கந்தசுவாமி கோயில் மாசி பிரம்மோற்சவம்.. தெப்பத்  திருவிழா கோலாகலம்

செங்கல்பட்டு மாவட்டம், திருப்போரூர்‌ கந்தசுவாமி திருக்கோயிலில் ஆண்டுதோறும் மாசி மாத பிரம்மோற்சவ பெருவிழா நடைபெறுவது வழக்கம். அந்த வகையில் இந்த ஆண்டுக்கான பிரம்மோற்சவ பெருவிழா கடந்த 3-ஆம் தேதி கொடியேற்றத்துடன் கோலாகலமாக தொடங்கியது.

இதையடுத்து நாள்தோறும் காலை மற்றும் மாலை வேலையில் அருள்மிகு கந்தசுவாமி பெருமான் வீதியுலா வரும் உற்சவ நிகழ்ச்சிகள் நடைபெற்றன. அதன் படி 9-ஆம் நாளான  நேற்று மாலை சரவண பொய்கை குளத்தில் கந்தசாமி பெருமான் அலங்கரிக்கப்பட்ட தெப்பத்தில் மூன்று முறை வலம் வந்து பக்தர்களுக்கு காட்சியளித்தார்.

இதனைத் தொடர்ந்து 15-ஆம் தேதி காலை திருக்கல்யாண உற்சவமும் நடைபெற உள்ளது. முன்னதாக, கடந்த 9-ஆம் தேதி கந்தசுவாமி கோயிலின் முக்கிய நிகழ்வான தேர் திருவிழா கோலாகலமாக நடைபெற்றது. காலை ஏழு மணியளவில் உற்சவர் கந்தனுக்கு சிறப்பு அபிஷேகம் நடைபெற்றது.

தொடர்ந்து, கந்தபெருமான் சிறப்பு அலங்காரத்தில், கோயிலிலிருந்து தேரடிக்கு `அரோகரா' கோஷத்துடன் பக்தர்கள் வெள்ளத்தில் புறப்பட்டார். பின்னர் அலங்கரிக்கப்பட்ட தேரில் கந்தபெருமான் எழுந்தருளிய நிலையில் ஆயிரக்கணக்கான பக்தர்கள் தேரை வடம் பிடித்து இழுத்தனர்.

தேரானது நான்கு மாட வீதிகள் வழியாக சென்று பிற்பகல 3:00  மணியளவில் தேரடிக்கு வந்தது. தேர் உற்சவத்தை ஒட்டி பக்தர்களுக்கு அன்னதானம், நீர், மோர், பழரசங்கள் வழங்கப்பட்டன.

Read more:-

கல்யாண வெங்கட்ரமண சுவாமி ஆலய மாசி தேரோட்டம்.. திரளாக குவிந்த பக்தர்கள்