நாளை திமுக மாவட்டச் செயலாளர்கள் கூட்டம்.. வரைவு வாக்காளர் பட்டியல் குறித்து ஆலோசனை!

தி.மு.க. மாவட்டக் செயலாளர்கள் கூட்டம், அக்கட்சியின் தலைவர் மற்றும் தமிழக முதல்வர் ஸ்டாலின் தலைமையில் நாளை (டிசம்பர் 21) மாலை 6.00 மணிக்கு நடைபெற உள்ளது. இந்தக் கூட்டம், வரவிருக்கும் வரைவு வாக்காளர் பட்டியலைச் சரிபார்ப்பது குறித்து ஆலோசனைகளை மேற்கொள்ளும் நோக்கில் கூட்டப்பட்டுள்ளது.

துரைமுருகன் அறிவிப்பு

இதுதொடர்பாக, தி.மு.க. பொதுச்செயலாளர் துரைமுருகன் வெளியிட்டுள்ள செய்திக்குறிப்பில், "திமுக தலைவர் மு.க.ஸ்டாலின் தலைமையில் தி.மு.க. மாவட்டக் கழகச் செயலாளர்கள் கூட்டம் 21-12-2025 ஞாயிற்றுக்கிழமை மாலை 6.00 மணி அளவில், காணொலி காட்சி வாயிலாக நடைபெறும். இந்தக் கூட்டத்தின் முக்கியப் பொருள், நேற்று வெளியிடப்பட்ட வரைவு வாக்காளர் பட்டியல் (Draft Electoral Rolls - SIR 2026) சரிபார்ப்பு குறித்து ஆலோசிப்பதாகும்" என்று தெரிவிக்கப்பட்டுள்ளது.

யாருக்கெல்லாம் அழைப்பு?

இந்த முக்கியக் கூட்டத்தில், அனைத்து மாவட்டக் செயலாளர்கள், நாடாளுமன்ற மற்றும் சட்டமன்ற உறுப்பினர்கள், மற்றும் தொகுதிப் பார்வையாளர்கள் ஆகியோர் தவறாமல் கலந்துகொள்ளுமாறு கேட்டுக்கொள்ளப்பட்டுள்ளனர்.

தேர்தல் கள ஆய்வுக்கான ஆயத்தம்

இந்தியத் தேர்தல் ஆணையத்தால் நேற்று வெளியிடப்பட்ட வரைவு வாக்காளர் பட்டியலில், தமிழகத்தில் இருந்து சுமார் 97 லட்சத்துக்கும் அதிகமான வாக்காளர்கள் நீக்கப்பட்டுள்ளனர். குறிப்பாக, சென்னையில் மட்டும் 14 லட்சத்துக்கும் மேற்பட்ட வாக்காளர்கள் நீக்கப்பட்டுள்ளனர். இந்த நீக்கங்கள், தி.மு.க.வுக்குச் சாதகமான வாக்குகளைப் பாதித்திருக்கலாம் என்று கட்சி வட்டாரங்கள் தெரிவிக்கின்றன.

எனவே, இந்தக் கூட்டத்தின் மூலம், நீக்கப்பட்ட வாக்காளர்களின் விவரங்களைச் சரிபார்த்தல், பட்டியலில் புதிதாகச் சேர்ப்பதற்கான படிவம் 6 மற்றும் திருத்தங்களுக்கான படிவம் 8 விண்ணப்பங்கள் முறையாகப் பெறப்படுகின்றனவா என்பதை உறுதிசெய்தல், அத்துடன் கட்சியினர் மேற்கொள்ள வேண்டிய களப் பணிகள் குறித்து முதல்வர் ஸ்டாலின் முக்கிய ஆலோசனை வழங்குவார் என்று எதிர்பார்க்கப்படுகிறது.