கஞ்சா வைத்திருந்ததாக பாஜக நிர்வாகியின் மகன் கைது.. போலீசார் தீவிர விசாரணை!

சென்னை திருமங்கலம், பாடி குப்பம் சாலையில் காரில் கஞ்சா வைத்திருந்ததாகக் கூறி, பா.ஜ.க.வின் சிறுபான்மை அணி தேசியச் செயலாளர் வேலூர் இப்ராஹிம் மகன் உட்பட இரண்டு பேரை இன்று அதிகாலையில் போலீசார் கைது செய்து விசாரணை நடத்தி வருகின்றனர்.

சம்பவமும் கஞ்சா பறிமுதலும்

திருமங்கலம் பாடி குப்பம் சாலையில் இன்று அதிகாலையில் போலீசார் ரோந்து பணியில் ஈடுபட்டிருந்தபோது, சந்தேகத்திற்கு இடமாக நின்று கொண்டிருந்த கார் ஒன்றைச் சோதனை செய்தனர். காரில் இருந்த மூன்று நபர்களில் ஒருவர் தப்பி ஓடிவிட்டார். மற்ற இருவரையும் பிடித்துப் போலீசார் விசாரணை நடத்தினர்.

காரைச் சோதனை செய்தபோது, அதனுள் 3 பாக்கெட்டுகளில் 50 கிராம் கஞ்சா, புகைப்பதற்கான பேப்பர்கள், பைப் மற்றும் கூல் லிப் போதைப்பொருள் ஆகியவை கண்டெடுக்கப்பட்டன. இதையடுத்து, அந்த இருவரையும் போலீசார் கைது செய்து காவல் நிலையத்திற்குக் கொண்டு சென்று விசாரணை நடத்தினர்.

விசாரணையில் வெளியான தகவல்

போலீசாரின் விசாரணையில், கைதானவர்கள் செங்குன்றத்தைச் சேர்ந்த கல்லூரி மாணவரான அப்துல் ரகுமான் மற்றும் கார் ஓட்டுனர் ரஷீத் என்பது தெரிய வந்தது. இதில் மாணவர் அப்துல் ரகுமானின் தந்தை, பா.ஜ.க.வின் சிறுபான்மை அணி தேசியச் செயலாளர் வேலூர் இப்ராஹிம் என்பதும் தெரிய வந்தது.

விசாரணையின்போது, அப்துல் ரகுமான், "அண்ணா சாலையில் உள்ள ஹோட்டலில் சாப்பிட்டு விட்டு, அடையாளம் தெரியாத நபர் ஒருவருக்கு லிப்ட் கொடுத்தோம். அந்த நபர்தான் கஞ்சாவை வைத்திருந்தார்" என்று கூறியதாகத் தெரிகிறது. எனினும், அவர் அளிக்கும் தகவலில் உண்மை இல்லை எனப் போலீசார் தரப்பில் கூறப்பட்டுள்ளது.