விலைவாசி உயர்வால் மக்கள் தவிப்பு: ரீல்ஸ் பார்த்தால் வயிறு நிறையுமா? மு.க.ஸ்டாலின் தாக்கு!

தாராபுரம் சட்டமன்ற இடைத்தேர்தல் பிரசாரத்திற்காகச் சென்றிருந்த திமுக தலைவர் மு.க.ஸ்டாலின், அங்குள்ள ஒரு பலசரக்குக் கடைக்கு நேரில் சென்று அத்தியாவசியப் பொருட்களின் விலைவாசி உயர்வு குறித்து மக்களிடமும் கடைக்காரரிடமும் கேட்டறிந்தார். மேலும், விலைவாசி ஏற்றத்தால் மக்களுக்கு ஏற்படும் பாதிப்புகள் குறித்தும் அவர் கலந்துரையாடினார்.

இதுதொடர்பான வீடியோவை வெளியிட்ட அவர், தனது 'எக்ஸ்' பக்கத்தில் தவெக ஆட்சியைக் கடுமையாக விமர்சித்துப் பதிவிட்டுள்ளார்.

"MLA Shopping-இல் மும்முரமாக இருக்கும் முதலமைச்சருக்கு, மக்கள் மளிகைக் கடையில் கூட shopping செய்ய முடியாமல் கஷ்டத்தில் தவிப்பது தெரியுமா?

தாராபுரத்தில் பரப்புரைக்கு இடையே மளிகைக் கடை ஒன்றில் விலைவாசி உயர்வு குறித்து கேட்டேன். 4 மாதம் முன்பிருந்த விலையில் இருந்து அத்தியாவசியப் பொருட்களின் விலை பெருமளவுக்கு உயர்ந்துள்ளது.

அன்றாடச் சமையலுக்கே வீடுகள் விழிபிதுங்கி நிற்கின்றன. ரீல்ஸ் பார்த்தால் மக்களின் வயிறு நிறையுமா? இந்தியா முழுவதும் பொருளாதார வளர்ச்சி இறங்குமுகத்தில் இருந்தபோது கூட, திமுக ஆட்சியில் தமிழ்நாடு ஏறுமுகத்தில் இருந்தது.

ஆனால் இன்றைய நிலை என்ன? இந்தியா முழுவதும் GST வருவாய் உயர்ந்த நிலையில் கூட, கடந்த மூன்று மாதங்களாகத் தமிழ்நாடு சரிவைச் சந்தித்து வருகிறது.

இந்த ஆட்சி வேலைக்கு ஆகாத Waste ஆட்சி என முடிவெடுத்து, தமிழ்நாடு அரசின் முதலீட்டு ஊக்குவிப்பு முகமையான Guidance TN-இல் இருந்தும் அனுபவமிக்க வல்லுநர்கள் வேறு மாநிலங்களுக்குச் செல்வதாகச் செய்திகள் வருகின்றன.

பொருளாதாரம், விலைவாசி, மின்சாரம், தொழில்துறை, சட்டம் ஒழுங்கு, மருத்துவம், பால்வளம் என எல்லாவற்றிலும் தமிழ்நாடு வீழ்ச்சியை நோக்கி வேகமாகச் சென்றுகொண்டிருக்கிறது.

இவற்றில் கவனம் செலுத்தாமல், விளக்குமாத்துக்குப் பட்டுக் குஞ்சம் என்பது போல எல்லாவற்றிலும் 'வெற்றி' என Sticker ஒட்டினால் போதும் என நினைக்கும் அரசிடம் மாட்டிக்கொண்டு மக்கள் தவிக்கின்றனர்" என்று தெரிவித்துள்ளார்.