திருவண்ணாமலை சம்பவம் மிகுந்த வருத்தத்திற்குரியது: சட்டம்-ஒழுங்கு, மதுவிலக்கு குறித்து ஜி.கே.வாசன் பேட்டி!

தமிழ்நாட்டின் முன்னாள் முதலமைச்சர் காமராஜரின் 50-வது நினைவு தினத்தையொட்டி, சென்னை கிண்டியில் உள்ள அவரது நினைவிடத்தில் அமைக்கப்பட்டிருந்த மார்பளவு சிலைக்குத் தமிழ் மாநில காங்கிரஸ் கட்சியின் தலைவர் ஜி.கே.வாசன் தலைமையில் அக்கட்சியினர் மாலை அணிவித்து மரியாதை செலுத்தினர்.

பின்னர் செய்தியாளர்களிடம் பேசிய ஜி.கே.வாசன், தமிழ்நாட்டில் நிலவும் சட்டம்-ஒழுங்கு, மது விலக்கு மற்றும் சமீபத்திய கசப்பான சம்பவங்கள் குறித்துப் பின்வருமாறு கருத்து தெரிவித்தார்:

சட்டம்-ஒழுங்கு மற்றும் சமூகப் பிரச்சினைகள்

திருவண்ணாமலையில் பாலியல் சம்பவம் நடந்தது மிகுந்த வருத்தத்துக்குரியது. தமிழ்நாட்டில் சட்டம் ஒழுங்கு சரி இல்லை. சட்டம் ஒழுங்கு பிரச்சினைகளை சரி செய்ய அரசு நடவடிக்கை எடுக்க வேண்டும். மதுவுக்கு முற்றுப்புள்ளி வைக்க வேண்டும். போதைப் பொருளுக்கு முடிவு கட்ட வேண்டும். இந்த நடவடிக்கைகளை அரசு மேற்கொண்டால், தமிழ்நாட்டில் பல பிரச்சினைகள் குறைய வாய்ப்புள்ளது என்றும், அரசு இதை கண்டுகொள்ளாமல் இருப்பது வேதனைக்குரியது என்றும் அவர் குறிப்பிட்டார்.

கரூர் விபத்து குறித்து

சமீபத்தில் கரூரில் நடைபெற்ற பொதுக்கூட்டத்தில் நிகழ்ந்த கூட்ட நெரிசல் குறித்துப் பேசிய அவர், கரூரில் நடந்த சம்பவம் மிகப்பெரிய வடுவாக மாறி இருக்கிறது. வரும் காலங்களில் நடக்கும் அனைத்துக் கட்சிகளின் கூட்டங்களிலும் கட்டுப்பாடுகள் கடைப்பிடிக்கப்பட வேண்டும் என வலியுறுத்தினார். மேலும், இதுபோன்ற சூழல்களில் அரசும், காவல்துறையும் பொதுமக்களுக்கு உரிய பாதுகாப்பை வழங்க வேண்டும் என்றும் அவர் கேட்டுக்கொண்டார்.