'இளைய தலைமுறையைச் சீரழிக்கிறது'.. பிக்பாஸ் நிகழ்ச்சியைத் தடை செய்ய வேல்முருகன் வலியுறுத்தல்!

பிரபல தனியார் தொலைக்காட்சியான விஜய் டிவியில் ஒளிபரப்பாகி வரும் 'பிக்பாஸ்' நிகழ்ச்சியைத் தமிழக அரசு தடை செய்ய வேண்டும் என்று தமிழக வாழ்வுரிமைக் கட்சி தலைவர் வேல்முருகன் வலியுறுத்தியுள்ளார்.

சென்னை தலைமைச் செயலகத்தில் இன்று செய்தியாளர்களைச் சந்தித்த வேல்முருகன், இந்த நிகழ்ச்சியால் இளைய தலைமுறை சீரழிக்கப்படுவதாகக் குற்றம் சாட்டினார்.

வேல்முருகன் குற்றச்சாட்டு

"விஜய் டிவி 'நீயா நானா' உட்படப் பல்வேறு நல்ல நிகழ்ச்சிகளை நடத்தி வருவதற்குப் பாராட்டுகளைத் தெரிவித்துக்கொள்கிறேன். ஆனால், மாணவர்களையும் இளைய தலைமுறையையும் சீரழிக்கும் வகையில் 'பிக்பாஸ்' நிகழ்ச்சியை நடத்தி வருகிறது" என்று வேல்முருகன் கூறினார்.

அவர் மேலும் கூறுகையில், "தமிழ் சமூகம் எப்படிப் போனாலும் பரவாயில்லை; வருமானம் ஒன்றுதான் குறிக்கோள் என்ற பெயரில் இந்த நிகழ்ச்சி நடத்தப்படுகிறது. இந்த நிகழ்ச்சியை குடும்பத்துடன் அமர்ந்து பார்க்க இயலவில்லை" என்று வேல்முருகன் கடுமையாக விமர்சித்தார்.

போராட்ட எச்சரிக்கை

"இந்த நிகழ்ச்சியைத் தடை செய்ய வேண்டும் என்று முதலமைச்சரின் கவனத்திற்குக் கொண்டு சென்றுள்ளேன். இது தொடர்பாக விவாதிக்கச் சட்டமன்றத்தில் கவன ஈர்ப்புத் தீர்மானம் அளிக்க உள்ளேன்" என்று அவர் தெரிவித்தார்.

கர்நாடகா மற்றும் கேரளாவில் இந்த நிகழ்ச்சி மாற்றியமைக்கப்பட்டதைப் போலத் தமிழகத்திலும் நடவடிக்கை எடுக்க வேண்டும் என்றும் அவர் வலியுறுத்தினார்.

"இது தொடர்பாகத் தமிழக அரசு நடவடிக்கை எடுக்கவில்லை என்றால், பொதுமக்களைத் திரட்டிப் போராட்டம் நடத்துவேன்" என்றும் வேல்முருகன் எச்சரித்தார்.