அனிருத் - காவ்யா திருமணம்: ரசிகர்களுக்கு சப்ரைஸ் கொடுத்த அனிருத் ! வைரலாகும் பதிவு !

இசையமைப்பாளர் அனிருத் ரவிச்சந்தர் மற்றும் சன் ரைசர்ஸ் ஹைதராபாத் அணியின் இணை உரிமையாளர் காவ்யா மாறன் ஆகியோர் திருமணம் செய்துகொண்டதாக அறிவித்துள்ளனர். இவர்களின் திருமணம் குறித்த அதிகாரப்பூர்வ அறிவிப்பு எதுவும் வெளியாகாமல் இருந்து வந்த நிலையில், தற்போது அனிருத் தனது இன்ஸ்டாகிராம் பதிவு மூலமாக திருமணத்தை அறிவித்துள்ளது ரசிகர்கள் மத்தியில் பெரும் மகிழ்ச்சியையும் ஆச்சரியத்தையும் ஏற்படுத்தியுள்ளது.

கிரீஸில் கோலாகலமாக நடைபெற்ற திருமணம்!

அனிருத் மற்றும் காவ்யா மாறன் திருமண கொண்டாட்டங்கள் கிரீஸ் நாட்டில் நவம்பர் 10 மற்றும் 11 ஆகிய தேதிகளில் நடைபெற்றதாக தகவல்கள் வெளியாகியுள்ளன. குடும்பத்தினர் மற்றும் நெருங்கிய உறவினர்கள் முன்னிலையில் பிரம்மாண்டமாக நடைபெற்ற இந்த திருமணத்தில் பல்வேறு முக்கிய பிரபலங்கள் கலந்துகொண்டதாக கூறப்படுகிறது.

இந்த நிலையில், நவம்பர் 11-ம் தேதியான இன்று அனிருத் தனது இன்ஸ்டாகிராம் பக்கத்தில் திருமண புகைப்படங்களை வெளியிட்டு, “My once in a lifetime, for a lifetime 11.11” என்று பதிவிட்டுள்ளார். இதன் மூலம் தங்களது திருமணத்தை அதிகாரப்பூர்வமாக அறிவித்துள்ளார்.

மணமக்களின் அழகிய திருமண அலங்காரம்!

திருமணத்தில் அனிருத் பாரம்பரியமான ஐவரி நிற உடையில் காட்சியளித்தார். அதே நிறத்தில் வேஷ்டி, குர்தா மற்றும் அழகிய எம்பிராய்டரி வேலைப்பாடுகள் கொண்ட நீளமான மேலாடை அணிந்திருந்தார்.

காவ்யா மாறன் பிங்க் நிற லெஹங்காவில் அழகாக தோன்றினார். நுணுக்கமான எம்பிராய்டரி மற்றும் ஜொலிக்கும் அலங்கார வேலைப்பாடுகள் கொண்ட லெஹங்காவுடன், அழகிய நெக்லஸ் மற்றும் காதணிகளையும் அணிந்திருந்தார். இருவரும் இணைந்து வெளியிட்டுள்ள திருமண புகைப்படங்கள் தற்போது சமூக வலைதளங்களில் ரசிகர்களால் அதிகம் பகிரப்பட்டு வருகின்றன.

சென்னையில் நவம்பர் 21-ம் தேதி பிரம்மாண்ட வரவேற்பு!

கிரீஸில் திருமணம் நடைபெற்றதைத் தொடர்ந்து, அனிருத் – காவ்யா மாறன் தம்பதியினரின் திருமண வரவேற்பு நிகழ்ச்சி சென்னையில் நவம்பர் 21-ம் தேதி நடைபெற இருப்பதாக தகவல்கள் வெளியாகியுள்ளன.

காவ்யா மாறனின் பெற்றோர் கலாநிதி மாறன் மற்றும் காவேரி மாறன் ஆகியோர் தெலங்கானா முதலமைச்சர் ஏ. ரேவந்த் ரெட்டியை நேரில் சந்தித்து திருமண வரவேற்புக்கு அழைப்பு விடுத்துள்ளனர். இதனைத் தொடர்ந்து தெலங்கானா முதலமைச்சர் அலுவலகம் வெளியிட்ட பதிவின் மூலம் வரவேற்பு நிகழ்ச்சியின் தேதி உறுதி செய்யப்பட்டதாக கூறப்படுகிறது.

இந்த வரவேற்பு நிகழ்ச்சியில் பிரதமர் நரேந்திர மோடி, சோனியா காந்தி, ராகுல் காந்தி, பிரியங்கா காந்தி உள்ளிட்ட அரசியல் தலைவர்கள் பங்கேற்க இருப்பதாக தகவல்கள் தெரிவிக்கின்றன.

மேலும், தமிழ்நாடு முதலமைச்சர் சி. ஜோசப் விஜய், தெலங்கானா முதலமைச்சர் ஏ. ரேவந்த் ரெட்டி, ஆந்திர முதலமைச்சர் என். சந்திரபாபு நாயுடு மற்றும் முன்னாள் தமிழ்நாடு முதலமைச்சர் மு.க. ஸ்டாலின் உள்ளிட்ட அரசியல் பிரமுகர்களுக்கும் அழைப்பு விடுக்கப்பட்டுள்ளதாக கூறப்படுகிறது.

திரையுலக பிரபலங்கள் பங்கேற்கிறார்களா?

அனிருத் – காவ்யா மாறன் திருமண வரவேற்பில் திரையுலகின் முன்னணி நட்சத்திரங்கள் பலரும் கலந்துகொள்வார்கள் என எதிர்பார்க்கப்படுகிறது.

சூப்பர் ஸ்டார் ரஜினிகாந்த், ஏ.ஆர். ரஹ்மான், கமல்ஹாசன், தனுஷ், அஜித் குமார் மற்றும் அவரது மனைவி ஷாலினி உள்ளிட்ட பிரபலங்களுக்கு அழைப்பு விடுக்கப்பட்டுள்ளதாக தகவல்கள் வெளியாகியுள்ளன.

அதேபோல் அல்லு அர்ஜுன், அவரது மனைவி ஸ்நேகா, சிவகார்த்திகேயன், அவரது மனைவி ஆர்த்தி, இயக்குநர் நெல்சன் திலீப்குமார், ஆண்ட்ரியா ஜெரேமியா, பிரசன்னா மற்றும் சூரஜ் வெஞ்சரமூடு உள்ளிட்ட பிரபலங்களும் பங்கேற்கலாம் என எதிர்பார்க்கப்படுகிறது.

காவ்யா மாறன் சன் ரைசர்ஸ் ஹைதராபாத் அணியின் முக்கிய நிர்வாகியாக இருப்பதால், கிரிக்கெட் வீரர்களும் இந்த நிகழ்ச்சியில் கலந்துகொள்ள வாய்ப்புள்ளதாக கூறப்படுகிறது. அபிஷேக் சர்மா, இஷான் கிஷன் உள்ளிட்ட வீரர்கள் வரவேற்பில் பங்கேற்கலாம் என எதிர்பார்க்கப்படுகிறது.

அனிருத் – காவ்யா மாறன் காதல் மற்றும் திருமண வதந்திகள்!

அனிருத் மற்றும் காவ்யா மாறன் திருமணம் குறித்த தகவல்கள் கடந்த 2025-ம் ஆண்டு முதலே இணையத்தில் பேசப்பட்டு வந்தன. இருவரும் காதலித்து வருவதாகவும், திருமணம் செய்துகொள்ள திட்டமிட்டுள்ளதாகவும் சமூக வலைதளங்களில் தகவல்கள் பரவின.

ஆனால், கடந்த ஆண்டு ஜூன் மாதம் திருமண வதந்திகள் குறித்து அனிருத் மறுப்பு தெரிவித்திருந்தார். “Marriage ah? lol... Chill out, guys. Please stop spreading rumours.” என்று அவர் பதிவிட்டிருந்தார்.

இதற்கிடையில், 2026 ஜூன் மாதம் அனிருத்தின் மாமாவும் நடிகருமான ஒய்.ஜி. மகேந்திரா, பேட்டி ஒன்றில் அனிருத்தின் திருமணம் குறித்து பேசியிருந்தார். அப்போது, அனிருத் மிகப்பெரிய திருமணத்திற்கு தயாராகி வருவதாகவும், திருமணம் நடைபெறுவது உறுதி என்றும் அவர் தெரிவித்திருந்தார்.

இந்நிலையில், தற்போது அனிருத் தனது திருமண புகைப்படங்களை வெளியிட்டு அறிவித்திருப்பது ரசிகர்களுக்கு மிகப்பெரிய ஆச்சரியமாக அமைந்துள்ளது.

அனிருத் – காவ்யா மாறன் யார்?

அனிருத் ரவிச்சந்தர்

‘3’ திரைப்படத்தில் இடம்பெற்ற ‘Why This Kolaveri Di’ பாடல் மூலம் உலகளவில் பிரபலமானவர் இசையமைப்பாளர் அனிருத். தொடர்ந்து தமிழ் திரையுலகில் பல முன்னணி நடிகர்களின் திரைப்படங்களுக்கு இசையமைத்து ரசிகர்களின் மனதில் தனி இடத்தைப் பிடித்துள்ளார். ஷாருக்கான், பவன் கல்யாண், விஜய் உள்ளிட்ட பல்வேறு மொழி நடிகர்களின் திரைப்படங்களிலும் பணியாற்றியுள்ளார். தற்போது ரஜினிகாந்தின் ‘ஜெயிலர் 2’ உள்ளிட்ட திரைப்படங்களில் இசையமைத்து வருகிறார்.

காவ்யா மாறன்

சன் டிவி நெட்வொர்க்கின் இயக்குநராகவும், ஐபிஎல் தொடரில் விளையாடும் சன்ரைசர்ஸ் ஹைதராபாத் அணியின் தலைமை நிர்வாக அதிகாரியாகவும் காவ்யா மாறன் உள்ளார். இங்கிலாந்தில் உள்ள வார்விக் பிசினஸ் ஸ்கூலில் எம்பிஏ படிப்பை முடித்த இவர், 2019-ம் ஆண்டு சன் டிவி நெட்வொர்க்கில் நிர்வாக இயக்குநராக இணைந்தார். பின்னர் சன் ரைசர்ஸ் ஹைதராபாத் அணியின் நிர்வாகப் பொறுப்பிலும் முக்கிய பங்கு வகித்து வருகிறார்.

இவ்வாறு நீண்ட நாட்களாக ரசிகர்கள் மத்தியில் பேசப்பட்டு வந்த அனிருத் – காவ்யா மாறன் திருமணம் தற்போது அதிகாரப்பூர்வமாக அறிவிக்கப்பட்டுள்ள நிலையில், இவர்களின் திருமண புகைப்படங்கள் இணையத்தில் வைரலாகி வருகின்றன. சென்னையில் நடைபெற உள்ள பிரம்மாண்ட திருமண வரவேற்பு நிகழ்ச்சியை எதிர்பார்த்து ரசிகர்கள் ஆவலுடன் காத்திருக்கின்றனர்.