கத்தி முனையில் வடமாநில பெண்ணுக்கு கூட்டு பாலியல் வன்கொடுமை.. 3 பேர் கைது

தமிழகத்தில் சமீபகாலமாக பாலியல் வன்கொடுமை சம்பவங்கள் தொடர்ந்து அதிகரித்து வருகிறது. குழந்தைகள், பெண்கள், பெண் காவலர்கள் என பலரும் பாலியல் வன்கொடுமைக்கு உள்ளக்கப்பட்டதாக வரும் செய்திகள் மக்கள் மத்தியில் பெரும் அச்சத்தை ஏற்படுத்தி வருகிறது. அதுமட்டுமல்லாமல், இந்த பாலியல் வன்கொடுமைகள் குறித்து எதிர்க்கட்சி தலைவர்கள் தொடர்ந்து கேள்வி எழுப்பி வருகின்றனர்.

இந்நிலையில், தற்போது திருப்பூரில் வடமாநில பெண் ஒருவரை மூன்று இளைஞர்கள் பாலியல் வன்கொடுமை செய்த சம்பவம் அதிர்ச்சியை ஏற்படுத்தியுள்ளது. அதாவது,  ஒடிசா மாநிலத்தைச் சேர்ந்த 24 வயது பெண் ஒருவர் தனது கணவர் மற்றும் குழந்தைகளுடன் கோயம்புத்தூர் பகுதியில் உள்ள தனியார் நிறுவனத்தில் பணியில் சேருவதற்காக வந்துள்ளார்.

மேலும் படிக்க: 17 வயது சிறுமியை கூட்டு பாலியல் வன்கொடுமை செய்த மாணவர்கள்.. அண்ணாமலை கண்டனம்

அங்கு வேலை பிடிக்கவில்லை என்பதால் மீண்டும் சொந்த ஊரான ஒடிசா மாநிலத்திற்கே செல்ல முடிவு எடுத்துள்ளார். அதன்படி அந்த பெண், தனது கணவர் மற்றும் குழந்தையுடன் திருப்பூர் ரயில் நிலையத்திற்கு வந்துள்ளார். அப்போது, ரயில் நிலையத்தில் நீண்ட நேரமாக காத்திருந்த போது  பீகார் மாநிலத்தைச்  சேர்ந்த நதீம், டானீஷ் மற்றும் முர்சித் என்ற மூன்று இளைஞர்கள் அறிமுகமாகி உள்ளனர்.

தொடர்ந்து, அவர்கள் தங்கள் வேலை பார்க்கும் நிறுவனத்தில் வேலை வாங்கி தருவதாக  கூறி அவர்களை அழைத்துச் சென்றுள்ளனர். அதன் பின்னர் அப்பெண்ணின் கணவரைக் கட்டிப்போட்டு விட்டு,  கணவன் மற்றும் குழந்தையின் கண் முன்னே கத்தியைக் காட்டி மிரட்டி அப்பெண்ணை மூன்று இளைஞர்களும் பாலியல் வன்கொடுமை செய்ததாகக் கூறப்படுகிறது. 

இது குறித்துப் பாதிக்கப்பட்ட  பெண் போலீசில் புகார் அளித்தார். இந்த புகாரின் பேரில் போலீசார் விசாரணை மேற்கொண்ட போலீசார் கத்தி முனையில் பெண்ணை மிரட்டி பாலியல் வன்கொடுமை செய்த மூன்று இளைஞர்களையும் கைது செய்து விசாரணை நடத்தினர். திருப்பூரில் கத்தி முனையில்,  கணவர் மற்றும் குழந்தையின் கண் முன்னே வட மாநில பெண்ணை பாலியல் வன்கொடுமை செய்த சம்பவம் மக்கள் மத்தியில் பெரும் அதிர்ச்சியையும் ஏற்படுத்தி உள்ளது.