சட்டமன்றத் தேர்தல் 2026: அதிமுக சார்பில் போட்டியிட 10 ஆயிரத்துக்கும் மேற்பட்டோர் விருப்ப மனு!

அடுத்த ஆண்டு தமிழகத்தில் நடைபெற உள்ள சட்டமன்றத் தேர்தலை எதிர்கொள்ளும் விதமாக, அதிமுக சார்பில் வேட்பாளராகப் போட்டியிட விரும்பும் நிர்வாகிகள் விருப்ப மனுக்களைத் தாக்கல் செய்துள்ளனர். இந்தக் கால அவகாசம் முடிவடைந்த நிலையில், மொத்தமாக 10 ஆயிரத்துக்கும் மேற்பட்ட விருப்ப மனுக்கள் பெறப்பட்டுள்ளதாகக் கட்சித் தலைமை அதிகாரப்பூர்வமாக அறிவித்துள்ளது.

மொத்தம் 10,175 விருப்ப மனுக்கள் தாக்கல்

அதிமுக பொதுச் செயலாளர் மற்றும் சட்டமன்ற எதிர்க்கட்சித் தலைவர் எடப்பாடி பழனிசாமி விடுத்த அறிவிப்பிற்கிணங்க, தமிழகம், புதுச்சேரி, மற்றும் கேரள சட்டமன்றத் தேர்தல்களில் போட்டியிட விரும்பும் நிர்வாகிகளிடம் கடந்த டிசம்பர் 15 ஆம் தேதி முதல் விருப்ப மனுக்கள் பெறப்பட்டன. முதலில் டிசம்பர் 23 வரை காலக்கெடு அறிவிக்கப்பட்டு, பின்னர் டிசம்பர் 31, 2025 வரை காலநீட்டிப்பு செய்யப்பட்டது. இந்த நீட்டிப்புக் காலத்திற்குள் ஏராளமானோர் விருப்ப மனுக்களைத் தாக்கல் செய்துள்ளனர்.

அதிமுக தலைமை அலுவலகம் வெளியிட்டுள்ள அறிக்கையின்படி, தமிழ்நாடு, புதுச்சேரி மற்றும் கேரளா உட்பட மொத்தம் 7,988 விருப்ப மனுக்களும், அத்துடன், பொதுச்செயலாளர் எடப்பாடி பழனிசாமி தங்கள் தொகுதிகளில் போட்டியிட வேண்டும் என்று கேட்டுக்கொள்ளும் வகையில் 2,187 விருப்ப மனுக்களும் என, ஆகமொத்தம் 10,175 விருப்ப மனுக்கள் பெறப்பட்டுள்ளன.

எடப்பாடி பழனிசாமி பெயரில் அதிக மனுக்கள்

தங்கள் தொகுதிகளில் எடப்பாடி பழனிசாமியே வேட்பாளராகப் போட்டியிட வேண்டும் என்று கோரி மட்டும் 2,187 விருப்ப மனுக்களை நிர்வாகிகள் தாக்கல் செய்திருப்பது, கட்சியில் அவருக்கு உள்ள செல்வாக்கைப் பிரதிபலிப்பதாக அரசியல் நோக்கர்கள் கருதுகின்றனர்.