இறந்தும் உயிர் வாழும் கல்லூரி மாணவர்.. விபத்தில் மூளைசாவு.. உடல் உறுப்பு தானம்..!

இருசக்கர வாகன விபத்தில் தலையில் பலத்த காயம் ஏற்பட்டு மூளைச்சாவு அடைந்த கல்லூரி மாணவரின் உடல் உறுப்புகள் தானம் செய்யப்பட்டது. அவரது உடல் அரசு மரியாதையுடன் இறுதி சடங்கு செய்யப்பட்டது. ஈரோடு மாவட்டம் புஞ்சை புளியம்பட்டி அருகே உள்ள நேரு நகர் பகுதியை சேர்ந்த நாகராஜ் - விஜயலட்சுமி தம்பதியரின் மகன் யாதவ் (வயது 19). கோவை தனியார் கல்லூரியில் இரண்டாம் ஆண்டு படித்து வந்தார்.

கடந்த 19ஆம் தேதி கோவையில் இருசக்கர வாகனத்தில் சென்றபோது விபத்து ஏற்பட்ட நிலையில் காயமடைந்த கல்லூரி மாணவரை மீட்டு கோவை தனியார் மருத்துவமனையில் சிகிச்சைக்காக சேர்த்தனர். அங்கு சிகிச்சை பெற்று வந்த நிலையில் யாதவ் மூளை சாவு அடைந்ததாக மருத்துவர்கள் தெரிவித்தனர். அதனைத் தொடர்ந்து  மூளை சாவு அடைந்த மகனின் உடல் உறுப்புகளை தானம் செய்வதாக அவரது பெற்றோர் முடிவு செய்து மருத்துவரிடம் தெரிவிக்கப்பட்டது. இதையடுத்து பெற்றோர்களின் ஒப்புதல் பெறப்பட்டு மருத்துவர்களிடம் தெரிவிக்கப்பட்டது. இதையடுத்து மூளைச்சாவு அடைந்த தனபாலின் உடல் உறுப்புக்கள் தானம் செய்யப்பட்டு அதில் கல்லீரல், இருதயம், கண் விழித்திரை, சிறுநீரகம், கணையம் ஆகிய உடல் உறுப்புகள் தானமாக வழங்கப்பட்டது. தானமாக பெறப்பட்ட உடல் உறுப்புக்களில் இருதயம் மருத்துவர் குழுவுடன் விமானம் மூலம் சென்னைக்கு அனுப்பி வைக்கப்பட்டது. அதேபோல கல்லீரல், கண் விழித்திரை, சிறுநீரகம், கணையம் ஆகிய உடல் உறுப்புக்கள் கோவையில் உள்ள மருத்துவமனைகளுக்கு மருத்துவ குழுவுடன் ஆம்புலன்ஸ் மூலம் கொண்டு செல்லப்பட்டது.

அதனைத் தொடர்ந்து உடல் உறுப்புக்கள் தானம் செய்யப்பட்ட கல்லூரி மாணவர் யாதவின் உடல் அவரது சொந்த ஊருக்கு கொண்டுவரப்பட்டது. அங்கு அரசு சார்பில் சத்தியமங்கலம் வட்டாட்சியர்  மலர்வளையம் வைத்து மரியாதை செலுத்தினார். அதனைத் தொடர்ந்து கல்லூரி மாணவர் யாதவின் உடலுக்கு அரசு மரியாதையுடன் இறுதிச் சடங்கு நடைபெற்றது.அதன் பின்னர் அவரது உடல் ஊர்வலமாக கொண்டு செல்லப்பட்டு புஞ்சை புளியம்பட்டி எரியூட்டு மயானத்தில் எரியூட்டப்பட்டது. மூளைச்சாவில் உயிரிழந்த கல்லூரி மாணவரின் உடல் எடுத்துச் செல்லப்பட்ட பாக்ஸை தொட்டு கும்பிட்டு அவரது குடும்பத்தினர் கதறி அழுதது பார்ப்போரை கண்கலங்க வைத்தது.