சுவர் விளம்பரத்திற்கு போட்டி: கரூரில் எம்.ஆர்.விஜயபாஸ்கர் போலீசாருடன் வாக்குவாதம்

வரும் 25 மற்றும் 26ம் தேதிகளில் எதிர்கட்சித்தலைவரும், அதிமுக பொதுச் செயலாளருமான எடப்பாடி பழனிசாமி கரூர் மாவட்டத்தில் சுற்றுப்பயணம் மேற்கொண்டு 4 தொகுதிகளில் பிரசாரம் மேற்கொள்ள உள்ளார். இதனை முன்னிட்டு கடந்த சில தினங்களுக்கு முன்பாக வேலாயுதம்பாளையத்தில் தேசிய நெடுஞ்சாலையில் பாலத்தில் சுவர் விளம்பரம் செய்ய முற்பட்டனர். அப்போது, திமுகவினர் எதிர்ப்பு தெரிவித்ததால், அங்கு வந்த போலீசார் 17ம் தேதி முதல்வர் வருகையை முன்னிட்டு திமுக சார்பில் விளம்ரம் செய்யப்படுவதால் நிகழ்ச்சி முடிந்த பிறகு 18ம் தேதிக்கு மேல் சுவர் விளம்பரம் செய்து கொள்ளும்படி அறிவுறுத்தி அதிமுகவினரை அனுப்பி வைத்தனர்.

இந்நிலையில் இன்று கரூர் மாநகராட்சிக்கு உட்பட்ட திருக்காம்புலியூர் ரவுண்டானா பகுதியில் ஏற்கனவே திமுக சார்பில் எழுதப்பட்டிருந்த சுவர் விளம்பரத்தை வெள்ளை நிற பெயிண்டை வைத்து அழித்து விட்டு புதிதாக அதிமுக சார்பில் விளம்பரம் செய்ய முற்பட்டனர்.

இபிஎஸ் வருகை சுவர் விளம்பரம்

அதற்கு திமுகவினர் எதிர்ப்பு தெரிவித்தாக கூறப்படுகிறது. இதனால் அப்பகுதியில் அதிமுகவினர் முன்னாள் அமைச்சர் எம்.ஆர்.விஜயபாஸ்கர் தலைமையில் 100க்கும் மேற்பட்டோர் அப்பகுதியில் திரண்டனர். அப்போது, அங்கு வந்த போலீசார் அதிமுகவினரிடம் பேச்சுவார்த்தை நடத்தினர். அப்போது, முன்னாள் அமைச்சருக்கும், கரூர் நகர காவல் நிலைய போலீசாருக்கும் வாக்குவாதம் ஏற்பட்டது. இதனை தொடர்ந்து மாவட்ட காவல் கண்காணிப்பாளரிடம் முறையிட போவதாக கூறி விட்டு புறப்பட்டுச் சென்றனர்.

அப்போது செய்தியாளர்களிடம் பேசிய முன்னாள் அமைச்சர் எம்.ஆர்.விஜயபாஸ்கர், கரூர் மாவட்டத்தில் நடைபெற்ற திமுக முப்பெரும் விழாவிற்காக திமுகவினர் அனைத்து அரசு சுவர்கள், பாலத்தின் பக்கவாட்டு சுவர்களில் விளம்பரம் எழுதிக்கொண்டு, அதிமுக விளம்பரங்களை எழுத விடாமல் இடையூறு செய்வதாகவும், அரசு சுவர்கள் என்ன திமுகவிற்கு பட்டா போட்டு கொடுக்கப்பட்டுள்ளதா? எங்களை மட்டும் அனுமதி பெற்று எழுதிக் கொள்ளும்படி போலீசார் அறிவுறுத்துகின்றனர்.

போலீசாருடன் வாக்குவாதம்

திமுகவினர் அனுமதி பெற்று தான் சுவர் விளம்பரம் எழுதினார்களா என கேள்வி எழுப்பினார். வரும் 25, 26ம் தேதிகளில் இபிஎஸ் கரூர் வரும்போது பேச இருக்கும் இடத்திற்கு அனுமதி அளிக்காமல் காவல்துறையினர் இழுத்தடித்து வருகின்றனர். இதுதொடர்பாக சென்னை உயர்நீதிமன்ற மதுரைக்கிளையில் வழக்கு தொடர்ந்து இருப்பதாகவும், அதனை விசாரித்த நீதிபதி மாவட்ட காவல் கண்காணிப்பாளரை சந்தித்து அனுமதி பெற்றுக்கொள்ளும்படி அறிவுறுத்தியுள்ளதாக தெரிவித்தார். முன்னாள் அமைச்சர் எம்.ஆர்.விஜயபாஸ்கர் போலீசாருடன் வாக்குவாதத்தில் ஈடுபட்டதால் சுமார் 2 மணி நேரம் போக்குவரத்து பாதிக்கப்பட்டது.