மருத்துவமனைகளில் பாதுகாப்பு குறைபாடு? சென்னையில் அடுத்தடுத்து அரங்கேறும் வன்முறைச் சம்பவங்கள்!

சென்னை கே.கே. நகர் அரசு மருத்துவமனையில் மூதாட்டி ஒருவர் மர்ம நபரால் தாக்கப்பட்ட வழக்கில், பர்தா அணிந்து வந்து சுத்தியலால் தாக்கிய பெண்ணைக் காவல்துறையினர் கைது செய்துள்ளனர். கீழ்ப்பாக்கம் மருத்துவமனை படுகொலைச் சம்பவத்தின் பரபரப்பு அடங்குவதற்குள் இந்த விவகாரம் மக்கள் மத்தியில் பெரும் அச்சத்தை ஏற்படுத்தியுள்ளது.

மருத்துவமனையில் மூதாட்டி மீது தாக்குதல்

சென்னை விருகம்பாக்கம் இந்திரா நகரைச் சேர்ந்த 65 வயது மூதாட்டி ராணி, தனது கணவர் தியாகராஜனை டயாலிசிஸ் சிகிச்சைக்காகக் கடந்த 10-ஆம் தேதி கே.கே. நகர் இ.எஸ்.ஐ அரசு மருத்துவமனைக்கு அழைத்துச் சென்றார். அங்கு வார்டு அருகில் உள்ள கழிவறைக்கு ராணி சென்றபோது, திடீரெனப் பின்தொடர்ந்து வந்த மர்ம நபர் ஒருவர் அவரைத் தாக்கினார். முதலில் நகை பறிப்பு முயற்சி என்று கருதப்பட்ட நிலையில், ராணி கூச்சலிட்டதால் அந்த நபர் இரும்பு கம்பியால் (சுத்தியல்) ராணியின் தலையில் பலமாகத் தாக்கிவிட்டு அங்கிருந்து தப்பியோடினார். இதில் காயமடைந்த ராணிக்குத் தலையில் 5 தையல்கள் போடப்பட்டுத் தீவிர சிகிச்சை அளிக்கப்பட்டு வருகிறது.

சி.சி.டி.வி காட்சிகளும் கொலையுதிர் திருப்பமும்

இந்தச் சம்பவம் குறித்து எம்.ஜி.ஆர் நகர் காவல்துறையினர் வழக்குப் பதிவு செய்து மருத்துவமனையில் இருந்த சி.சி.டி.வி கேமரா காட்சிகளை ஆய்வு செய்தனர். அதில், பர்தா அணிந்த ஒரு பெண் ராணியைப் பின்தொடர்ந்து சென்று தாக்கியது உறுதியானது. தீவிர விசாரணையில், தாக்குதல் நடத்தியவர் தரமணியைச் சேர்ந்த நித்யா (29) என்பது தெரியவந்தது. அவரது கணவர் ஐ.ஐ.டி-யில் காவலாளியாகப் பணியாற்றி வருகிறார். இதையடுத்து நித்யாவைக் காவல்துறையினர் கைது செய்தனர்.

பழிவாங்குவதற்காகத் தீட்டப்பட்ட பர்தா திட்டம்

கைது செய்யப்பட்ட நித்யாவிடம் நடத்திய விசாரணையில் பல திடுக்கிடும் தகவல்கள் வெளியாகின. நித்யாவின் தந்தையும் அதே மருத்துவமனையில் டயாலிசிஸ் சிகிச்சை பெற்று வருகிறார். இதன் காரணமாக ராணிக்கும் நித்யாவுக்கும் இடையே ஏற்கனவே பழக்கம் இருந்துள்ளது. கடந்த 10-ஆம் தேதி, தனது கணவரின் மருத்துவ அறிக்கையை வாங்கி வருமாறு நித்யாவிடம் ராணி கூறியுள்ளார். இதற்கு நித்யா மறுக்கவே, இருவருக்கும் இடையே வாக்குவாதம் ஏற்பட்டுள்ளது. அப்போது ராணி தன்னை ஆபாசமாகத் திட்டியதால் ஏற்பட்ட மன உளைச்சலால் அவரைப் பழிவாங்க நித்யா முடிவு செய்துள்ளார்.

இதற்காகத் தி.நகரில் உள்ள நடைபாதை கடையில் பர்தா ஒன்றை வாங்கிய நித்யா, தனது வீட்டிலிருந்து சுத்தியலை மறைத்து எடுத்துக்கொண்டு மருத்துவமனைக்கு வந்துள்ளார். அடையாளம் தெரியாமல் இருக்கப் பர்தா அணிந்து கொண்டு ராணியைப் பின்தொடர்ந்து சென்று தாக்கிவிட்டு, பின்னர் ஆட்டோவில் தப்பியது விசாரணையில் உறுதி செய்யப்பட்டது.

மருத்துவமனைகளில் தொடரும் பாதுகாப்பு அச்சுறுத்தல்

நேற்று கீழ்ப்பாக்கம் அரசு மருத்துவமனையில் ரவுடி ஒருவர் கொடூரமான முறையில் படுகொலை செய்யப்பட்ட நிலையில், இன்று கே.கே. நகர் மருத்துவமனையில் மூதாட்டி மீது நடத்தப்பட்ட இந்தத் திட்டமிட்ட தாக்குதல் பொதுமக்கள் மத்தியில் பெரும் கவலையை ஏற்படுத்தியுள்ளது. அரசு மருத்துவமனைகள் நோயாளிகளைக் காக்கும் இடமாக இருக்க வேண்டுமே தவிர, குற்றவாளிகள் நடமாடும் இடமாக மாறக்கூடாது என்று சமூக ஆர்வலர்கள் வேதனை தெரிவிக்கின்றனர்.

பாதுகாப்பு பலப்படுத்த உத்தரவு

இந்த நிலையில் அனைத்து அரசு மருத்​துவ கல்​லூரி மருத்துவமனை டீன்​களிட​மும் சுகா​தா​ரத்​ துறை செயலர் செந்​தில்​கு​மார், நேற்று காணொலி வாயி​லாக ஆய்​வுக் கூட்​டம் நடத்​தி​னார். அப்போது, தமிழகத்​தில் உள்ள அனைத்து அரசு மருத்​துவ கல்​லூரி மருத்துவமனைகளிலும் பாது​காப்பை பலப்​படுத்த வேண்​டும்’ என்று அவர் அறி​வுறுத்​தி​யுள்​ளார்.