அப்துல் கலாமின் பயோபிக்கில் நடிக்கும் தனுஷ்...படக்குழு வெளியிட்ட போஸ்டர்

மறைந்த முன்னாள் குடியரசுத் தலைவர் அப்துல் கலாமின் வாழ்க்கை வரலாற்று படத்தில் நடிகர் தனுஷ் நடிக்க உள்ளதாக அறிவிப்பு வெளியிடப்பட்டுள்ளது.

அப்துல் கலாம் படத்தில் தனுஷ்

ஆதிபுருஷ் திரைப்படத்தின் இயக்குநர் ஓம் ராவத் இயக்க உள்ள இத்திரைப்படம் குறித்து கேன்ஸ் திரைப்பட விழாவில் அதிகாரப்பூர்வ அறிவிப்பு வெளியிடப்பட்டுள்ளது.

நடிகர் தனுஷ் இயக்கிய ராயன் மற்றும் நிலவுக்கு என்னடி என் மேல் கோபம் திரைப்படங்கள் கலவையான விமர்சனம் பெற்ற நிலையில், தற்போது இட்லி கடை, குபேரா உள்ளிட்ட படங்களில் தனுஷ் பிஸியாக நடித்து வருகிறார்.

தனுஷ் நெகிழ்ச்சி பதிவு

மேலும், இயக்குநர்கள் மாரி செல்வராஜ், வெற்றிமாறன் ஆகியோரின் படங்களில் நடிக்க உள்ளதாக கூறப்படுகிறது.இந்த நிலையில், ஆதிபுருஷ் இயக்குநர் ஓம் ராவத் இயக்கும் ‘கலாம் தி மிஷைல் மேன் ஆஃப் இந்தியா’ என்ற அப்துல் கலாமின் வாழ்க்கை வரலாற்று படத்தில் நடிகர் தனுஷ் நடிக்க உள்ளதாக போஸ்டர் வெளியிடப்பட்டுள்ளது.

இது குறித்து இன்ஸ்டாகிராமில் பதிவிட்டுள்ள தனுஷ், “உத்வேகம் மற்றும் பெருமைமிக்க தலைவரான நமது அப்துல்கலாம் ஐயாவின் வாழ்க்கையை சித்தரிப்பதில், நான் உண்மையிலேயே பாக்கியசாலியாக உணர்கிறேன்” எனக் குறிப்பிட்டுள்ளார். அப்துல் கலாமின் எழுதிய ‘அக்னி சிறகுகள்’ புத்தகத்தை அடிப்படையாகக் கொண்டு இத்திரைப்படத்தின் கதை அமைய உள்ளதாக கூறப்படுகிறது. அப்துல் கலாமின் வாழ்க்கை வரலாறு குறித்த படத்தில் தனுஷ் நடிக்க இருப்பதால் பெரும் எதிர்பார்ப்பு எழுந்துள்ளது.