கூட்டணி குறித்து பேசினால் கடும் நடவடிக்கை.. காங்கிரஸ் நிர்வாகிகளுக்கு செல்வப்பெருந்தகை எச்சரிக்கை!

காங்கிரஸ் மூத்த தலைவர் டி.எம். காளியண்ணா கவுண்டரின் 105வது பிறந்த நாளையொட்டி, சத்தியமூர்த்தி பவனில் அவரது படத்திற்கு மலர் தூவி மரியாதை செலுத்திய தமிழ்நாடு காங்கிரஸ் கமிட்டித் தலைவர் செல்வப்பெருந்தகை, பின்னர் செய்தியாளர்களைச் சந்தித்தார். அப்போது அவர், பா.ஜ.க.வின் அரசியல் தலையீடு மற்றும் கூட்டணிப் பேச்சுவார்த்தை குறித்துக் கருத்து தெரிவித்தார்.

தணிக்கை வாரியத்தைக் கைப்பற்றும் பா.ஜ.க.

மத்திய அரசின் புலனாய்வு அமைப்புகள் தவறாகப் பயன்படுத்தப்படுவது குறித்துக் குற்றஞ்சாட்டிய செல்வப்பெருந்தகை, "சி.பி.ஐ, அமலாக்கத்துறை, வருமான வரித்துறை போன்ற அமைப்புகளைத் தொடர்ந்து, பா.ஜ.க. தற்போது திரைப்பட தணிக்கை வாரியத்தையும் (சென்சார் போர்டு) தனது ஆயுதமாகப் பயன்படுத்துகிறது" என்று குற்றம் சாட்டினார். இதன் மூலம் நடிகர் விஜய்யின் 'ஜனநாயகன்' திரைப்படத்துக்குச் சான்றிதழ் கிடைக்காத விவகாரத்தில் மத்திய அரசுக்கு மறைமுகத் தொடர்பு இருப்பதாக அவர் சுட்டிக்காட்டினார்.

பொதுவெளியில் பேசினால் கடும் நடவடிக்கை

தி.மு.க.வுடனான தொகுதிப் பங்கீடு மற்றும் கூட்டணிப் பேச்சுவார்த்தை குறித்துப் பேசிய செல்வப்பெருந்தகை, அகில இந்திய காங்கிரஸ் தலைமை ஒரு குழுவை அமைத்துள்ளதாகவும், பேச்சுவார்த்தை சுமூகமாக நடைபெற்று வருவதாகவும் தெரிவித்தார். மேலும், "காங்கிரஸ் கட்சி ஒருபோதும் கொல்லைப்புற அரசியல் செய்வதில்லை, தரகர் வேலையும் பார்ப்பதில்லை. இந்தியா கூட்டணி மிகவும் வலிமையாக உள்ளது," என்றும் அவர் உறுதிபடத் தெரிவித்தார்.

இந்தச் சூழலில், கூட்டணி அல்லது தொகுதிகள் குறித்துப் பொதுவெளியில் பேசினால் அது பேச்சுவார்த்தையைச் சீர்குலைக்கும் என்று எச்சரித்த அவர், குறிப்பாகச் கூட்டணி குறித்துப் பேசி குழப்பம் விளைவிப்போர் மீது கடுமையான ஒழுங்கு நடவடிக்கை எடுக்கப்படும் என்றும் காங்கிரஸ் நிர்வாகிகளுக்கு எச்சரிக்கை விடுத்தார்.