ஐபிஎல் போட்டிக்கு தாவிய ஆல்ரவுண்டர் வீரருக்கு வந்தது சிக்கல்!

நடப்பு ஐபிஎல் தொடரில் பலம் வாய்ந்த மும்பை இந்தியன்ஸ் அணியில் இடம் பெற்றிருந்த லிசாத் வில்லியம்ஸ் காயம் காரணமாக தொடரிலிருந்து முழுமையாக விலகியுள்ளார். அவருக்குப் பதிலாக தென்னாப்பிரிக்கா நாட்டினைச் சேர்ந்த ஆல்-ரவுண்டர் கோர்பின் போஷினை மாற்று வீரராக தேர்வு செய்தது மும்பை இந்தியன்ஸ். இதில் என்ன சிக்கல் இருக்கு என்று தோணலாம்? ஆனா இருக்குதே..

ஐபிஎல் போட்டிக்கு கிடைத்த வரவேற்பினைத் தொடர்ந்து ஒவ்வொரு நாடும் டி-20 பிரிமீயர் தொடர்களை நடத்த முன்வந்தது. பாகிஸ்தான் கிரிக்கெட் வீரர்கள் ஐபிஎல் தொடர்களில் பங்கேற்க முடியாத சூழ்நிலை நிலவி வரும் நிலையில், பாகிஸ்தான் சூப்பர் லீக் தொடர் மட்டுமே அந்நாட்டு கிரிக்கெட் ரசிகர்களுக்கு ஒரே ஆதரவாக இருந்து வருகிறது.

முன்னதாக கோர்பின் போஷ் பாகிஸ்தான் சூப்பர் லீக் தொடரில் பெஷாவர் சல்மிக்காக விளையாட தேர்ந்தெடுக்கப்பட்டிருந்தார். ஐபிஎல் போட்டியில் விளையாட வாய்ப்பு கிடைத்ததும், பாகிஸ்தானுக்கு டாடா சொல்லிவிட்டு சிட்டாக மும்பைக்கு பறந்து விட்டார் கோர்பின் போஷ். PSL தொடர் வருகிற ஏப்ரல் 11 முதல் மே 25 வரை நடைபெற உள்ளது. ஐபிஎல் தொடர் வருகிற மார்ச் 22 முதல் மே 25 வரை நடைபெற உள்ளது. இரண்டு தொடர்களும் ஒரே காலக்கட்டத்தில் நடப்பது இதுவே முதல்முறையும் கூட. ஐபிஎல் போட்டிகளில் கிடைக்கும் வருமானமும், புகழ் வெளிச்சமும் PSL தொடரில் விளையாடுவதால் கிடைக்காது என்பது ஊரார் அறிந்ததே. போஷூக்கும் இது தெரிந்திருக்கும் அல்லவா? அதான் பறந்துவிட்டார்.

நோட்டீஸால் வந்த சிக்கல்:

PCB (பாகிஸ்தான் கிரிக்கெட் வாரியம்) வெளியீட்டுள்ள தனது அறிக்கையில், "நோட்டீஸ் அவரது உதவியாளர் மூலம் அனுப்பப்பட்டுள்ளது. வீரர்கள் தனது ஒப்பந்தங்களை மீறி செயல்படும் நிலையில் அதற்கான காரணத்தை கேட்டு நோட்டீஸ் அளிப்பது வழக்கமான ஒன்றுதான். அவர் தொடரிலிருந்து வெளியேறுவதால் ஏற்படும் விளைவுகளைவும் PCB நிர்வாகம் எடுத்துக்காட்டியுள்ளது. குறிப்பிட்ட காலத்திற்குள் தகுந்த பதில் அளிப்பார் என எதிர்பார்க்கிறோம். இந்த விவகாரம் குறித்து PCB இதற்குப் பிறகு எந்தக் கருத்தையும் வெளியிடாது," என்றும் அந்த நோட்டீஸீல் கூறியுள்ளது.

இந்த சீசனுக்காக, IPL ஏலம் நவம்பர் 2024-ல் நடைபெற்றது. PSL டிராப்ட் ஜனவரி 2025-ல் நடைபெற்றது. IPL ஏலத்தின் போது வாய்ப்புக் கிடைக்காத நிலையில், PSL தொடரில் இணைய விருப்பம் தெரிவித்து இருந்தார் கோர்பின் போஷ். இப்போது எதிர்பாராத விதமாக ஐபிஎல் தொடரில் விளையாட வாய்ப்பு வந்துள்ளதால், அதே கப்பென்று பிடித்துக் கொண்டார். வாய்ப்போடு சிக்கலும் வந்தது தான் கொடூரம். ஒருவேளை நியாயமான பதிலை போஷ் வழங்கவில்லையென்றால் பாகிஸ்தான் சூப்பர் லீக் தொடரில் அவரால் இனி பங்கேற்க முடியாமல் போகலாம்.

Read more: 18 வயதில் செஸ் போட்டியில் வரலாற்று சாதனை: ஊக்கத்தொகை வழங்கி நேரில் வாழ்த்திய முதல்வர்