93 பள்ளிகளில் உடற்பயிற்சி ஆசிரியர் இல்லை - திண்டுக்கல்லில் அதிர்ச்சி!

இந்தியா முழுவதும் பள்ளி மாணவர்கள் விளையாட்டுகளில் ஆர்வங்கள் செலுத்தாமல் செல்போன்களில் மூழ்கி கிடக்கும் நிலை ஏற்பட்டுள்ளது. இதனால் தமிழ்நாட்டில் முதலமைச்சர் கோப்பை என்ற பெயரில் மாவட்டம் தோறும் அனைத்து பள்ளி மாணவர்களையும் ஒன்றிணைத்து விளையாட்டுப் போட்டிகள் நடைபெற்ற வருகிறது. 

மேலும், மாவட்டம் தோறும் மைதானங்கள் உருவாக்கப்பட்டு விளையாட்டுக்கு தனி பயிற்சி அளிக்கப்படும் என தமிழ்நாடு அரசு தரப்பில் தெரிவிக்கப்பட்டுள்ளது. இந்நிலையில், திண்டுக்கல் கொடைரோடு பகுதியைச் சேர்ந்த ரதிஷ் பாண்டியன் என்பவர் திண்டுக்கல் பள்ளிக்கல்வித் துறையிடம் தகவல் பெறும் உரிமைச் சட்டத்தின் கீழ் சில கேள்விகளை கேட்டுள்ளார்.

அதன்படி, 27.09.24 அன்று அளிக்கப்பட்ட பதிலில்,

* திண்டுக்கல் ஒருங்கிணைந்த வருவாய் மாவட்டத்தில் 170 அரசு மேல்நிலை மற்றும் உயர்நிலை பள்ளிகள் உள்ளது. 

* இந்தப் பள்ளிகளில் 140 பள்ளிகளில் மைதானங்கள் உள்ளது. 30 பள்ளிகளில் மைதானங்கள் இல்லை.

* குறிப்பாக 93 பள்ளிகளில் உடற்பயிற்சி ஆசிரியர்கள் இல்லை என்ற அதிர்ச்சியூட்டும் தகவலும் தெரிவிக்கப்பட்டுள்ளது.

* மேலும், மைதானங்கள் இருக்கும் சில பள்ளிகளில் உடற்பயிற்சி ஆசிரியர்கள் இல்லாமலும், மைதானங்கள் இல்லாத பள்ளிகளில் உடற்பயிற்சி ஆசிரியர்களும் உள்ளனர் என அந்த பதிலில் தெரிவிக்கப்பட்டுள்ளது.

* மேலும், திண்டுக்கல் மாவட்டம் 15 கல்வி வட்டங்களாக பிரிக்கப்பட்டுள்ளது.

இதில்,
1) ஆத்தூர் - 12
2) வத்தலகுண்டு - 11
3) திண்டுக்கல் நகரம் - 9
4) திண்டுக்கல்  கிராமம் - 4
5) குஜிலியம்பாறை - 8
6) கொடைக்கானல் - 10
7) நத்தம் - 22
8) நிலக்கோட்டை - 11
9) ஒட்டன்சத்திரம் - 12
10) பழனி கிராமம் - 8
11) ரெட்டியார்சத்திரம் - 11
12) சாணார்பட்டி - 13
13) தொப்பம்பட்டி - 13
14) வடமதுரை - 12 
15) வேடசந்தூர் - 14

ஆகிய எண்ணிக்கைகளில் அரசு மேல்நிலை மற்றும் உயர்நிலைப் பள்ளிகள் உள்ளன.