திட்டமிட்டபடி பள்ளிகள் இன்று திறப்பு.. உற்சாகமாக வந்த மாணவ-மாணவிகள்

தமிழ்நாட்டில் அரசு பள்ளிகள் மற்றும் அரசு உதவி பெறும் பள்ளிகளில் படிக்கும் மாணவர்களுக்கு மூன்று பருவங்களாக தேர்வுகள் நடத்தப்படுகிறது. இதில், 1-ஆம்  வகுப்பு முதல் 12-ஆம் வகுப்பு வரை பயிலும் மாணவர்களுக்கு கடந்த 23-ஆம் தேதியுடன் அரையாண்டு தேர்வுகள் முடிவடைந்தது. 

இதையடுத்து டிசம்பர் 24-ஆம் தேதி முதல்  ஜனவரி 1-ஆம் தேதி வரை விடுமுறை அறிவிக்கப்பட்டது. தொடர்ந்து, கிறிஸ்துமஸ், புத்தாண்டு பண்டிகைகள் முடிவடைந்து ஜனவரி 2-ஆம் தேதி பள்ளிகள் திறக்கப்படும் என பள்ளிக் கல்வித்துறை சார்பில் தெரிவிக்கப்பட்டது.

இதையடுத்து, தொடர் விடுமுறை காரணமாக சொந்த ஊர்களுக்கு சென்றவர்கள் திரும்புவதற்கு வசதியாக அரையாண்டு தேர்வு விடுமுறையை நீட்டிக்க  தமிழ்நாடு அரசு திட்டமிட்டுள்ளதாக தகவல் வெளியனது. அதன்படி, வரும் 5-ஆம் தேதி முதல் பள்ளிகள் திறக்கப்படலாம் என்று கூறப்பட்டது.

வழக்கமாக, அரையாண்டு, காலாண்டு போன்ற தேர்வுகள் முடிந்து விடுமுறைகள் அறிவிக்கப்படும் பொழுது இடையில் இரண்டு நாட்கள் அல்லது மூன்று நாட்கள் வேலை நாட்களாக இருந்தால் அரசு அதனையும் விடுமுறை நாட்களாக அறிவித்து தேர்வு விடுமுறைகளை நீட்டிப்பது வழக்கம்.

அந்த வகையில் தற்போது வியாழன், வெள்ளி என இரண்டு நாட்கள் மட்டுமே வேலை நாட்களாக இருப்பதால் ஜனவரி 5-ஆம் தேதி பள்ளியை திறக்க பள்ளிக் கல்வித்துறை முடிவு செய்துள்ளதாக தகவல் வெளியானது.

ஆனால், திட்டமிட்டபடி பள்ளிகள் ஜனவரி 2-ஆம் தேதி திறக்கப்படும் என்று நேற்று (ஜனவரி 1) பள்ளிக்கல்வித் துறை அறிவித்திருந்தது. அதன்படி, அரையாண்டு விடுமுறைக்கு பிறகு பள்ளிகள் இன்று திறக்கப்பட்ட நிலையில் மாணவ-மாணவிகள் உற்சாகத்துடன் பள்ளிகளுக்கு சென்றனர்.