றும் பல்சர் இருசக்கர வாகனம் பறிமுதல் செய்யப்பட்டது.

Read more: சென்னையில் பெய்த திடீர் மழை – ஜில்லென்று மாறிய வானிலை

விசாரணையில் மார்ச் 27ம் தேதி இரவு, இறந்துபோன வெங்கடேசன், கார்த்திக்கின் வீட்டிற்கு சென்று அங்கிருந்த கார்த்திக் மற்றும் ரவி ஆகியோரிடம் ஒரு வழக்கு தொடர்பாக பேசிக்கொண்டிருந்தபோது, வெங்கடேசனுக்கும், கார்த்திக்கும் வாக்குவாதம் ஏற்பட்டு, கார்த்திக் வீட்டிலிருந்த அரிவாளால் வெங்கடேசனை தாக்கி கொலை செய்துவிட்டு, கார்த்திக்கும், ரவியும் வெங்கடேசனின் காரை எடுத்துக் கொண்டு தப்பிச் சென்றது தெரியவந்தது.

சிறையில் அடைப்பு

மேலும் விசாரணையில் எதிரி கார்த்திக் நாங்குநேரி காவல் நிலைய சரித்திர பதிவேடு குற்றவாளி என்பதும், இவர் மீது சுமார் 10 கொலை முயற்சி வழக்குகள் உட்பட மொத்தம் சுமார் 27 குற்ற வழக்குகள் உள்ளது தெரியவந்தது.  கைது செய்யப்பட்ட இருவரும் விசாரணைக்குப் பின்னர் சைதாப்பேட்டை நீதிமன்றத்தில் ஆஜர்படுத்தினர். இருவரையும் வருகிற 16ஆம் தேதி வரை நீதிமன்ற காவலில் அடைக்க நீதிமன்றம் உத்தரவிட்டத்தை தொடர்ந்து, இருவரும் புழல் சிறையில் அடைக்கப்பட்டனர்.