மாணவி பாலியல் வன்கொடுமை வழக்கு.. சிறை தண்டனையை ரத்து செய்த உயர் நீதிமன்றம்

சென்னையை சேர்ந்த கணவனை இழந்த பெண் ஒருவரின்  மகளை, அதே பகுதியைச் சேர்ந்த ஆட்டோ டிரைவரான முத்துக்குமார் என்பவர் பள்ளிக்கு அழைத்து சென்று விடும் பணியை செய்து வந்தார். இந்நிலையில் ஆட்டோ டிரைவர் முத்துக்குமார்,  அந்த மாணவியை பாலியல் வன்கொடுமை செய்துள்ளார். அதனால் கருவுற்ற அந்த மாணவிக்கு ஆண் குழந்தை பிறந்துள்ளது.

இதையடுத்து அந்த மாணவி தன் குழந்தைக்கு சிகிச்சை பெற ஆரம்ப சுகாதர நிலையத்திற்கு  சென்றுள்ளார். அப்போது மாணவி, குழந்தையுடன் வந்திருப்பதை பார்த்து அதிர்ச்சியடைந்த ஆரம்ப சுகாதார நிலைய அதிகாரிகள், குழந்தைகள் நல குழுவுக்கு தகவல் தெரிவித்துள்ளனர்.

தொடர்ந்து, குழந்தைகள் நல குழு அளித்த புகாரின் அடிப்படையில், சென்னை புளியந்தோப்பு காவல் நிலையத்தில் ஆட்டோ டிரைவர் முத்துகுமார் மற்றும் அந்த மாணவியின் தாய் மீது வழக்குப்பதிவு செய்யப்பட்டது. வழக்கை விசாரித்த போக்சோ சிறப்பு நீதிமன்றம், ஆட்டோ டிரைவர் முத்துக்குமாருக்கு  20 ஆண்டு சிறைத் தண்டனை விதித்து தீர்ப்பளித்தது.

இந்த தீர்ப்பை எதிர்த்து முத்துகுமார் சென்னை உயர் நீதிமன்றத்தில்  மேல்முறையீடு செய்துள்ளார். இந்த மேல்முறையீட்டு மனு நீதிபதி, நிர்மல் குமார் முன் விசாரணைக்கு வந்தது. அப்போது பாதிக்கப்பட்ட மாணவி நேரில் ஆஜராகி இருந்தார். அவரிடம்  நடத்திய விசாரணையில்,  ஆட்டோ டிரைவரும் தானும் திருமணம் செய்து கொண்டதாக கூறியுள்ளார்.

மேலும், தன்னை தனது கணவரின் தாய் தான்  கவனித்து வருவதாகவும் தெரிவித்தார். அதுமட்டுமல்லாமல், ஆட்டோ டிரைவர் முத்துகுமாருடன் தொடர்ந்து வாழ விரும்புவதாகவும்  தெரிவித்துள்ளார்.  இதை கேட்ட நீதிபதி, பாதிக்கப்பட்ட மாணவிக்கும், முத்துக்குமாருக்கும் இடையே உள்ள வயது வித்தியாசம் மட்டுமே அவர்கள் கணவன் - மனைவி என்ற உறவை தகுதி நீக்கம் செய்து விடாது என கருத்து தெரிவித்தார். 

மேலும், முத்துக்குமார் மீதான குற்றச்சாட்டுகளுக்கு போதுமான ஆதாரங்கள் இல்லை என்று கூறி அவருக்கு வழங்கப்பட்ட 20 ஆண்டு தண்டனையை ரத்து செய்து உத்தரவிட்டார்.