கோவை மத்திய சிறை கைதி வெளியிட்ட வீடியோவால் அதிர்ச்சி..  தனது உயிருக்கு ஆபத்து என புகார் 

கோவை மத்திய சிறையில் தூக்கு தண்டனை, ஆயுள் தண்டனை மற்றும் விசாரணை கைதி என்று இரண்டாயிரத்து 500-க்கும் மேற்பட்ட கைதிகள் உள்ளனர். இந்த சிறைக்குள் கைதிகள் வேலை செய்ய தொழில் கூடம் உள்ளது. அதேபோன்று இரண்டு பெட்ரோல் விற்பனை நிலையமும் உள்ளது. இதில் நன்னடத்தை அடிப்படையில் கைதிகள் தேர்வு செய்யப்பட்டு அதில் வேலை செய்து வருகின்றனர். 

கடந்த மாதம் 27-ஆம் தேதி நெல்லையைச் சேர்ந்த ஏசுதாஸ் என்ற ஆயுள் தண்டனை கைதி கொலை செய்யப்பட்டார். இது தொடர்பாக ரேஸ்கோர்ஸ் காவல் துறையினர் வழக்குப் பதிவு செய்து விசாரணை நடத்தி வருகின்றனர். அத்துடன் குற்றவாளி யார் ? என்பது  தொடர்பாக 4 தனிப்படையினர் தீவிர விசாரணை நடத்தி வருகின்றனர்.

இந்நிலையில் ஆயுள் தண்டனை பெற்று மத்திய சிறையில் கைதியாக இருக்கும் தூத்துக்குடி மாவட்டம் புதுக்கோட்டை அருகே உள்ள தட்டாபாறை பகுதியைச் சேர்ந்த விக்ரம் என்பவர் வீடியோ ஒன்றை வெளியிட்டுள்ளார். ஒரு நிமிடம் உள்ள இந்த வீடியோவில் பரபரப்பு புகார் தெரிவித்துள்ளார். அதில்,  தனது உயிருக்கு பாதுகாப்பு இல்லை.

எந்த நேரத்திலும் என்ன வேண்டும் என்றாலும் நடக்கலாம். சிறையில் இருக்கும் மோகன் ராம், கிருபாகரன், சதீஷ், பாலு ஆகியோரால் தனக்கு ஆபத்து இருக்கிறது. ஏற்கனவே ஒருவரை கொன்று விட்டனர். அடுத்த குறி நான் தான். சிறையிலே கைதிகளுக்கு பாதுகாப்பு இல்லை. எப்படி, எங்கு இருந்து வந்து கொலை செய்கிறார்கள் என்று தெரியவில்லை, ஆனால் கொன்று விடுகிறார்கள்.

என்ன ஆயுதத்தை வைத்து கொள்கிறார்கள் என்றே தெரியவில்லை, எனக்கு என்ன நடந்தாலும் அந்த 4 பேர் தான் பொறுப்பு என்று பேசி இருக்கிறார். கோவை மத்திய சிறை கைதி கொலை செய்யப்பட்ட நிலையில், மீண்டும் கைதி ஒருவர் தனது உயிருக்கு ஆபத்து என்று கூறி வீடியோ வெளியிட்டு இருப்பது பெரும் பரபரப்பை ஏற்படுத்தி உள்ளது. இது தொடர்பாக விசாரணை நடத்தப்பட்டு வரும் நிலையில் இந்த வீடியோ சமூக வலைதளங்களில் வைரலாகி வருகிறது. 

இச்சம்பவம் குறித்து கோவை மத்திய சிறை கண்காணிப்பாளர் செந்தில்குமார் கூறும் போது :-

தூத்துக்குடி மாவட்டம் தட்டா பாறையைச் சேர்ந்த விக்ரம் மீது இரண்டு கொலை வழக்கு உள்ளது. அதில் ஆயுள் தண்டனை பெற்ற அவர் கடந்த 2017-ஆம் ஆண்டு பாளையங்கோட்டை சிறையில் அடைக்கப்பட்டார். அங்கு சிறை நிர்வாகத்திற்கு எதிராக செயல்பட்டதால் கடந்த 2022-ஆம் ஆண்டு கோவை மத்திய சிறைக்கு மாற்றப்பட்டார். கடந்த ஆண்டு ஜனவரி மாதம் 24-ஆம் தேதி இதே போன்று தவறான குற்றச்சாட்டை கூறினார். 

தற்பொழுது அதுபோன்று மீண்டும் கூறி உள்ளார். விளம்பரத்துக்காக அவர் இதுபோன்று செய்து வருகிறார். கோவை மத்திய சிறையில் கைதிகள் வீடியோ கால்பேசும் வசதி உள்ளது.  அந்த வசதியை அவர் தவறாக பயன்படுத்தி உள்ளார். இருந்த போதிலும், இது தொடர்பாக விசாரணை நடத்தப்பட்டு வருகிறது என்று கூறியுள்ளார்.