சென்னை: தமிழ்நாட்டில் வடகிழக்குப் பருவமழை தொடங்கியதாக சென்னை வானிலை ஆய்வு மையம் அறிவித்திருந்தது. அதற்கு முன்னதாகவே சென்னையில் இரவு நேரங்களில் மழை பெய்து வந்தது. இந்நிலையில், நேற்றிரவு முதல் சென்னை உட்பட அதன் சுற்றுப்புற பகுதிகளில் கனமழை வெளுத்து வாங்கி வருகிறது. இது இன்னும் ஓரிரு தினங்களுக்கு நீடிக்கும் என சென்னை வானிலை ஆய்வு மையம் எச்சரித்துள்ளது. முக்கியமாக அக்.17 அல்லது 18ம் தேதி மழையின் தாக்கம் அதிகம் இருக்கும் என எதிர்பார்க்கப்படுகிறது.

இந்நிலையில், சென்னைக்கு இன்று முதல் ரெட் அலர்ட் விடுத்துள்ளது வானிலை ஆய்வு மையம். முன்னதாக அக்.16ம் தேதி மட்டுமே ரெட் அலர்ட் கொடுக்கப்பட்டிருந்தது, இன்று ஆரஞ்ச் அலர் விடுத்திருந்தது. ஆனால் சென்னையில் தொடர்ந்து மழை பெய்து வருவதால், இன்றும் ரெட் அலர்ட் விடுக்கப்பட்டுள்ளது. இதனிடையே தனியார் வானிலை ஆய்வாளரான பிரதீப் ஜான், சென்னை மழை நிலவரம் குறித்து அப்டேட் கொடுத்துள்ளார். அதில், சென்னையில் அடுத்தச் சுற்று கனமழை சிறிது நேரத்தில் துவங்கும். காலை மழையைப் போலவே மாலையும் தீவிர மழைப் பொழிவு இருக்கும் எனவும், இது ஐந்து மணி வரை நீடிக்கலாம் என்றும் தெரிவித்துள்ளார். இதனால் அலுவலகம் சென்றவர்கள் சீக்கிரம் வீடு திரும்புவது நல்லது என குறிப்பிட்டுள்ளார்.

அதேபோல், சென்னையின் பெரும்பாலான பகுதிகளில் நாளை மிக அதிக கனமழை பெய்யக் கூடும் என எச்சரித்துள்ளார். அதன்படி, 20 செ.மீட்டர் வரை மழை பதிவாக வாய்ப்புள்ளதாக தெரிவித்துள்ளார். இதனால் சென்னையில் மின்சாரம் தடை படலாம் என எதிர்பார்க்கப்படுகிறது. இதனிடையே, நேற்று (அக்.14) பெய்த மழையுடன் கீழைக்காற்று துவங்குகிறது, மேலும் காற்றின் திசை மாறுபடத் தொடங்கிவிட்டதாக வானிலை ஆர்வலர்கள் கருத்துத் தெரிவித்துள்ளனர்.  மேற்கு காற்று முடிந்து கிழக்கு திசைக் காற்றும் மேகமும் நகர்வதாகவும், இது நாளை (அக்.16) மாலை அல்லது இரவுதான் சென்னை அருகே கடற்கரையை நெருங்கும் என கூறியுள்ளனர். இதுவே இந்த மழை சீசனில் உச்சகட்டமாக இருக்கலாம் என சொல்லப்படுகிறது.

அதேபோல், வருகிற மழைப்பொழிவு மிக மிக மெதுவாக நகரும் என்பதால், சென்னை கடற்கரையை நெருங்க கால தாமதம் ஆகலாம் என எதிர்பார்க்கப்படுகிறது. இந்த மழை வலுவிழக்கலாம் என சொல்லப்பட்ட நிலையில், தற்போது அது தீவிரமாக வலுப்பெற்று வருவதாகத் தெரிகிறது. மேலும், வங்கக் கடல் வெப்ப நிலை மழைக்கு சாதகமாக இருப்பதாகவும், இடியும் மின்னலும் மிரட்டினாலும் அவை இயல்பானதாக இருக்கும் என்று கூறியுள்ளனர். முக்கியமாக இந்த வாரத்தில் திங்கள் முதல் வியாழன் வரை எதிர்பார்க்கப்பட்ட மழை, செவ்வாய் முதல் வெள்ளியாக மாறக்கூடும் எனவும் தெரிவித்துள்ளனர். இது டி20 கிரிக்கெட் மாதிரி இல்லாமல், நிலைத்து நின்று நீண்ட டெஸ்ட் மேட்ச் மாதிரி இருக்கும் என சொல்லப்படுகிறது. 
 
அதேநேரம், மழை மேகங்கள் குவிந்திருந்தாலும், ஆபத்தான பகுதியாக அறிவிக்கப்படவில்லை. ஏனெனில், புயல் சின்னமாக கூட வர வாய்ப்பில்லை. அதற்காக மழைப் பொழிவை குறைத்து மதிப்பிட முடியாது. வடக்கு டெல்டா பகுதிகளில் நல்ல மழை இருக்கும். மேலும், வடசென்னை பகுதிகளில் கடும் பாதிப்பிற்கு உள்ளாகக் கூடும் எனவும் கூறியுள்ளனர். இதனால் சென்னையில் இன்று முதல் மேலும் ஓரிரு நாட்களுக்கு மழைப் பொழிவு அதிகம் இருக்கும் என எதிர்பார்க்கப்படுகிறது.