கத்தி முனையில் வழக்கறிஞர் கடத்தல்.. முன்னாள் ரானுவ வீரர் உட்பட 4 பேர் கைது..

இராமநாதபுரம் மாவட்டம் அபிராமம் பகுதியை சேர்ந்த முன்னாள் ராணுவ வீரரான ராஜ்குமார் மற்றும் ராமநாதபுரம் மாவட்ட கமுதியை சேர்ந்த வழக்கறிஞரான செந்தில்வேல் ஆகிய இருவரும் உறவினர்கள். இந்நிலையில் வழக்கறிஞர் செந்தில்வேல் ராஜ்குமாரிடம் 5 லட்ச ரூபாய்க்கு மேல் கடனாக பெற்ற நிலையில் பணத்தை கொடுக்காமல் தாமதித்து வந்துள்ளார். 

இதனால் செந்தில்வேலை கடத்தி பணம் பெறுவதற்காகவும், பணம் தொடர்பாக பேச்சுவார்த்தை நடத்துவதற்கும் திட்டமிட்டுள்ளனர். பின்னர் நேற்று மதியம் மதுரை வந்த வழக்கறிஞர் செந்தில்வேலை அவரது உறவினரான முன்னாள் ராணுவ வீரர் ராஜ்குமார் தனது நண்பர்கள் மூலமாக நேற்று மதியம் காரை பின் தொடர்ந்து வந்துள்ளனர்.

பின்னர், மதுரை தல்லாகுளம் கருப்பணசுவாமி கோவில் அருகே வழக்கறிஞர் செந்தில்வேலின் காரை மடக்கிய ராஜ்குமார் காரில் ஏறியுள்ளார். பின்னர் கார் மாவட்ட ஆட்சியர் அலுவலகம் சாலை அருகே  சென்றபோது திடிரென ராஜ்குமார் கார் ஓட்டுனரை கத்தியை காட்டி மிரட்டி காரை நிறுத்துமாறு கூறியுள்ளார். 

அப்போது காரில் இருந்து வழக்கறிஞர் செந்தில்வேல் இறங்கி தப்ப முயன்றபோது ராஜ்குமாரின் நண்பர்கள் செந்தில்வேலை அடித்து இழுத்து காரில் ஏற்றி கடத்திசென்றுள்ளனர். 

அப்போது ஒரு நபரை சிலர் காரில் வலுக்கட்டாயமாக கடத்தி செல்வதாகவும், காருக்கு பின்னால் கடத்தலில் தொடர்புடைய இரண்டு நபர்கள் இருசக்கர வாகனத்தில் செல்வதை பார்த்த மதுரை மாநகர ஆயுதப்படை காவலர் விக்னேஷ் சந்தேகிக்கப்பட்ட காரை பின் தொடர்ந்து துரத்தி சென்றும் செல்போனில் வீடியோ பதிவு செய்த போது பதிவுஎண் இல்லாத ஊதா நிற டொயாட்டா காரானது வேகமாக சென்றதாக தல்லாகுளம் காவல் நிலையத்திற்கு தகவல் அளித்துள்ளார். இதையடுத்து தல்லாகுளம் காவல்துறையினர் காரை பின்தொடர்ந்து தேடியுள்ளனர்.

அப்போது காருக்கு பின்னால் சென்ற இருசக்கர பைக் எண்ணை விசாரித்தபோது மதுரை தல்லாகுளம் பகுதியைச் சேர்ந்த கௌதம் என்பவருக்கு சொந்தமானது என தெரியவந்ததால் தொடர்ந்து வழியில் உள்ள சிசிடிவி கேமராக்களை ஆய்வு செய்தபோது பைக்கில் சென்ற கௌதம் சிவகங்கை மாவட்டம் திருப்பாச்சேத்தி காவல் நிலையத்திற்கு உட்பட்ட பகுதியில் இருப்பது தெரியவந்துள்ளது.

இதையடுத்து அங்கு சென்ற தனிப்படை காவல்துறையினர் ராமநாதபுரம் மாவட்டம் பார்த்திபனூர் பகுதியைச் சேர்ந்த ராஜ்குமார்( 31) மதுரையைச் சேர்ந்த மாரிமுத்து ( 23 ) மற்றும் ஸ்ரீகாந்த் ( 19 ) மற்றும் கௌதம் ஆகிய 4 பேரையும் கைது செய்து,  ராமநாதபுரம் மாவட்டம் கமுதியைச் சேர்ந்த வழக்கறிஞரான செந்தில்வேல் (32) மற்றும் அவரது வாகன ஓட்டுனரான லெட்சுமணன் ஆகிய இருவரையும் மீட்டனர். பின்னர் கடத்தலுக்கு பயன்படுத்திய கார் மற்றும் பைக்குகளை கைப்பற்றினர்.

காவல்துறையினரின் விசாரணையில் கடத்தியதாக சொல்லப்பட்ட வழக்கறிஞர் செந்தில்வேல் என்பவர்., கைது செய்யப்பட்ட ராஜ்குமார் என்பவரின் பெரியம்மா மகன் ஆவார்.  இவ்வழக்கில் கடத்தப்பட்ட செந்தில் வேல் என்பவர் ராஜ்குமாரிடம் 5 லட்சம் பணம் கடன் வாங்கி பணத்தை திரும்ப கொடுக்காததால் பிரச்சனைகள் ஏற்பட்டு அவரை மிரட்டி பணம் பெறுவதற்கு கடத்திச் சென்றதாக போலீசார் தெரியவந்துள்ளது.

இதனையடுத்து தல்லாகுளம் காவல் நிலையத்தில் 4 பேர் மீதும் வழக்குப்பதிவு செய்யப்பட்டு விசாரணை நடத்திவருகின்றனர். கடத்தலை தடுத்து வழக்கறிஞரை விரைந்து மீட்ட காவல்துறையினரை காவல் ஆணையர் லோகநாதன் பாராட்டினார்.

5 லட்சம் ரூபாய் கொடுக்கல் வாங்கல் விவகாரத்தில் உறவினர் மூலமாக மதுரை மாவட்ட ஆட்சியர் அலுவலக சாலையில் வழக்கறிஞரை காரில் கடத்தப்பட்ட சம்பவம் பரபரப்பை ஏற்படுத்திய நிலையில் வழக்கறிஞர் செந்தில்குமாரின் உறவினர் உட்பட நான்கு பேரை காவல்துறையினர் கைது செய்துள்ள சம்பவம் பரபரப்பை ஏற்படுத்தியுள்ளது.