பிரேக் அப் செய்த காதலி.. விரக்தியில் இன்ஸ்டாகிராமில் 'போஸ்ட்' போட்ட இளைஞர் அடித்து கொலை!

தான் காதலித்த பெண்ணைப் வேறு யாரும் திருமணம் செய்யக்கூடாது என்று இன்ஸ்டாகிராமில் ஒரு செய்தியைப் பதிவிட்ட இளைஞரை, அப்பெண்ணின் குடும்பத்தினர் அடித்துக் கொலை செய்த சம்பவம் அதிர்ச்சியை ஏற்படுத்தியுள்ளது.

சம்பவத்தின் பின்னணி

தெலுங்கானா மாநிலம், ஜக்டியல் மாவட்டத்தை சேர்ந்த எடூருகட்லா சதீஷ் (28) என்ற இளைஞர் ஓட்டுநராகப் பணியாற்றி வந்தார். இவர் அதே பகுதியை சேர்ந்த ஒரு பெண்ணை காதலித்து வந்ததாக கூறப்படுகிறது.

சமீபத்தில், அந்தப் பெண் தன் குடும்பத்தினர் தனக்கு மாப்பிள்ளை தேடுவதால், இனி உறவைத் தொடர விரும்பவில்லை என்று சதீஷிடம் தெரிவித்துள்ளார். இதனால் மனமுடைந்த சதீஷ், அந்தப் பெண்ணின் மீது தனக்கிருக்கும் காதலை வெளிப்படுத்தும் விதமாகவும், வேறு யாரும் அவரைத் திருமணம் செய்யக் கூடாது என்று எச்சரிக்கும் விதமாகவும் ஒரு செய்தியை இன்ஸ்டாகிராமில் பதிவிட்டுள்ளார்.

தாக்குதலும் மரணமும்

சதீஷின் இந்தப் பதிவு அப்பெண்ணின் குடும்ப உறுப்பினர்களுக்கு மிகுந்த கோபத்தை ஏற்படுத்தியுள்ளது. இதையடுத்து, பெண்ணின் குடும்பத்தினர் கடந்த 27 ஆம் தேதி அன்று மாலை சுமார் 7 மணியளவில் சதீஷின் வீட்டிற்குச் சென்று அவரைச் சந்தித்தனர். இதையடுத்து நடந்த வாக்குவாதத்தில், அவர்கள் சதீஷை கம்புகளால் கொடூரமாக தாக்கியுள்ளனர். இதனால் அவர் சம்பவ இடத்திலேயே உயிரிழந்துள்ளார்.

கொலை வழக்கு பதிவு

இச்சம்பவம் குறித்து தகவலறிந்த போலீசார், அப்பெண்ணின் குடும்பத்தினரான நத்தாரி வினாஞ்சி, சாந்தா வினாஞ்சி மற்றும் ஜாலா ஆகிய மூன்று பேர் மீது கொலை வழக்குப் பதிவு செய்துள்ளனர். சதீஷின் உடல் பிரேதப் பரிசோதனைக்காக அனுப்பி வைக்கப்பட்டுள்ளது என்றும், குற்றம் சாட்டப்பட்டவர்களைக் கைது செய்யும் முயற்சி தொடர்ந்து நடைபெற்று வருவதாகவும் காவல்துறை தெரிவித்துள்ளது.