சென்னை கோட்டூர்புரத்தில் உள்ள அண்ணா நூற்றாண்டு நூலக கூட்ட அரங்கில் பள்ளிக் கல்வித் துறை அமைச்சர் அன்பில் மகேஸ் பொய்யாமொழி  தலைமையில் பள்ளிக் கல்வித் துறையின் முதன்மை கல்வி அலுவலர்களுடன் ஆய்வுக் கூட்டம் நடைபெற்றது. இதில் பள்ளிக்கல்வித்துறை செயலாளர் சந்திரமோகன் மற்றும் பள்ளிக்கல்வித்துறை உயர் அதிகாரிகள் பலர் கலந்து கொண்டனர்.

தொடர்ந்து வகுப்பு வாரியாக பொது தேர்வு எழுத உள்ள மாணவர்களின் எண்ணிக்கையை வெளியிட்ட அமைச்சர் பேசியதாவது, 10-ஆம் வகுப்பு பொதுத் தேர்வை தமிழகம் முழுவதும் ஒன்பது லட்சத்து 13 ஆயிரத்து 36 மாணவர்கள் எழுத உள்ளதாகவும், 12-ஆம் வகுப்பு பொதுத் தேர்வை எட்டு லட்சத்து 21 ஆயிரத்தூ 57 மாணவர்களும், 11-ஆம் வகுப்பு பொதுத்தேர்வை  எட்டு லட்சத்து 23 ஆயிரத்து 261 மாணவர்கள் என தமிழகம் முழுவதும் 25 லட்சத்து 57 ஆயிரத்து 354 மாணவர்கள் எழுத உள்ளதாக கூறினார்.

மேலும் பேசிய அவர் 10-ஆம்  வகுப்பு பொதுத் தேர்வை 12 ஆயிரத்து 480 பள்ளிகளில் இருந்து மாணவர்கள் எழுத உள்ளதாகவும், பத்தாம் வகுப்பு பொதுத் தேர்விற்கு நான்காயிரத்து 113 மையங்கள் அமைக்கப்பட உள்ளது என்று கூறினார். தொடர்ந்து, 12-ஆம் வகுப்பு பொதுத்தேர்வை ஏழாயிரத்து 518 பள்ளிகளில் இருந்து மாணவர்கள் எழுத உள்ளதாகவும் பன்னிரண்டாம் வகுப்பு பொதுத் தேர்விற்கு மூன்றாயிரத்து 316 தேர்வு மையங்கள் அமைக்கப்பட இருப்பதாகவும் தெரிவித்தார்.

11-ஆம் வகுப்பு பொதுத்தேர்வை ஏழாயிரத்து 557 பள்ளிகளில் இருந்து மாணவர்கள் எழுத உள்ளதாகவும், 11-ஆம் வகுப்பு பொதுத்தேர்விற்கு மூன்றாயிரத்து 316 தேர்வு மையங்கள் அமைக்கப்படவுள்ளது என்றும் கூறினார்.தொடர்ந்து பொதுத்தேர்வு தேர்வு அறை கண்காணிப்பாளர்களின் எண்ணிக்கை வெளியிட்ட அமைச்சர் அன்பில் மகேஸ், பத்தாம் வகுப்பு பொதுத் தேர்வு பணிகளில் 48 ஆயிரத்து 426 கண்காணிப்பாளர்கள் ஈடுபட உள்ளனர்.

12 ஆம் வகுப்பு பொதுத் தேர்விற்கு 43 ஆயிரத்து 446 கண்காணிப்பாளர்கள் பணியில் ஈடுபட உள்ளனர். 11-ஆம் வகுப்பு பொதுத் தேர்விற்கு 44 ஆயிரத்து 236 கண்காணிப்பாளர்கள் தேர்வை கண்காணிக்கும் பணியில் ஈடுபட உள்ளனர் என்று குறிப்பிட்டார். பத்தாம் வகுப்பு பொதுத் தேர்வை கண்காணிக்க நான்காயிரத்து 858 பறக்கும் படையினர் ஈடுபட உள்ளதாகவும், பன்னிரண்டாம் வகுப்பு பொதுத் தேர்வை கண்காணிக்க நான்காயிரத்து 470 பறக்கும் படையினரும், பதினோராம் வகுப்பு பொது தேர்வை கண்காணிக்க  நான்காயிரத்து 470 பறக்கும் படையினர் பணியில் ஈடுபட உள்ளதாக கூறினார்.

இறுதியாக பேசிய அமைச்சர், மாற்றுத்திறனாளிகள் நலத்துறையின் கீழ் இயங்கும் பூவிருந்தவல்லி பார்வைத் திறன் குறைபாடு கொண்டோருக்கான அரசு மேல்நிலைப்பள்ளி மாணவர் ஒருவர் வரும் மார்ச் மாதத்தில் நடைபெற உள்ள 12-ஆம் வகுப்பு பொதுத் தேர்வினை கணினி வழியில் எழுத விருப்பம் தெரிவித்திருந்தார். அவரின் விருப்பத்தை ஏற்று வாசிப்பாளர் உதவியுடன் கணினி வழியில் அவர் தேர்வு எழுத அனுமதி வழங்கியுள்ளோம். 

இவர் தமிழ்நாடு அரசின் பாடத்திட்டத்தில் பொதுத் தேர்வினை கணினி வழியில் எழுதும் முதல் மாணவராக விளங்குவார். வருங்காலங்களில் பார்வைத்திறன் குறைபாடு உள்ள மாற்றுத்திறனாளி மாணவர்கள் தாமாகவே தேர்வினை எழுத இந்த நிகழ்வு முன் மாதிரியாக விளங்கும் என்று கூறிய அவர் பார்வைத்திறன் குறைபாடு உள்ள தேர்வர்கள் கணினி வழியில் தேர்வு எழுத அனுமதி வழங்கப்பட்டுள்ளது என்று தெரிவித்தார். 

தொடர்ந்து பேசிய அமைச்சர் அன்பில் மகேஸ்,  பாலியல் புகார் வந்தால் உடனே நேரடி ஆய்வுக்கு செல்ல வேண்டும். அதுகுறித்து  உடனடியாக தலைமைக்கு தெரிவிக்க வேண்டும். பாலியல் புகார்களை தீவிரமாக கண்காணிக்க வேண்டும். முறையாக விசாரிக்க தவறியவர்கள் மீது கடுமையான நடவடிக்கை எடுக்கப்படும். பள்ளிகளில் உள்ள மாணவர்களின் பாதுகாப்பை உறுதி செய்ய வேண்டும். பள்ளிகளில் மாணவர்களுக்கு பாதுகாப்பு இல்லை என்ற வகையில் கருத்துக்களை பரப்பி அரசியல் செய்ய முயற்சி செய்கிறார்கள் அதற்கு இடம் கொடுக்காத வகையில் செயல்பட வேண்டும்.

துன்புறுத்தல்கள் குறித்து மாணவர்கள் புகார் அளிக்கும் வகையில் விழிப்புணர்வு ஏற்படுத்த வேண்டும். மாவட்ட அளவிலேயே பள்ளிகளில் வரும் போக்சோ புகார்களை முன்னுரிமை கொண்டு விசாரித்து நடவடிக்கை எடுக்க வேண்டும். பள்ளி அளவில் பிரச்சினைகள் வரும் போதே அதனை சரிசெய்ய முயற்சி செய்ய வேண்டும். போக்சோ வழக்கில் குற்றம் நிரூபிக்கப்பட்டால் கல்வி சான்றிதழ் ரத்து செய்யப்பட்டு வேறு எங்கும் பணியாற்ற முடியாத நிலை ஏற்படும்.

ஆசிரியர் திட்டினாள் கூட 14417 உதவி மைய எண்ணை தொடர்பு கொண்டு நீங்கள் புகார் அளிக்கலாம் என மாணவர்களுக்கு விழிப்புணர்வு ஏற்படுத்த வேண்டும் என்று மாவட்ட கல்வி அலுவலர்கள் , மாவட்ட முதன்மை கல்வி அலுவலர்கள், தனியார் பள்ளி இயக்குநரக அலுவலர்களுக்கு பள்ளிக் கல்வித்துறை அமைச்சர் அன்பில் மகேஸ் பொய்யாமொழி அறிவுறுத்தினார்.