மாநில உரிமைகளை பறிக்கும் அல்லது மாநில கொள்கைக்கு எதிரான முக்கிய பிரச்சனைகளின் போது அதனை சட்ட ரீதியாக எதிர்கொள்வது தொடர்பாக விவாதிப்பதற்காக மாநிலத்தின் அங்கீகரிக்கப்பட்ட கட்சியினருக்கு அரசு சார்பில் அழைப்பு விடுக்கப்பட்டு, அனைத்து கட்சி கூட்டம் நடத்தி  விவாதித்து அவர்களிடம் ஆலோசனைகளை கேட்டு  பெறுவது வழக்கம்.

அந்த வகையில்  சமீபத்தில் தமிழ்நாடு அரசு எதிர்கொண்டு வரும்  தொகுதி மறுசீரமைப்பு மற்றும் புதிய கல்வி கொள்கை பிரச்சனை தொடர்பாக விவாதிக்க அனைத்து கட்சி கூட்டத்திற்கு அங்கீகரிக்கப்பட்ட 40 கட்சிகளுக்கு தமிழ்நாடு முதலமைச்சர் மு.க.ஸ்டாலின் அழைப்பு விடுத்தார்.  

தமிழகத்தில் மொத்தம் 183 கட்சிகள் உள்ள நிலையில் அனைத்துக் கட்சி கூட்டத்திற்கு பதிவு செய்யப்பட்ட 40 கட்சிகளுக்கு மட்டுமே அழைப்பு விடுக்கப்பட்டது. இதனிடையே, அனைத்து கட்சி கூட்டத்தை புறக்கணிக்கப் போவதாக பாஜக, தமிழ் மாநில காங்கிரஸ், நாம் தமிழர் கட்சி, புதிய தமிழகம் உள்ளிட்ட கட்சிகள் அறிவித்தன.

இதையடுத்து, நேற்று (மார்ச் 3) அனைத்து கட்சி கூட்டத்தில் மாநிலத்தின் முக்கிய பிரச்சனைகள் தொடர்பாக விவாதிக்கப்பட உள்ள நிலையில், மாநிலத்தின் உரிமைக்காக அரசியல் கட்சிகள் கௌரவம்  பார்க்காமல் அதில்  பங்கேற்க வேண்டும் என முதலமைச்சர் மு.க ஸ்டாலின் கேட்டுக் கொண்டார்.

இந்த நிலையில் கடந்த வருடம் கட்சி ஆரம்பித்து ஓராண்டை கடந்திருக்கும் தமிழக வெற்றி கழகத்திற்கும் இந்த அனைத்து கட்சி கூட்டத்தில் கலந்து கொள்வதற்காக அழைப்பு விடுக்கப்பட்டிருந்தது. அந்த வகையில் தமிழக வெற்றிக் கழகம் இதில் கலந்துகொள்ள முடிவெடுத்துள்ளதாக தகவல் வெளியாகியுள்ளது.

இந்தி திணிப்புக்கு எதிராக ஏற்கனவே விஜய் எதிர்ப்பு தெரிவித்துள்ள நிலையில் இக்கூட்டத்தில் பங்கு பெற்று தமிழக வெற்றிக் கழகத்தின் நிலைப்பாட்டை முன் வைக்க உள்ளதாகவும் இக்கட்சியின் சார்பாக பொதுச் செயலாளர் என்.ஆனந்த் இதில் கலந்து கொள்வார் என்றும் தகவல் வெளியாகி உள்ளது.  அனைத்து கட்சிக் கூட்டம் நாளை (மார்ச் 5) நடைபெறவுள்ளது குறிப்பிடத்தக்கது.