கூட்டணியா ? தனித்து போட்டியா? தைலாபுரத்தில் ராமதாஸ் அவசர ஆலோசனை!

பாமக நிறுவனர் ராமதாஸ் மற்றும் அவரது மகன் அன்புமணி ராமதாஸ் இடையே கடந்த சில காலமாகவே கடுமையான கருத்து வேறுபாடுகள் நிலவி வருகின்றன. இதன் காரணமாகக் கட்சி தற்போது இரண்டு அணிகளாகப் பிரிந்து செயல்படும் சூழல் உருவாகியுள்ளது. தற்போதைய சூழலில், அன்புமணி ராமதாஸ் தரப்பு அதிமுக - பாஜக கூட்டணியுடன் நெருக்கம் காட்டி வருகிறது. அவர் அண்மையில் அதிமுக ஆதரவுடன் மாநிலங்களவை (Rajya Sabha) எம்.பி.யாகத் தேர்வு செய்யப்பட்டுள்ளார்.

ராமதாஸின் கூட்டணித் திணறல்

மறுபுறம், ராமதாஸ் தனது அடுத்தகட்ட அரசியல் நகர்வு குறித்து இன்னும் இறுதி முடிவு எடுக்க முடியாமல் திணறி வருகிறார். சில நாட்களுக்கு முன், புதிதாகக் கட்சித் தொடங்கியுள்ள சசிகலா தைலாபுரம் தோட்டத்திற்குச் சென்று ராமதாஸைச் சந்தித்துப் பேசினார். இதனால் ராமதாஸ், சசிகலாவுடன் இணைந்து ஒரு புதிய கூட்டணியை அமைக்கலாம் என்ற எதிர்பார்ப்பு நிலவுகிறது. இருப்பினும், திமுக மற்றும் அதிமுக ஆகிய இரு அணிகளுமே ராமதாஸ் தரப்பிற்குச் சாதகமான சமிக்ஞைகளை வழங்காதது அவருக்குப் பின்னடைவாகக் கருதப்படுகிறது.

சின்னம் தொடர்பான சட்டப் போராட்டம்

கட்சியின் பெயர், கொடி மற்றும் 'மாம்பழம்' சின்னத்தைப் பயன்படுத்துவது தொடர்பாகத் தந்தைக்கும் மகனுக்கும் இடையே சென்னை உயர்நீதிமன்றத்தில் வழக்கு நிலுவையில் உள்ளது. இந்த வழக்கை விசாரித்த நீதிமன்றம், தேர்தல் அறிவிக்கப்பட்டுள்ள நிலையில் உட்கட்சி விவகாரங்களில் தலையிட முடியாது எனக் கூறி, விசாரணையை மே 10-ஆம் தேதிக்கு ஒத்திவைத்துள்ளது. சின்னம் தொடர்பான இந்த இழுபறி ராமதாஸ் தரப்பிற்குப் பெரும் நெருக்கடியை ஏற்படுத்தியுள்ளது.

தைலாபுரத்தில் முக்கியக் கூட்டம்

இந்த இக்கட்டான நிலையில், திண்டிவனம் தைலாபுரம் தோட்டத்தில் இன்று ராமதாஸ் தலைமையில் பாமக (ராமதாஸ் அணி) நிர்வாகக் குழுக் கூட்டம் நடைபெற்றது. இந்த கூட்டத்தில் சட்டமன்ற தேர்தலில் கூட்டணி அமைத்து போட்டியிடுவதா அல்லது தனித்து போட்டியிடுவதா என்பது ராமதாஸ் நிர்வாகிகளுடன் ஆலோசித்து வருகிறார். கூட்டத்தின் முடிவில் பல்வேறு முக்கிய முடிவுகள் எடுக்கப்படும் என தெரிகிறது.