கரையை கடந்தது காற்றழுத்த தாழ்வு மண்டலம்.. தமிழகத்தில் மழைக்கு வாய்ப்பு!

வடமேற்கு மற்றும் வடக்கு ஆந்திரா, தெற்கு ஒடிசா கடலோரப் பகுதிகளில் மையம் கொண்டிருந்த காற்றழுத்த தாழ்வு மண்டலம், இன்று (ஆகஸ்ட் 19) அதிகாலை கோபால்பூர் அருகே கரையை கடந்தது. இந்திய வானிலை ஆய்வு நிறுவனம் (IMD) வெளியிட்ட தகவலின்படி, இந்தக் காற்றழுத்த தாழ்வு மண்டலம், மணிக்கு 7 கி.மீ வேகத்தில் நகர்ந்துள்ளது.

காற்றழுத்த தாழ்வு மண்டலம் கரையை கடந்ததால், ஆந்திரா மற்றும் ஒடிசா மாநிலங்களில் பரவலாக நல்ல மழை பெய்து வருகிறது. குறிப்பாக, விசாகப்பட்டினம், காகிநாடா, விஜயநகரம், ஸ்ரீகாகுளம், படேறு, அரக்கு வேலி ஆகிய நகரங்களில் கனமழை மற்றும் நீர் பெருக்கம் ஏற்பட்டுள்ளது. மேலும், Parvathipuram Manyam, Alluri Sitharama Raju, Eluru உள்ளிட்ட மாவட்டங்களில் தொடர்ந்து கனமழைக்கு வாய்ப்புள்ளதாக எச்சரிக்கை விடுக்கப்பட்டுள்ளது.

தாழ்வு மண்டலம் கரையை கடந்த நிலையில், பலத்த காற்று வீசக்கூடும் எனவும், நீர் பெருக்கம், போக்குவரத்துத் தடங்கல்கள், மண்சரிவு உள்ளிட்ட பாதிப்புகள் ஏற்பட வாய்ப்புள்ளதாகவும் கூறப்பட்டுள்ளது. அதனால், அப்பகுதி மக்கள் எச்சரிக்கையாக இருக்கவும், கரையில் வசிப்போர் பாதுகாப்பு நடவடிக்கைகளை மேற்கொள்ளவும் அறிவுறுத்தப்பட்டுள்ளது.

இந்தக் காற்றழுத்த தாழ்வு மண்டலத்தின் நகர்வு, தமிழகத்தில் வளிமண்டல மேலடுக்கு சுழற்சியை வலுப்படுத்தக்கூடும் என வானிலை ஆய்வு மைய நிபுணர்கள் தெரிவித்துள்ளனர். இதனால், தமிழகத்தில் அடுத்த சில தினங்களுக்கு இடி, மின்னலுடன் கூடிய மிதமான மழைக்கு வாய்ப்புள்ளது. குறிப்பாக, கடலோர மாவட்டங்களில் நல்ல மழை இருக்கும் என எதிர்பார்க்கப்படுகிறது.