தமிழகத்தில் அதிமுக தலைமையிலான 10 ஆண்டுகள் ஆட்சியை வீழ்த்தி கடந்த 2021-ஆம் ஆண்டு திமுக ஆட்சி அமைத்தது. 2021-ஆம் ஆண்டு சட்டசபைத் தேர்தலின் போது திமுக கொடுத்த வாக்குறுதிகளான மகளிருக்கு விலையில்லா பேருந்து பயணம், மகளிருக்கு ஆயிரம் ரூபாய் உரிமைத் தொகை, கூட்டுறவு வங்கியில் நகைக்கடன் தள்ளுபடி, முதியோர் உதவித்தொகை அதிகரிப்பு உள்ளிட்ட பல்வேறு திட்டங்களை திமுக செயல்படுத்தி உள்ளது.

ஆளும் கட்சியான திமுக அரசு, ஆட்சி பொறுபேற்று மூன்று முறை முழுமையான பட்ஜெட்டை தாக்கல் செய்துள்ளது. தமிழ்நாட்டில் 2026-ஆம் ஆண்டு சட்டசபைத் தேர்தல் நடைபெற உள்ளதால்  திமுக அரசு தனது கடைசி முழுமையான பட்ஜெட்டை மார்ச் மாதம் 14-ஆம் தேதி தாக்கல் செய்ய உள்ளது. இந்த பட்ஜெட்டை நிதி அமைச்சர் தங்கம் தென்னரசு தாக்கல் செய்வார் என்று தெரிவிக்கப்பட்டுள்ளது. 

மேலும், மார்ச் 15-ஆம் தேதி வேளாண் பட்ஜெட் தாக்கல் செய்யப்பட உள்ளது. இதனை வேளாண் துறை அமைச்சர் எம்.ஆர்.கே. பன்னீர் செல்வம் தாக்கல் செய்வார் என்றும் தெரிவிக்கப்பட்டுள்ளது. அடுத்த ஆண்டு சட்டசபைத் தேர்தல் நடைபெற உள்ளதால் திமுகவால் இடைக்கால பட்ஜெட் தான் தாக்கல் செய்ய முடியும். அதனால், இதுவே திமுகவின் கடைசி முழுமையான பட்ஜெட் ஆகும். 

இந்த ஆண்டு தமிழக சட்டசபையில் தமிழ்நாடு அரசு தாக்கல் செய்ய இருக்கும் பட்ஜெட்டில் நிறைவேற்றப்படாத வாக்குறுதிகள் மற்றும் வாக்காளர்களை கவரும் விதமாக புதிய சலுகைகள் அறிவிக்க வாய்ப்புள்ளதாக எதிர்பார்க்கப்படுகிறது.

இந்நிலையில், சென்னை தலைமைச் செயலகம் நாமக்கல் கவிஞர் மாளிகை கூட்ட அரங்கத்தில் தமிழ்நாடு அரசின் 2025- 26 ஆம் ஆண்டுக்கான வேளாண்மை நிதிநிலை அறிக்கை தயாரித்தல் தொடர்பான விவசாய சங்க பிரதிநிதிகள் மற்றும் வல்லுநர்கள் கருத்துக்கேட்பு கூட்டம்  நடைபெற்றது.

வேளாண்மை மற்றும் உழவர் நலத்துறை அமைச்சர் எம்.ஆர்.கே பன்னீர்செல்வம் தலைமையில் நடைபெற்ற இந்த கூட்டத்தில், நிதி துறை அமைச்சர் தங்கம் தென்னரசு, பால்வளத்துறை அமைச்சர் ராஜகண்ணப்பன், மீனவர் நலன் மற்றும் கால்நடை பராமரிப்புத்துறை அமைச்சர் அனிதா ராதாகிருஷ்ணன், உணவு மற்றும் உணவு பொருள் வழங்கல் துறை அமைச்சர் சக்ரபாணி உட்பட துறை சார்ந்த செயலாளர்கள் மற்றும் அதிகாரிகள் ஆகியோர் கலந்து கொண்டு  விவசாய சங்க பிரதிநிதிகள் மற்றும் வல்லுநர்களின்  கருத்துக்களை கேட்டறிந்தனர்.