சென்னை அமைந்தக்கரை மேத்தா நகர், சதாசிவ மேத்தா தெரு பகுதியில் உள்ள அடுக்குமாடி குடியிருப்பில் வசித்து வருபவர் முகமது நிஷாத்(35). இவர் பழைய  கார்களை வாங்கி விற்பனை செய்யும் தொழில் செய்து வருகிறார். மேலும், இவருக்கு நிவேதா என்ற நாசியா  என்பவரை காதல் திருமணமாகி 6 வயது குழந்தையுடன் வசித்து வருகிறார். இந்த நிலையில் நிஷாத் வீட்டில் கடந்த ஓராண்டுக்கு (14 மாதங்கள்) முன் தஞ்சாவூர் மாவட்டத்தை சேர்ந்த 13 வயது சிறுமியை வீட்டு வேலைக்காக பணியில் அமர்த்தியுள்ளனர். சிறுமி அவரது வீட்டில் தங்கி வீட்டு வேலை பார்த்து வந்துள்ளார்.

தீபாவளி தினத்தன்று நவாஸ் வீட்டில் வேலை செய்து வந்த சிறுமி வேலை முடிந்து பாத்ரூமில் குளிக்கச் சென்றதாக கூறப்படுகிறது.‌ அப்போது நீண்ட நேரமாகியும் குளிக்க சென்ற சிறுமி வெளியே வராததால் சந்தேகமடைந்த நவாஸ் மற்றும் அவரது மனைவி நாசியா இருவரும் ஓடிச்சென்று பாத்ரூம் கதவை தட்டியும் திறக்காததால் கதவை உடைத்து உள்ளே சென்று பார்த்த போது சிறுமி  தரையில் மயங்கிய நிலையில் இறந்து கிடப்பதை பார்த்து அதிர்ச்சி அடைந்தனர். இதனால் என்ன செய்வது என்று தெரியாமல் பயத்தில் நவாஸ் வீட்டை பூட்டி விட்ட மனைவி குழந்தையுடன் உறவினர்கள் வீட்டிற்கு சென்று விட்டதாக கூறப்படுகிறது. பின்னர், நேற்று முந்தைய தினம் (01-11-24) மாலை வீட்டு உரிமையாளர் முகமது நிஷாத் தனது வழக்கறிஞர் மூலம் சிறுமி இறந்தது குறித்து அமைந்தக்கரை காவல் நிலையத்திற்கு தகவல் தெரிவித்துள்ளார்.

தகவலின் பேரில் அமைந்தகரை போலீசார் சம்பவயிடத்துக்குச் சென்று பாத்ரூமில் இறந்து கிடந்த சிறுமி சடலத்தை கைப்பற்றி பிரேத பரிசோதனைக்காக கே.எம்.சி மருத்துவமனைக்கு அனுப்பி வைத்தனர். மேலும், சிறுமி உடலில் அங்காங்கே அடித்ததற்கான காயங்கள், சிகரெட்டினால் சூடு வைத்த காயங்கள், அயன்பாக்சால் மார்பகத்தில் சூடு வைத்த காயங்கள் இருந்ததால் போலீசாருக்கு சந்தேகத்தை ஏற்படுத்தியது. இதனையடுத்து போலீசார் கணவன்- மனைவி இருவரையும் கைது செய்து காவல் நிலையம் அழைத்து வந்து விசாரணை நடத்தினர்.   

விசாரணையில் முகமது நிஷாத் அவரது சகோதரி சீமா என்பவர் மூலம் தஞ்சாவூர் மாவட்டத்தை சேர்ந்த 14 வயது சிறுமி அவரது வீட்டிற்கு வேலைக்கு (வேலைக்கு சேரும் போது சிறுமியின் வயது 13) வந்ததும், சிறுமியின் தந்தை காலமானதால் தாயின் அரவணைப்பில் சிறுமி வளர்ந்து வந்ததும் தெரியவந்தது.‌ மேலும், குடும்ப சூழ்நிலை காரணமாக சிறுமி தனது தாயை பிரிந்து ஓராண்டுக்கும் மேலாக முகமது நிஷாத் வீட்டில் தங்கி வேலை பார்த்து வந்த நிலையில் கணவன் மனைவி இருவரும் சிறுமியை கடந்த 6 மாதங்களாக அடித்து துன்புறுத்தியது முதற்கட்ட விசாரணையில் தெரியவந்தது. மேலும், முகமது நிஷாத்தின் நண்பரான லோகேஷ் மற்றும் அவரது மனைவி ஜெயசக்தி  (25) ஆகியோரும் வீட்டுக்கு வரும்போது எல்லாம் சிறுமியை அடித்து கொடுமைப்படுத்தியதும் தெரியவந்தது. 

இந்த நிலையில் தீபாவளி தினத்தன்று காலை சிறுமியை முஹம்மது நிஷாத் அவரது மனைவி நிவேதா (எ) நாசியா மற்றும் இவர்களது நண்பரான லோகேஷ் அவரது மனைவி ஜெயசக்தி ஆகியோர் சேர்ந்து கொடூரமாக தாக்கி உள்ளனர். லோகேஷ் காலால் எட்டி உதைத்ததும், பின்னர் அயன்பாக்ஸால் சிறுமியின் மார்பகத்தில் சூடு வைத்ததும் தெரியவந்துள்ளது. இந்த தாக்குதலில் நிலைகுலைந்த சிறுமி மயக்கம் அடைந்து மூர்ச்சையாகி உள்ளார். இதனால், என்ன செய்வது என்று தெரியாமல் சிறுமியை பாத்ரூமுக்குள் இழுத்துச் சென்று போட்டதும், சில மணி நேரம் கழித்து சென்று பார்த்தபோது சிறுமி உயிரிழந்திருப்பதும் தெரியவந்தது. இதனால் பயந்து போன கணவன் மனைவி சிறுமியை பாத்ரூமில் போட்டுவிட்டு ஊதுபத்தி ஏற்றி வைத்துவிட்டு தங்களது உறவினர்கள் வீட்டிற்கு சென்று பதுங்கி உள்ளனர். பின்னர், லோகேஷ் மூலம் வழக்கறிஞர் ஒருவரை ஏற்பாடு செய்து நேற்று மாலை காவல்துறைக்கு தகவல் அளித்துள்ளனர் என்பதும் போலீசார் விசாரணையில் தெரியவந்துள்ளது.

இதனைத்தொடர்ந்து லோகேஷ் அவரது மனைவி ஜெயசக்தி (24), முகமது நிசாத்தின் அக்கா சீமா (39), முகமது நிசாதின் வீட்டில் பணி பெண்ணாக பணிபுரிந்து வந்த மகேஸ்வரி (44) ஆகிய நபர்களை போலீசார் கைது செய்து விசாரணை மேற்கொண்டு வருகின்றனர். கைது செய்யப்பட்ட லோகேஷ் மீது கடந்த 2023 ஆம் ஆண்டு விருதுநகர் மாவட்டத்தில் பதியப்பட்ட கொலை வழக்கு நிலுவையில் இருப்பதும் தெரியவந்தது. இந்த நிலையில் பிரேத பரிசோதனை செய்யப்பட்ட சிறுமியின் உடலை அவரது குடும்பத்தினர் சென்னையில் இறுதி சடங்கு நடத்த கோரிக்கை வைத்ததன் பேரில், போலீசார் சென்னை அண்ணாநகரில் உள்ள சுடுகாட்டில் சிறுமியின் உடலை எரியூட்டினர். மேலும் சிறுமியின் உடலில் அடித்த காயங்களும், அயன்பாக்சால் மார்பகத்தில் சூடு வைத்த காயம், சிகரெட்டினால் சுட்ட காயங்களும் இருப்பதால் அவர் பாலியல் ரீதியாக துன்புறுத்தப்பட்டுள்ளாரா?  என்பது குறித்த தகவல் பிரேத பரிசோதனைக்கு பின்பு நடத்தப்படும் விசாரணையில் தெரியவரும் என போலீசார் தெரிவித்துள்ளனர்.