"செங்கோட்டையன் எங்கிருந்தாலும் வாழ்க"- அதிமுக முன்னாள் அமைச்சர் ஜெயக்குமார்

மறைந்த முதல்வர் ஜெயலலிதாவின் நினைவு நாளை முன்னிட்டு, அதிமுக சார்பில் பேரணி நடத்த அனுமதி கோரி முன்னாள் அமைச்சர் ஜெயக்குமார் சென்னை காவல்துறை ஆணையர் அலுவலகத்தில் மனு அளித்தார். பின்னர் செய்தியாளர்களைச் சந்தித்த அவர், தான் தமிழக வெற்றிக் கழகத்தில் இணையப் போவதாகப் பரவும் செய்திகளுக்கு மறுப்பு தெரிவித்தார்.

செங்கோட்டையன் முடிவுக்கு வாழ்த்து

நேற்று த.வெ.க.வில் இணைந்த செங்கோட்டையன் குறித்துப் பேசிய முன்னாள் அமைச்சர் ஜெயக்குமார், "நான் பெரிதும் மதிக்கக்கூடியவர் அண்ணன் செங்கோட்டையன். அவர் ஒரு முடிவு எடுத்து த.வெ.க.வில் இணைந்திருக்கிறார். அவர் எங்கு இருந்தாலும் வாழ்க" என்று வாழ்த்துத் தெரிவித்தார்.

மேலும், "ஜெயக்குமார் தமிழக வெற்றிக் கழகத்திற்குச் செல்கிறார்" எனச் சமூக வலைதளங்களில் பரவும் வதந்திகள் குறித்துப் பேசிய அவர், அது அனைத்தும் பொய் என்று மறுத்தார். "நான் எப்போதும் ஒரே கட்சியில் தான் இருப்பேன். அது அதிமுக தான். சாகும் வரை அதிமுகவில்தான் இருப்பேன். என் உயிர் போனாலும் என் மீது அதிமுக கொடிதான் இருக்கும்" என்று உறுதிபடத் தெரிவித்தார்.

'எலிக்கு தலையாக இருக்கக்கூடாது'

தொடர்ந்து பேசிய அவர், "புலிக்கு வாலாக இருக்கலாம்; எலிக்குத் தலையாக இருக்கக் கூடாது. புலி என்பது அதிமுக; வாழ்நாள் முழுவதும் ஒரே இயக்கம் தான் எனக்கு. பதவிக்காகப் பல் இளிக்க மாட்டேன்; பணத்துக்காகவும் பல் இளிக்கமாட்டேன். எலி திமுகாகவோ அல்லது த.வெ.க.வாகவோ இருக்கலாம். கட்சி உத்தரவிட்டால் ராயபுரம் தொகுதியில் தான் நிற்பேன்" என்று அவர் கூறினார்.