'தன்நெஞ்சே தன்னைச் சுடுகிறது'.. விஜய் குறித்து அமைச்சர் துரைமுருகன் விமர்சனம்!

கரூர் துயரச் சம்பவத்தில் பாதிக்கப்பட்டவர்களைத் த.வெ.க. தலைவர் விஜய் நேரில் சென்று பார்க்காமல் காணொலி மூலம் பேசுவது குறித்துப் பேசிய அமைச்சர் துரைமுருகன், "தன்நெஞ்சே தன்னைச் சுடுகிற காரணத்தால்" அவர் வெளியில் வரப் பயப்படுகிறார் என்று விமர்சித்துள்ளார்.

வேலூர் மாவட்டம் குடியாத்தம் அருகே, தமிழக - ஆந்திர எல்லையோரம் அமைந்துள்ள மோர்தனா அணையை இன்று நேரில் பார்வையிட்டு ஆய்வு செய்த பிறகு அவர் செய்தியாளர்களைச் சந்தித்தார்.

விஜய் குறித்த விமர்சனம்

கரூர் கூட்ட நெரிசலில் பாதிக்கப்பட்ட குடும்ப உறுப்பினர்களுடன் த.வெ.க. தலைவர் விஜய் காணொலி மூலம் பேசி ஆறுதல் கூறுவதாகச் செய்தியாளர்கள் கேள்வி எழுப்பினர். அதற்குப் பதிலளித்த அமைச்சர் துரைமுருகன், "குற்றம் புரியவில்லை என்றால், தைரியமாக அவருடைய தொண்டர்களின் வீடுகளுக்குச் சென்று ஆறுதல் சொல்லி இருக்க முடியும்.

தன்நெஞ்சே தன்னைச் சுடுகிற காரணத்தால் வெளியில் வரப் பயம். எனவேதான் விஜய் நேரடியாகச் சென்று பார்க்க முடியாமல் காணொலி மூலம் பேசி வருகிறார்" என்று அவர் கடுமையாக விமர்சித்தார்.

மோர்தனா அணை

மேலும், இரண்டு ஆண்டுகளுக்குப் பிறகு தற்போது மோர்தனா அணை முழுவதுமாக நிரம்பி, தனது முழு கொள்ளளவை எட்டியுள்ளது குறித்து அமைச்சர் மகிழ்ச்சி தெரிவித்தார். மோர்தனா அணை 11.5 மீட்டர் உயரம் மற்றும் 263 மில்லியன் கன அடி கொள்ளளவு கொண்டது. தற்போது அணையில் இருந்து 460 கன அடி தண்ணீர் வெளியேறி வருகிறது.

மோர்தனா அணைப் பகுதியை ஒரு சுற்றுலாத் தலமாக மாற்ற நடவடிக்கை எடுக்கப்படும் என்று அமைச்சர் அறிவித்தார். இதனால், அந்தப் பகுதியில் கூடுதலானப் போக்குவரத்து வசதி செய்ய நடவடிக்கை எடுக்கப்படும் என்றும் அவர் உறுதி அளித்தார். மேலும், மோர்தனா பகுதியில் குற்றச் சம்பவங்களைத் தடுக்க ஒரு காவல் நிலையம் அமைக்கவும் நடவடிக்கை எடுக்கப்படும் என்றும் அவர் கூறினார்.

கச்சத்தீவு குறித்து பா.ஜ.க. மாநிலத் தலைவர் நயினார் நாகேந்திரன் தெரிவித்த கருத்து குறித்துக் கேட்டதற்கு, துரைமுருகன் சிரித்துக் கொண்டே, "அவருக்கு ஒன்றும் தெரியாது, யாரோ எழுதிக் கொடுத்து இவர் பேசி வருகிறார்" என்று பதிலளித்தார்.