நான் ஓய்வு பெற போவதில்லை.. நடப்பது அப்படியே தொடரும்.. ரோகித் சர்மா அதிரடி முடிவு!

2025 சாம்பியன் டிராபி தொடர் நேற்றுடன்  (மார்ச் 9) முடிவடைந்தது. இந்த தொடர் முழுவதும் இந்திய அணி சிறப்பாக விளையாடி இறுதி போட்டியில் நியூசிலாந்தை வீழ்த்தி சாம்பியன் பட்டத்தை தட்டிச் சென்றது. கிட்டத்தட்ட 12 ஆண்டுகளுக்கு பிறகு சாம்பியன் டிராபியை மீண்டும் இந்திய அணி வென்றுள்ளது.  

கேப்டன் ரோகித் சர்மா தலைமையில் கடந்த ஆண்டு இந்திய அணி  டி20 உலக கோப்பையை வென்ற நிலையில், இந்த ஆண்டு மற்றொரு ஐசிசி கோப்பையை வென்று சாதனை படைத்துள்ளனர்.  பரபரப்பான இறுதிப் போட்டியில் நான்கு விக்கெட் வித்தியாசத்தில் இந்திய அணி அபார வெற்றி பெற்றது.

ரோகித் சர்மா ஓய்வு

இந்த நிலையில் சாம்பியன் டிராபி தொடர்  முடிந்ததும் கேப்டன் ரோகித் சர்மா தன் ஓய்வை அறிவிப்பார் என்று செய்திகள் வெளியானது. அதாவது, கடந்த ஆண்டு இறுதியில் ஆஸ்திரேலியா தொடரில் இந்திய அணி தோல்வியை தழுவியதால் கேப்டன் ரோகித் சர்மா, விராட் கோலி போன்ற மூத்த கிரிக்கெட் வீரர்கள் ஓய்வை அறிவிப்பார்கள் என்று தகவல் வெளியானது.

ஆனால், தான் இப்போது ஓய்வை அறிவிக்கப்போவதில்லை என்று ரோகித் சர்மா தெரிவித்துள்ளார். சாம்பியன் டிராபி இறுதிப்போட்டி முடிந்து செய்தியாளர்களை சந்தித்த ரோகித் சர்மா பேசியதாவது, “நான் தற்போது ஒருநாள் போட்டிகளில் இருந்து ஓய்வுபெறப் போவதில்லை என்பதைத் தெளிவுப்படுத்த விரும்புகிறேன்.

எதிர்காலத்தில் என் ஓய்வு குறித்து எந்த வதந்திகளும் பரவாமல் இருக்க வேண்டும் என்பதற்காகவே இதனை தெரிவிக்கிறேன். தற்போது வரை எதிர்காலத் திட்டம் எதுவும் இல்லை, நடப்பது அப்படியே தொடரும்.  கடந்த 2019-ஆம் ஆண்டு உலக கோப்பை போட்டியின் போது நான் அதிக ரன்னை குவித்தேன்.

ஆனால், அதில் நாங்கள் தோற்றுவிட்டதால் மகிழ்ச்சி இல்லை. உங்கள் பங்களிப்பால் ஒரு அணி வெற்றி பெறும் போதுதான் திருப்தி ஏற்படுகிறது. நான் எப்படி விளையாட வேண்டும் என்பதை என் மனதில் தெளிவாக தீர்மானித்துள்ளேன். அதைத்தான் செய்ய முயற்சிக்கிறேன்” என்று கூறினார்.

முன்னதாக, கடந்த 2022 மற்றும் 2013-ஆம் ஆண்டு இந்தியா, சம்பியன் டிராபி கோப்பையை வென்ற நிலையில் தற்போது 12 ஆண்டுகளுக்கு பிறகு மூன்றாவது முறையாக மீண்டும் சாம்பியன் டிராபி கோப்பையை வென்றுள்ளதை ரசிகர்கள் உற்சாகத்துடன் கொண்டாடியுள்ளனர்.