Asian Games: வரலாற்றில் முதன்முறையாக நேருக்கு நேர் மோதும் இந்தியா - பாகிஸ்தான்!

ஆசிய விளையாட்டுப் போட்டியின் ஆடவர் கிரிக்கெட் வரலாற்றில் முதன்முறையாக இந்தியா மற்றும் பாகிஸ்தான் அணிகள் நேருக்கு நேர் மோதவுள்ளன. நிஷினில் உள்ள கரோகி ஸ்போர்ட்ஸ் பார்க் மைதானத்தில் நாளை (அக்.3) நடைபெறவுள்ள இந்த விறுவிறுப்பான இறுதிப்போட்டியில், தங்கப் பதக்கத்தைக் கைப்பற்ற இரு அணிகளும் கடும் போட்டி போடும் என எதிர்பார்க்கப்படுகிறது.

கடந்த 2023 ஹங்சோ ஆசிய விளையாட்டில் தங்கம் வென்ற நடப்பு சாம்பியனான இந்திய அணி, ஆசிய விளையாட்டு கிரிக்கெட்டில் பங்கேற்பது இது இரண்டாவது முறையாகும். இருப்பினும், கடந்த தொடரிலிருந்து இதுவரை ஐந்து போட்டிகளில் விளையாடியுள்ள இந்திய ஆடவர் அணி, பாகிஸ்தானைச் சந்தித்ததே இல்லை. மகளிர் கிரிக்கெட்டிலும் இதே நிலைதான் நீடித்தது; சமீபத்தில் இலங்கை அணியை வீழ்த்தி ஹர்மன்பிரீத் கவுர் தலைமையிலான இந்திய அணி தங்கம் வென்றபோதிலும், பாகிஸ்தான் அணியுடன் மோதும் வாய்ப்பு அமையவில்லை.

தற்போது, ஜப்பானில் நடைபெறும் இந்தத் தொடரில், இந்திய அணி முழு பலத்துடன் களமிறங்கித் தங்கப் பதக்கத்தைத் தக்கவைக்க தீவிர முனைப்பு காட்டி வருகிறது.

அரையிறுதிப் போட்டியில், சவாலான ஆடுகளத்தில் இலங்கை அணியை எதிர்கொண்ட இந்தியா, 124 ரன்கள் வித்தியாசத்தில் அபார வெற்றி பெற்றது. முதலில் பேட்டிங் செய்த இந்திய அணிக்கு, இளம் வீரர் வைபவ் சூரியவன்ஷி 21 பந்துகளில் 38 ரன்கள் எடுத்து அதிரடி தொடக்கம் அமைத்துக் கொடுத்தார். தொடர்ந்து சிறப்பாக ஆடிய இஷான் கிஷன், 5 சிக்ஸர்கள் மற்றும் 4 ஃபோர்களுடன் 46 பந்துகளில் 80 ரன்கள் விளாசினார். இதனால் இந்திய அணி 20 ஓவர்களில் 169/7 ரன்கள் சேர்த்தது.

170 ரன்கள் என்ற இலக்கை நோக்கிய இலங்கையை இந்திய பந்துவீச்சாளர்கள் நிலைகுலையச் செய்தனர். வேகப்பந்து வீச்சாளர் ஜஸ்பிரித் பும்ரா முதல் ஓவரிலேயே இரண்டு விக்கெட்டுகளை வீழ்த்தி மிரட்டினார். அவர் 7 ரன்களுக்கு 2 விக்கெட்டுகளையும், அக்சர் படேல் (8 ரன்களுக்கு 2 விக்கெட்) மற்றும் அபிஷேக் சர்மா (2 ரன்களுக்கு 2 விக்கெட்) ஆகியோரும் தலா 2 விக்கெட்டுகளைக் கைப்பற்றினர். இதனால் இலங்கை அணி வெறும் 45 ரன்களுக்குச் சுருண்டது.

மழை காரணமான காலதாமதத்தால் சுருக்கப்பட்ட மற்றொரு அரையிறுதிப் போட்டியில், பாகிஸ்தான் அணி வங்கதேசத்தை எதிர்கொண்டது. சுழற்பந்து வீச்சாளர்களின் திறமையான பந்துவீச்சால் வங்கதேச அணியை 111/7 ரன்களுக்குள் பாகிஸ்தான் கட்டுப்படுத்தியது. குறிப்பாக சாய்ம் அயூப் 2 ஓவர்களில் 3 ரன்கள் மட்டுமே விட்டுக்கொடுத்து 1 விக்கெட் வீழ்த்தினார்.

தொடர்ந்து 112 ரன்கள் இலக்கை நோக்கி ஆடிய பாகிஸ்தான் அணிக்கு, தொடக்கத்தில் சாகிப்சாதா ஃபர்ஹான் விக்கெட்டை மஹெதி ஹாசன் வீழ்த்தி அதிர்ச்சி அளித்தார். இருப்பினும் மாஸ் சதாகத் (15), உஸ்மான் கான் (14) மற்றும் சாய்ம் அயூப் (21) ஆகியோர் அதிரடியாக ஆடி ரன் வீதத்தை உயர்த்தினர்.

ஒரு கட்டத்தில் 76/4 என இருந்தபோது, முஸ்தபிசுர் ரஹ்மான் வீசிய 10-வது ஓவரில் அப்துல் சமத் மற்றும் ஹசன் நவாஸ் இணைந்து 23 ரன்கள் குவித்தனர். அதில் அப்துல் சமத் மட்டுமே 22 ரன்கள் விளாசினார். இறுதியில் 12-வது ஓவரில் வெற்றிக்கான பவுண்டரியை அடித்த ஹசன் நவாஸ், 6 விக்கெட்டுகள் வித்தியாசத்தில் பாகிஸ்தான் அணியை வெற்றிபெற வைத்தார்.

இரு அணிகளுக்குமே காலிறுதிப் போட்டிகள் மழையால் ரத்தான நிலையில், அரையிறுதி ஆட்டமே தொடரின் முதல் போட்டியாக அமைந்தது குறிப்பிடத்தக்கது. தற்போது தங்கப் பதக்கத்திற்கான இறுதி ஆட்டத்தில் இரு அணிகளும் மோதவுள்ளது ரசிகர்களிடையே பெரும் எதிர்பார்ப்பை ஏற்படுத்தியுள்ளது.