மகனால் தாய்க்கு நேர்ந்த கொடூரம்.. டெல்லியில் அதிர்ச்சி!

டெல்லியில் 39 வயது மகன் ஒருவர், தனது 65 வயதான தாயாரை இரண்டு முறை பாலியல் வன்கொடுமை செய்த வழக்கில் கைது செய்யப்பட்டுள்ளார். தனது தாய் கடந்த காலத்தில் திருமணத்தை மீறிய உறவு வைத்திருந்ததாகக் குற்றம்சாட்டி, பழிவாங்கும் நோக்கத்தில் இதைச் செய்ததாகக் கூறப்படுகிறது.

பாதிக்கப்பட்ட 65 வயதான அந்தப் பெண் தனது கணவர், குற்றம் சாட்டப்பட்ட மகன் மற்றும் இளைய மகளுடன் டெல்லி ஹவுஸ் காசி பகுதியில் வசித்து வருகிறார். அவர்களுக்குத் திருமணம் ஆன மூத்த மகளும் அதே பகுதியில் வசித்து வருகிறார்.

கடந்த ஜூலை 17 அன்று, அந்தப் பெண்ணும் அவரது கணவர் மற்றும் இளைய மகளும் சவூதி அரேபியாவுக்குப் ஹஜ் பயணம் மேற்கொண்டுள்ளனர். அப்போது, குற்றம் சாட்டப்பட்ட மகன், தனது தந்தையை உடனடியாக டெல்லிக்குத் திரும்புமாறு தொலைபேசியில் அழைத்துள்ளார். மேலும், தனது தாயாருக்கு விவாகரத்து கொடுக்குமாறும், தனது சிறுவயதில் அவர் தவறான உறவுகளை வைத்திருந்ததாகவும் குற்றம் சாட்டியுள்ளார்.

கடந்த ஆகஸ்ட் 1-ஆம் தேதி குடும்பத்தினர் டெல்லிக்குத் திரும்பியுள்ளனர். அப்போது, அந்த மகன் தனது தாயாரை ஒரு அறையில் பூட்டி, அடித்துத் துன்புறுத்தியுள்ளார். இதனால் பயந்துபோன அந்தப் பெண், வீட்டை விட்டு வெளியேறி, தனது இன்னொரு மகளின் வீட்டில் தஞ்சம் அடைந்துள்ளார்.

பின்னர், ஆகஸ்ட் 11 அன்று அவர் வீட்டிற்குத் திரும்பியுள்ளார். அன்று இரவு 9.30 மணியளவில், தனிப்பட்ட முறையில் தனது தாயுடன் பேச வேண்டும் என்று கூறி, அவரை மீண்டும் ஒரு அறையில் பூட்டியுள்ளார். அப்போது, தனது தாயாரின் "கடந்தகால உறவுகளுக்கு" தண்டனை கொடுப்பதாகக் கூறி, அவரைப் பாலியல் வன்கொடுமை செய்துள்ளார். அதன் பிறகு, ஆகஸ்ட் 14 அன்று அதிகாலை 3.30 மணியளவில், இரண்டாவது முறையாகப் பாலியல் வன்கொடுமை செய்துள்ளார்.

மறுநாள், அந்தப் பெண் தனது இளைய மகளிடம் நடந்த அனைத்தையும் கூறி அழுதுள்ளார். அவரது மகள் காவல் நிலையம் சென்று புகார் அளிக்குமாறு தாயாருக்கு ஊக்கமளித்துள்ளார். இருவரும் ஹவுஸ் காசி காவல் நிலையத்தில் எழுத்துப்பூர்வமான புகாரைச் சமர்ப்பித்துள்ளனர். புகாரின் அடிப்படையில், வழக்குப் பதிவு செய்த போலீசார், அந்த 39 வயது மகனைக் கைது செய்து விசாரித்து வருகின்றனர்.