கோவை ஆட்சியர் அலுவலகத்திற்கு 9-வது முறையாக வெடிகுண்டு மிரட்டல்: போலீசார் தீவிர சோதனை!

கோவை மாவட்ட ஆட்சியர் அலுவலகத்துக்குத் தொடர்ந்து 9-வது முறையாக வெடிகுண்டு மிரட்டல் வந்ததையடுத்து, அங்கு பெரும் பரபரப்பு நிலவியது. மின்னஞ்சல் (இ-மெயில்) மூலம் வந்த இந்த மிரட்டலால், போலீசார் மோப்ப நாய்கள் மற்றும் வெடிகுண்டு கண்டறியும் நிபுணர்களுடன் தீவிரச் சோதனையில் ஈடுபட்டனர்.

தொடரும் வெடிகுண்டு மிரட்டல்கள்

கோவை மாவட்ட ஆட்சியர் அலுவலகத்திற்கு இரண்டு மாதங்களில் இது 9-வது முறையாக வந்துள்ள வெடிகுண்டு மிரட்டல் ஆகும். தொடர்ச்சியாக மிரட்டல் வருவதால், இந்தச் சம்பவம் காவல்துறையினர் மத்தியில் அதிர்ச்சியை ஏற்படுத்தியுள்ளது.

மிரட்டல் விடுக்கப்பட்டதைத் தொடர்ந்து, காவல் துறையினர் மோப்ப நாய்கள் மற்றும் சிறப்புப் பயிற்சி பெற்ற படையினருடன் ஆட்சியர் அலுவலக வளாகம் முழுவதும் தீவிரச் சோதனையில் ஈடுபட்டனர். அலுவலகத்தின் பிரதான கட்டடங்கள், வாகன நிறுத்தும் இடங்கள், பதிவறைகள், கூட்டரங்குகள், பின்புற வளாகம் உள்ளிட்ட அனைத்துப் பகுதிகளும் சோதனைக்குட்படுத்தப்பட்டன.

மற்ற இடங்களுக்கும் மிரட்டல்

மாவட்ட ஆட்சியர் அலுவலகம் மட்டுமல்லாமல், கோவை மண்டல பாஸ்போர்ட் அலுவலகம், விமான நிலையம், நீதிமன்றம் ஆகிய இடங்களுக்கும் இதேபோன்ற மிரட்டல்கள் வந்துள்ளன. இதைத் தொடர்ந்து நேற்று முன்தினம் டவுன்ஹால் பகுதியில் உள்ள மணிக்கூண்டுக்கும் இதுபோன்ற மிரட்டல் வந்துள்ளது. இந்த மிரட்டல்களை விடுத்த நபர்கள் குறித்துக் காவல்துறையினர் தீவிர விசாரணை மேற்கொண்டு வருகின்றனர்.