நாம் தமிழர் கட்சி தலைமை ஒருங்கிணைப்பாளர் சீமானுக்கு எதிராக நடிகை அளித்த பாலியல் புகார் தொடர்பாக 12 வார காலத்திற்குள் அறிக்கை தாக்கல் செய்ய வேண்டும் என சென்னை உயர் நீதிமன்றம் உத்தரவிட்டது.  இந்த வழக்கு தொடர்பாக கடந்த 27-ம் தேதி வளசரவாக்கம் காவல் நிலையத்தில் சீமான் ஆஜராக வேண்டிய நிலையில் அவர் ஆஜராகவில்லை.

அவருக்கு பதிலாக அவரின் வழக்கறிஞர்கள் காவல்நிலையத்தில் ஆஜராகி விசாரணையை ஒத்திவைக்க வேண்டும் எனக் கடிதம் கொடுத்தனர். இதையடுத்து சீமான் வீட்டில் காவல்துறையினரால் நோட்டீஸ் ஒட்டப்பட்டது. அந்த நோட்டீஸை அகற்றிய சீமான் வீட்டு காவலாளி, உதவியாளர் மற்றும் காவல்துறைக்கு இடையே தள்ளுமுள்ளு ஏற்பட்டது. இதையடுத்து, பிப்ரவரி 28-ஆம் தேதி  சீமான் காவல்நிலையத்தில் ஆஜரானார்.

இதனிடையே, நடிகை பாலியல் விவகாரம் தொடர்பாக சென்னை உயர்நீதிமன்றம் அளித்த உத்தரவை எதிர்த்து சீமான் தரப்பு உச்ச நீதிமன்றத்தில் மனு தாக்கல் செய்தது. இந்த வழக்கு விசாரணையின் போது, 12 ஆண்டுகளுக்கு பின்னர் இந்த வழக்கு மீண்டும் தொடரப்பட்டுள்ளது. புதிய அரசு பொறுப்பேற்றதையடுத்து அரசியல் காழ்ப்புணர்ச்சி காரணமாக வழக்கு தொடரப்பட்டுள்ளது.  

எனவே 12 வாரங்களில் விசாரணை மேற்கொண்டு அறிக்கை தாக்கல் செய்ய வேண்டும் என்ற சென்னை உயர்நீதிமன்ற உத்தரவுக்கு இடைக்கால தடை விதிக்க வேண்டும் என்று சீமான் தரப்பில் தெரிவிக்கப்பட்டது. இதனை ஏற்றுக் கொண்ட நீதிபதிகள்,  எதிர்மனுதாரர் தங்களின் தரப்பு விளக்கம் என்ன என்பதற்கு பதிலளிக்க நோட்டீஸ் வழங்கப்படும் என்றும் இந்த வழக்கை உச்ச நீதிமன்றம் மீண்டும் விசாரித்த பிறகே காவல்துறை சீமானை விசாரிக்க வேண்டும் .  அதுவரை இந்த விசாரணைக்கு இடைக்காலத் தடை விதிக்கப்படுகிறது என்றும் உத்தரவு பிறப்பித்தனர்.

இந்நிலையில், உச்ச நீதிமன்றத்தில் நடந்து என்ன என்பது குறித்து பாதிக்கப்பட்ட நடிகை வீடியோ ஒன்றை வெளியிட்டுள்ளார். அதில், “தீர்ப்பின் அடிப்படையில் செட்டில்மெண்ட் என்று கூறியுள்ளதால் நடிகைக்கு சீமான் இரவோடு இரவாக 10 கோடி ரூபாய் கொடுத்துவிட்டார் என்று பலர் பேச தொடங்கி விடுவார்கள்.  ஈழத்தமிழர்கள் மூலம் கிடைத்த பணத்தை என்னிடம் கொட்டுகிறார் என அபாண்டமாக என் மீது பழி சுமத்தி விடுவார்கள். 

சென்னை உயர்நீதிமன்றத்தில் சீமான் வழக்கு தொடர்ந்த போது காவல்துறை தரப்பில் ஒரு வழக்கறிஞர் எனக்காக வாதாடினார். தீர்ப்பு வழங்கப்பட்டது. உச்சநீதிமன்றத்தில் வழக்கு வந்த போது என் சார்பில் ஏன் யாரும் ஆஜராக வில்லை? இதனால் சீமான் கோரிக்கையை உச்ச நீதிமன்றம் ஏற்றுள்ளது. நான் சீமான் பற்றி எதாவது கூறினாள் பணத்திற்காக பேசுகிறேன், ஏன் இப்படி பேசுகிறீர்கள்?  என்று கேட்பார்கள். 

உச்சநீதிமன்றத்தில் எனக்காக யாரும் போராடவில்லை. இந்த வழக்கில் எனக்கு எந்த நியாயமும் கிடைக்கப்போவதில்லை என தெரிந்து தான் கதறி அழுதேன். நான் எந்த போராட்டத்திலும் ஈடுபட போவதில்லை. என்னை அசிங்கப்படுத்தும் வேலை நடக்கிறது. அந்த அசிங்கத்தில் இறங்கி போராட அவசியமில்லை. என்னை மக்கள் புரிந்து கொள்வார்கள். எனக்கு ஆதரவு கொடுத்த பொதுமக்கள், ஊடகத்தினருக்கு நன்றி” என்று கூறினார்.