திமுகவை வீழ்த்த அனைவரும் ஒற்றுமையாக இருக்க வேண்டும்- நயினார் நாகேந்திரன் பேட்டி!

சுதந்திரப் போராட்ட வீரர் வ.உ.சிதம்பரனாரின் 154-வது பிறந்த நாள் விழாவையொட்டி, பாஜக மாநில தலைவர் நயினார் நாகேந்திரன், திருநெல்வேலியில் உள்ள அவரது மணிமண்டபத்தில் உள்ள உருவச் சிலைக்கு மலர் தூவி மரியாதை செலுத்தினார். பின்னர் அவர் செய்தியாளர்களைச் சந்தித்து பல்வேறு கேள்விகளுக்குப் பதிலளித்தார்.

அப்போது அவர் பேசுகையில், தமிழகத்தில் திமுக ஆட்சியை அகற்ற எதிர்க்கட்சிகள் ஒற்றுமையுடன் செயல்பட வேண்டும் என்று வலியுறுத்தினார்.

'திமுக ஆட்சியை நிச்சயம் அகற்ற முடியும்'

அதிமுக முன்னாள் அமைச்சர் செங்கோட்டையன், கட்சியை விட்டுப் பிரிந்து சென்றவர்களை ஒருங்கிணைத்தால் வெற்றி பெற முடியும் என்று கூறியிருந்தது குறித்து செய்தியாளர்கள் கேள்வி எழுப்பினர். இதற்குப் பதிலளித்த நயினார் நாகேந்திரன், "செங்கோட்டையன் அனைவரையும் ஒருங்கிணைக்க முயற்சிப்பது ஒரு நல்ல விஷயம். ஆனாலும், அது அதிமுகவின் உள் கட்சி விவகாரம். அதிமுக குறித்து நான் பேசுவது சரியாக இருக்காது," என்று குறிப்பிட்டார். மேலும், "அரசியலில் யாரும் யாருடைய குரலாகவும் பேச மாட்டார்கள். அவரவர் தங்களது சொந்தக் கருத்தைத்தான் பேசுகிறார்கள். எல்லோரும் ஒற்றுமையாக இருந்தால், திமுக ஆட்சியை நிச்சயம் அகற்ற முடியும்," என்று அவர் திட்டவட்டமாகத் தெரிவித்தார்.

அரசியலில் எதுவும் நிரந்தரம் இல்லை

ஓ. பன்னீர்செல்வம் மற்றும் டி.டி.வி. தினகரன் ஆகியோர் என்டிஏ கூட்டணியில் இருந்து வெளியேறியது குறித்துக் கேட்கப்பட்ட கேள்விக்கு, "அரசியலில் எதுவுமே நிரந்தரம் கிடையாது. இன்னும் ஏழு மாதங்கள் இருக்கின்றன. கடைசி ஒரு மாதத்தில் கூட நிறைய மாற்றங்கள் ஏற்படலாம். ஆட்சி மாற்றம் வரும், ஆட்சி மாற்றம் நடக்கும். நிச்சயமாக நல்லது நடக்கும்," என நயினார் நாகேந்திரன் நம்பிக்கை தெரிவித்தார்.

பாஜகவில் குடும்ப அரசியல் இல்லை

பாஜகவில் குடும்ப அரசியல் நிலவுவதாகவும், அவரது மகன் பாலாஜிக்கு கட்சியில் பொறுப்பு வழங்கப்பட்டது குறித்த கேள்விக்கு, "பாஜகவில் குடும்ப அரசியல் இல்லை. அவரவர்கள் அவர்களுடைய வேலையைப் பார்த்துக் கொண்டிருக்கிறார்கள்," என்று பதிலளித்தார். மேலும், பாஜக முன்னாள் மாநிலத் தலைவர் அண்ணாமலை டெல்லியில் நடைபெற்ற கூட்டத்தில் பங்கேற்காதது குறித்துக் கேட்டபோது, "அதுகுறித்து அவர் கட்சித் தலைமையிடம் முன்பே தெரிவித்துவிட்டார்," என்று விளக்கமளித்தார்.