தமிழகத்தில் 2026-ஆம் ஆண்டு சட்டமன்ற தேர்தல் நடைபெற உள்ள நிலையில் தேர்தலுக்கான பணிகளில் திமுக, அதிமுக, பாஜக, தவெக உள்ளிட்ட பல்வேறு கட்சிகள் மும்முரமாக ஈடுபட்டு வருகிறது. இந்நிலையில், அதிமுக பொதுச்செயலாளர் எடப்பாடி பழனிசாமி உத்தரவின் பேரில்  மதுரை புறநகர் மேற்கு மாவட்ட கழகத்தின் சார்பில் மதுரை மாவட்டம் திருமங்கலம் ஊராட்சி ஒன்றியத்துக்கு உட்பட்ட விருசங்குளம், விடத்தக்குளம், மைக்குடி, கீழக்கோட்டை, நடுகோட்டை, வடகரை, மேலக்கோட்டை உள்ளிட்ட பத்துக்கு மேற்பட்ட கிராமங்களில் புதிய வாக்குச்சாவடி முகவர்கள் தேர்ந்தெடுப்பதற்கான ஆலோசனைக் கூட்டம் சட்டமன்ற எதிர்க்கட்சித் துணைத் தலைவர் ஆர்.பி.உதயகுமார் தலைமையில் நடைபெற்றது.

கூட்டத்தில் முன்னாள் அமைச்சர் ஆர்.பி.உதயகுமார் பேசியதாவது,  100 நாள் வேலை திட்டத்தை 150 நாளாகவும், ஊதியத்தை உயர்த்துவதாகவும் சொன்னார்கள். மாட்டுத்தாவணியில் உள்ள நக்கீரன் நுழைவு வாயிலை பாதுகாப்பில்லாத முறையில் அகற்றியதால் கள்ளிக்குடியைச் சேர்ந்த ஜே சி பி ஆபரேட்டர் உயிரிழந்தார். இந்த அரசுக்கு மக்கள் மீது அக்கறையே இல்லை தனது பிள்ளை மற்றும் குடும்பத்திற்கு ஆட்சி அதிகாரம் வேண்டும் என்பதுதான் அவர் நோக்கமாக உள்ளது. 

மக்களுக்கு 100 நாள் வேலையில் சம்பளம் வரவில்லை. 150 நாள் ஆகும் என்று சொன்னீர்களே முதல்வரே ஏன் செய்யவில்லை. எதிர்க்கட்சித் தலைவர் அறிக்கை கொடுத்தாலும் அதற்கு முதல்வர் பதில் சொல்லவில்லை. பெண் பிள்ளைகளுக்கு பாதுகாப்பே இல்லை.  ஸ்காட்லாந்து யார்டுக்கு நிகரான காவல்துறை தமிழ்நாடு காவல்துறை என பெயர் பெற்ற தமிழக காவல்துறையை சுதந்திரமாக செயல்பட விடுங்கள் அவர்கள் நாளை காலை அனைத்து குற்றவாளியும் கொண்டு வந்து நிறுத்துவார்கள். அவர்களால் முடியும். 

எங்கள் ஆட்சியின் போது தவறு செய்தது ஆண்டவராக இருந்தாலும் நடவடிக்கை எடுக்க சொல்லி இருக்கிறோம். ஆனால், இப்போது அப்படி இல்லை. திமுக கொடி கட்டி போய் கற்பழிக்கின்ற கொடுமையை நம் நாட்டில் பார்க்கிறோம். இந்த மாதிரி சூழ்நிலைக்கு மாற்றம் வேண்டும். நம்மை விலை கொடுத்து வாங்கி விடலாம் என்று நினைக்கிறார்கள். ஆனால் தமிழக வாக்காளர்கள் தக்க நேரத்தில் பாடத்தை புகட்டுவார்கள் என கூறினார்.