ஹார்முஸ் ஜலசந்தியில் சீராகும் கப்பல் போக்குவரத்து: 30 இந்தியக் கப்பல்கள் பாதுகாப்பாகக் கடந்தன!

அமெரிக்கா மற்றும் ஈரான் நாடுகளுக்கு இடையே ஏற்பட்டுள்ள புரிந்துணர்வு ஒப்பந்தத்தைத் தொடர்ந்து, சர்வதேசக் கடல் போக்குவரத்தில் மிக முக்கியப் பாதையாகக் கருதப்படும் ஹார்முஸ் ஜலசந்தியில் கப்பல் போக்குவரத்து தற்போது வேகமாகச் சீரடைந்து வருகிறது.

ஹார்முஸ் ஜலசந்தி வழியாக கடல் போக்குவரத்து மேம்பட்டு வரும் நிலையில், இந்தியாவிற்கான முக்கியச் சரக்குகளை ஏற்றி வரும் கப்பல்களின் பாதுகாப்பைக் கப்பல் போக்குவரத்து அமைச்சக அதிகாரிகள் தொடர்ந்து கண்காணித்து வருகின்றனர். இதன் ஒருபகுதியாக, இந்தியா நோக்கி வந்த 30 சரக்குக் கப்பல்கள் ஹார்முஸ் ஜலசந்தியைப் பாதுகாப்பாகக் கடந்துள்ளதாகத் தகவல்கள் வெளியாகியுள்ளன. அதேவேளையில், இந்தியாவிற்குச் சொந்தமான மேலும் 26 கப்பல்கள் இந்த ஜலசந்தியைக் கடப்பதற்காகத் தற்போது பாதுகாப்பான முறையில் காத்திருக்கின்றன என்று அமைச்சக வட்டாரங்கள் தெரிவித்துள்ளன.

அதிகரிக்கும் தினசரி கப்பல் போக்குவரத்து

கடந்த மார்ச் 1-ஆம் தேதி முதல் ஜூன் 14-ஆம் தேதி வரையிலான காலகட்டத்தில், பதற்றமான சூழல் காரணமாக இந்த ஜலசந்தி வழியே தினசரி 10-க்கும் குறைவான கப்பல்களே கடந்து சென்றன. ஆனால், நிலைமை சீரானதைத் தொடர்ந்து கடந்த ஜூன் 15-ஆம் தேதி முதல் ஒவ்வொரு நாளும் சராசரியாக 22 சரக்குக் கப்பல்கள் இந்த ஜலசந்தியைப் பாதுகாப்பாகக் கடக்கத் தொடங்கியுள்ளன. சமீப நாட்களாக இப்பாதையில் கப்பல்களின் வருகை கணிசமாக அதிகரித்துள்ளதாக அதிகாரிகள் மகிழ்ச்சி தெரிவித்துள்ளனர்.