மார்ச் 15-ல் தமிழக பட்ஜெட் தாக்கல்..? வெளியாகும் முக்கிய அறிவிப்பு

கடந்த பிப்.1-ஆம் தேதி நாடாளுமன்றத்தில் மத்திய அரசு பட்ஜெட்டை தாக்கல் செய்தது. மத்திய பட்ஜெட் தாக்கல் செய்யப்பட்டு இரண்டு வாரங்கள் நிறைவடைந்த நிலையில் மாநில அளவில் அந்தந்த மாநிலங்களின் சட்டமன்றங்களில் பட்ஜெட் தாக்கல் செய்யப்படும்.

தமிழ்நாட்டில் 2026-ஆம் ஆண்டு சட்டசபைத் தேர்தல் நடைபெற உள்ளதால் ஆளும் திமுக அரசு தனது கடைசி முழுமையான பட்ஜெட்டை மார்ச் மாதம் தாக்கல் செய்ய உள்ளது. அடுத்த ஆண்டு சட்டசபைத் தேர்தல் நடைபெற உள்ளதால் இடைக்கால பட்ஜெட் தான் தாக்கல் செய்ய முடியும். அதனால், இதுவே திமுகவின் கடைசி முழுமையான பட்ஜெட் ஆகும்.

மேலும் படிக்க: TN Cabinet Meeting : முதலமைச்சர் மு.க.ஸ்டாலின் தலைமையில் அமைச்சரவை கூட்டம் தொடங்கியது

கடந்த 2021-ஆம் ஆண்டு நடைபெற்ற சட்டசபைத் தேர்தலில் அதிக வாக்கு வித்தியாசத்தில் ஆட்சியை கைப்பற்றிய திமுக பெரும்பாலான வாக்குறுதிகளை நிறைவேற்றி உள்ளதாக முதலமைச்சர் மு.க.ஸ்டாலின் உட்பட திமுக அமைச்சர்கள் பலரும் தெரிவித்து வருகின்றனர். இது ஒருபுறம் இருக்க மற்றொரு புறம் பல வாக்குறுதிகள் நிறைவேற்றப்படவில்லை என எதிர்க்கட்சிகள் விமர்சித்து வருகின்றன.

தொடர்ந்து, இந்த ஆண்டு தமிழக சட்டசபையில் தமிழ்நாடு அரசு தாக்கல் செய்ய இருக்கும் பட்ஜெட்டில் நிறைவேற்றப்படாத வாக்குறுதிகள் மற்றும் வாக்காளர்களை கவரும் விதமாக புதிய சலுகைகள் அறிவிக்க வாய்ப்புள்ளதாக எதிர்பார்க்கப்படுகிறது.  திமுக அரசு ஆட்சி பொறுபேற்று தற்போது வரை மூன்று முறை பட்ஜெட் தாக்கல் செய்யப்பட்டுள்ளது.

மேலும் படிக்க: இந்தியா என்பது இந்தி பேசக்கூடியவர்கள் நிலம்.. தமிழ்நாட்டை வரிக்காகதான் வைத்துள்ளார்கள்- சீமான்

இதையடுத்து, 2025-2026-ம் ஆண்டிற்கான பட்ஜெட் தயாரிக்கும் பணி தீவிரமாக நடைபெற்று வருகிறது. கடந்த டிசம்பர் மாதம் முதல் இந்த பணிகள் நடைபெற்று வருகிறது. இந்நிலையில், தமிழக பட்ஜெட் வரும் மார்ச் 15-ஆம் தேதி தாக்கல் செய்யப்பட உள்ளதாக தகவல் வெளியாகியுள்ளது. பட்ஜெட் தாக்கல் செய்யப்படும் தேதியை சபாநாயகர் அப்பாவு இன்று அதிகாரப்பூர்வமாக அறிவிக்க உள்ளார்.

சட்டசபை கூடிய முதல் நாளில் பொது பட்ஜெட்டும், அடுத்த நாள் வேளாண்மை பட்ஜெட்டும் தாக்கல் செய்யப்படும் என்பது குறிப்பிடத்தக்கது.