கரூர் கூட்ட நெரிசல் வழக்கு: சிபிஐ முன் ஆஜராகிறார் செந்தில் பாலாஜி!

கடந்த ஆண்டு செப்டம்பர் 27-ஆம் தேதி கரூரில் தவெக தலைவர் விஜய் பங்கேற்ற கூட்டத்தில் ஏற்பட்ட நெரிசலில் 41 பேர் உயிரிழந்தனர். இந்தச் சோகமான சம்பவம் குறித்து சிபிஐ அதிகாரிகள் தீவிர விசாரணை நடத்தி வருகின்றனர். ஏற்கனவே தவெக நிர்வாகிகள் மற்றும் அக்கட்சியின் தலைவர் விஜய் ஆகியோரிடம் விசாரணை நடத்தப்பட்டுள்ள நிலையில், தற்போது முன்னாள் அமைச்சர் செந்தில் பாலாஜிக்கும் சம்மன் அனுப்பப்பட்டுள்ளது.

விஜய்யின் கோரிக்கையும் சிபிஐ-யின் விலக்கும்

இந்த வழக்கு தொடர்பாக இன்று டெல்லி சிபிஐ அலுவலகத்தில் ஆஜராக விஜய்க்கு ஏற்கனவே சம்மன் அனுப்பப்பட்டிருந்தது. ஆனால், இன்றைய தினம் தம்மால் ஆஜராக இயலாது என்றும், 10 நாட்களுக்குப் பிறகு டெல்லிக்குப் பதிலாகச் சென்னையில் விசாரணை நடத்தினால் ஒத்துழைக்கத் தயாராக இருப்பதாகவும் விஜய் தரப்பில் தெரிவிக்கப்பட்டது. இதனை ஏற்றுக்கொண்ட சிபிஐ, இன்று அவர் ஆஜராவதிலிருந்து தற்காலிக விலக்கு அளித்துள்ளது.

செந்தில் பாலாஜியின் விளக்கம்

இதற்கிடையே, இவ்வழக்கு தொடர்பாகத் தனக்குச் சம்மன் அனுப்பப்பட்டது குறித்துச் சமூக வலைதளங்களில் வெளியாகும் செய்திகளுக்கு விளக்கம் அளித்துள்ள முன்னாள் அமைச்சர் செந்தில் பாலாஜி, சிபிஐ-யின் அழைப்பை உறுதி செய்துள்ளார். இது குறித்துத் தனது 'எக்ஸ்' தளத்தில் பதிவிட்டுள்ள அவர், "மார்ச் 17-ஆம் தேதி நேரில் வந்து விளக்கமளிக்குமாறு சிபிஐ அனுப்பிய சம்மனின் அடிப்படையில், நேரில் சென்று உரிய விளக்கங்களை அளிக்கவுள்ளேன்" என்று தெரிவித்துள்ளார்.

அரசியல் களத்தில் நிலவும் எதிர்பார்ப்பு

கரூர் மாவட்டத்தைச் சேர்ந்த முக்கிய அரசியல் பிரமுகர் என்ற அடிப்படையில் செந்தில் பாலாஜியிடம் விசாரணை நடத்தப்படவுள்ளது அரசியல் வட்டாரத்தில் கவனத்தை ஈர்த்துள்ளது. 41 உயிர்கள் பலியான இந்த வழக்கில், ஏற்கனவே ஆளுங்கட்சி மற்றும் எதிர்க்கட்சித் தலைவர்கள் ஒருவரை ஒருவர் குற்றம் சாட்டி வந்த நிலையில், சிபிஐ-யின் இந்த அடுத்தகட்ட நடவடிக்கை வழக்கின் போக்கை மாற்றக்கூடும் என எதிர்பார்க்கப்படுகிறது.