வாக்குத் திருட்டைக் கண்டித்து இளைஞர் காங்கிரஸ் நூதனப் போராட்டம்: பேருந்துகளில் ஸ்டிக்கர் ஒட்டி விழிப்புணர்வு!

ஆலந்தூர் பட்ரோடு பகுதியில், இளைஞர் காங்கிரஸைச் சேர்ந்த 50-க்கும் மேற்பட்ட நிர்வாகிகள் ஒன்றிணைந்து, சாலையில் நடைபயணமாக வந்து போராட்டத்தைத் தொடங்கினர். பேருந்து நிறுத்தத்தில் நின்ற அரசுப் பேருந்துகளில், 'வாக்குத் திருட்டினை' விளக்கும் வகையிலான ஸ்டிக்கர்களை ஒட்டி, பேருந்துகளில் இருந்த பயணிகளுக்கும் பொதுமக்களுக்கும் விழிப்புணர்வு ஏற்படுத்தினர். மேலும், அருகில் இருந்த கடைகள், ஆட்டோக்கள் எனப் பல இடங்களிலும் இந்த ஸ்டிக்கர்கள் ஒட்டப்பட்டன.

போராட்டத்திற்கு முன்னதாக, அதே பகுதியில் உள்ள ஒரு தனியார் மண்டபத்தில் மாவட்ட இளைஞர் காங்கிரஸ் சார்பில் செயற்குழு கூட்டம் நடைபெற்றது. இந்தக் கூட்டத்திற்கு, தேசிய இளைஞர் காங்கிரஸ் செயலாளர் ஜோஷ்வா தலைமை வகித்தார். இதில், பாஜக அரசு மீதும், தேர்தல் ஆணையத்தின் மீதும் வாக்குத் திருட்டைக் கண்டித்து நம்பிக்கை இல்லா தீர்மானம் கொண்டுவரப்பட்டது. இதைத் தொடர்ந்து, வாக்குத் திருட்டைக் கண்டித்து கையெழுத்து இயக்கம் நடத்தப்பட்டு, தீர்மானங்கள் நிறைவேற்றப்பட்டன.

இந்த நிகழ்வுகள், வரும் தேர்தல்களில் வாக்குப்பதிவு செயல்முறையின் நம்பகத்தன்மையை உறுதி செய்ய வேண்டும் என்ற இளைஞர் காங்கிரஸின் கோரிக்கையை வலியுறுத்துவதாக உள்ளன.