ட்ரம்ப் ஆதரவாளர் சார்லி கிர்க் சுட்டுக் கொலை - அமெரிக்கா அரசியலில் பரபரப்பு!

31 வயதான சார்லி கிர்க், 'டேர்னிங் பாயின்ட் யூஎஸ்ஏ' (Turning Point USA) என்ற இளைஞர் அமைப்பின் இணை நிறுவனர் மற்றும் தலைமை நிர்வாக அதிகாரியாக இருந்தார். இவர் ட்ரம்ப் ஆதரவாளர்களை ஒருங்கிணைப்பதில் முக்கியப் பங்கு வகித்தார். யூட்டா மாகாணத்தில் உள்ள யூட்டா பள்ளத்தாக்கு பல்கலைக்கழகத்தில் நடைபெற்ற ஒரு நிகழ்ச்சியில் கிர்க் பேசிக்கொண்டிருந்தபோது, துப்பாக்கிச் சூடு நடந்தது.

கழுத்தில் பாய்ந்த குண்டு

இந்தச் சம்பவத்தின்போது, கிர்க்கின் கழுத்தில் ஒற்றைக் குண்டு பாய்ந்ததாகத் தகவல்கள் தெரிவிக்கின்றன. உடனடியாக மருத்துவமனைக்குக் கொண்டு செல்லப்பட்ட அவர், சிகிச்சை பலனின்றி உயிரிழந்தார். இந்தத் தாக்குதல் ஒரு துல்லியமான குறிபார்த்து நடத்தப்பட்ட தாக்குதல் போல் இருந்ததாகச் சம்பவத்தை நேரில் கண்டவர்கள் தெரிவித்துள்ளனர்.

யூட்டா மாகாணத்தின் ஆளுநர் ஸ்பென்சர் காக்ஸ், இந்தச் சம்பவத்தை ஒரு 'அரசியல் படுகொலை' என்று கண்டித்துள்ளார். துப்பாக்கிச் சூடு நடத்திய நபர், அருகே இருந்த கட்டிடத்தின் கூரையிலிருந்து சுட்டிருக்கலாம் என்று போலீசார் சந்தேகிக்கின்றனர். இந்தச் சம்பவம் குறித்து போலீசார் தீவிர விசாரணை மேற்கொண்டு வருகின்றனர்.