2027 ஒரு நாள் உலகக்கோப்பை கிரிக்கெட்.. கோலி, ரோஹித்துடன் பிசிசிஐ ஆலோசனை?

இந்திய அணியின் மூத்த வீரர்களான ரோஹித் ஷர்மா மற்றும் விராட் கோலி ஆகியோர் ஒருநாள் போட்டிகளில் மட்டுமே தற்போது விளையாடி வரும் நிலையில், 2027-ல் நடைபெற உள்ள ஐ.சி.சி. ஒருநாள் உலகக் கோப்பையில் இவ்விருவரும் பங்கேற்பார்களா என்ற கேள்வி எழுந்துள்ளது. இந்தச் சூழலில், தென் ஆப்பிரிக்கா தொடருக்குப் பிறகு இருவரும் ஒருநாள் போட்டிகளில் தொடர்ந்து விளையாடுவது குறித்து பி.சி.சி.ஐ. ஆலோசனை நடத்த முடிவு செய்துள்ளது.

பி.சி.சி.ஐ.யின் முக்கிய ஆலோசனைக் கூட்டம்

விராட் கோலி மற்றும் ரோஹித் ஷர்மா ஆகியோர் ஒரு நாள் போட்டிகளில் விளையாடுவது குறித்துத் தெளிவுபடுத்தும் விதமாக, தென் ஆப்பிரிக்கா தொடர் முடிந்த பின்னர் பி.சி.சி.ஐ. இந்த ஆலோசனைக் கூட்டத்தை நடத்த உள்ளது. இந்தக் கூட்டத்தில் பி.சி.சி.ஐ. அதிகாரிகள், இந்திய அணியின் பயிற்சியாளர் கௌதம் கம்பீர், மற்றும் தலைமைத் தேர்வாளர் அஜித் அகர்கர் ஆகியோர் குஜராத் மாநிலம் அகமதாபாத்தில் கூடிப் பேசவுள்ளனர்.

இந்தக் கூட்டத்திற்குப் பிறகு ரோஹித் ஷர்மாவும், விராட் கோலியும் ஒருநாள் போட்டிகளில் தொடர்ந்து விளையாடுவார்களா? இல்லையா? என்பது குறித்துத் தெளிவான முடிவு தெரியவரும் என்று எதிர்பார்க்கப்படுகிறது. நடந்த முடிந்த தென் ஆப்பிரிக்கா டெஸ்ட் தொடரில் இந்திய மோசமான ஆட்டத்தை வெளிப்படுத்தியது குறிப்பிடத்தக்கது.

பயிற்சியாளர் மோர்கலின் முந்தைய கருத்து

முன்னதாக, இந்திய அணியின் பந்துவீச்சுப் பயிற்சியாளர் மோர்னே மோர்கல் செய்தியாளர்களிடம் பேசுகையில், 2027-ல் நடைபெறும் ஐ.சி.சி. ஒருநாள் உலகக் கோப்பையில் விராட் கோலியும், ரோஹித் சர்மாவும் விளையாட வாய்ப்பு உள்ளதாக நம்பிக்கை தெரிவித்திருந்தது குறிப்பிடத்தக்கது.