தேனி நாடாளுமன்ற உறுப்பினர் தங்க தமிழ்ச்செல்வன் எம்பி சோழவந்தான் தொகுதிக்குட்பட்ட அலங்காநல்லூர் பாலமேடு பகுதிகளில் தனக்கு வாக்களித்த வாக்காளர்களுக்கு நன்றி தெரிவித்து சுற்றுப்பயணம் மேற்கொண்டு வருகிறார். அலங்காநல்லூர் அருகே முடுவார்பட்டி பகுதியில் செய்தியாளர்களை சந்தித்தபோது பேசிய அவர், “விலைவாசி உயர்வு, மின் கட்டண உயர்வு, சொத்து வரி உயர்வு தமிழகத்தில் இல்லை. தமிழகத்திற்கு வேண்டிய திட்டங்களை முதல்வர் ஸ்டாலின் சிறப்பாக செய்து கொண்டிருக்கிறார். சென்ற நாடாளுமன்றத் தேர்தலில் தமிழக முதல்வரின் மக்கள் நலத்திட்டங்களுக்காக தமிழகம் மற்றும் புதுச்சேரி உட்பட 40 தொகுதிகளிலும் திமுக கூட்டணிக்கு அமோக வெற்றியை தேடித் தந்துள்ளனர். 

சொத்து வரி உயர்வு குறித்து தவறான தகவல்களை பொதுமக்களிடம் சொல்லி அதிமுகவினர் போராட்டம் நடத்துகின்றனர். இது தவறு. விலை உயர்வு தமிழ்நாட்டில் இல்லை என்பது எங்களுடைய நிலைமை. அடிச்சு சொல்றேன். 60% மக்களுக்கு எந்த பாதிப்பும் இல்லை. என் மீது வழக்கு போட்டால் சந்திக்க தயார். அதிமுக வழக்கு போட்டால் சந்திக்க தயார். 100%அடித்து சொல்வேன் சில திருத்தங்கள் செய்து தமிழ்நாடு அரசு மக்களுக்கு வேண்டிய திட்டங்களை கொடுக்கிறது. இதை ஒத்துக் கொள்ள முடியாமல் அதிமுக தவறான பொய் பிரச்சாரத்தை செய்கிறது.

இதையடுத்து ஹரியானாவில் பாஜக வெற்றி பெற்றது குறித்த கேள்விக்கு பதிலளித்த அவர், “ஹரியானா ஜம்மு காஷ்மீர் ஆகிய இரண்டு தேர்தலிலும் காங்கிரஸ்தான் ஜெயிச்சது. இன்னைக்கு  ஹரியானாவில் பிஜேபியும் ஜம்மு அண்ட் காஷ்மீரில் காங்கிரஸும் ஜெயிச்சிருக்கு. இருந்தாலும் 13% கூடுதலாக வாக்குகள் காங்கிரஸ் வாங்கி உள்ளார்கள் என்பது பாராட்டக்கூடிய விஷயம். அடுத்து சட்டமன்றம், நாடாளுமன்றம் என எந்த தேர்தல் வந்தாலும் காங்கிரஸ் தான் ஜெயிக்கும்” என்றார். தொடர்ந்து பேசிய அவர், “யார் கட்சி ஆரம்பித்தாலும் திமுகவிற்கு எந்த பாதிப்பும் வராது. எங்க லைன் வேற அவங்க லைன் வேற. 

வலுவான கூட்டணி அமைத்து மக்களுக்கான திட்டங்கள் கொடுத்து இந்தியாவிலேயே தமிழகம் சிறந்த மாநிலம் என பெயர் வாங்கியது. அதற்கு காரணம் தளபதி செய்த சாதனை. மக்களை தேடி மருத்துவம், இல்லம் தேடி கல்வி என ஏராளமான திட்டங்களை தமிழகத்திற்கு கொடுத்துள்ளார் முதல்வர் ஸ்டாலின்” என தவெக தலைவர் விஜய் குறித்து பேசினார். மேலும், “தடுக்கி விழுந்து செத்தாலும் கூட திமுக தான் காரணம் என்று சொல்வார்கள் போல. விமான சாகச நிகழச்சியில் தண்ணீர் உள்ளிட்ட அடிப்படை வசதிகள் செய்து கொடுத்திருக்கு தமிழக அரசு. அதில் சில இடர்பாடுகள் நடந்து இருக்கு. இனிமே அப்படி நடக்காது என தமிழக அரசு சொல்லி இருக்கு” என்றார்.