சென்னை மயிலாப்பூரில் உள்ள கபாலீஸ்வரர் கோயில் மற்றும் கோலவிழி அம்மன் ஆலயத்தில் நடிகர் விஷால் நேற்று (அக். 25) இரவு சாமி தரிசனம் செய்ய வந்திருந்தார். அப்போது கோயிலில் இருந்தவர்களுடன் செல்ஃபி மற்றும் புகைப்படம் எடுத்துக்கொண்டார். இதனையடுத்து செய்தியாளர்களை சந்தித்த அவர், “திடீரென்று கோயில் கோயிலாக செல்லவில்லை. எப்போதுமே ஆன்மீகத்தில் பற்று உடையவன் நான். தொடர்ச்சியாக பல கோயில்களுக்கு சென்று கொண்டுதான் இருக்கிறேன். எனது நண்பர்கள் மூலமாக எனக்கு கோயில்கள் பற்றி தெரியவந்தது. அதனால் கோயில்களுக்கு சென்று சாமி தரிசனம் செய்கிறேன்” என்று கூறினார். தொடர்ந்து பேசிய அவர், விஜய்யின் தமிழக வெற்றிக் கழக மாநாட்டிற்கு வாழ்த்து தெரிவிப்பதாகவும் மாநாட்டிற்கு தான் செல்லவில்லை எனவும் தெரிவித்தார். கடந்த வாரம் மாநாட்டிற்கு ஒரு சாதாரண மக்களாக கூட்டத்துடன் கூட்டமாக இருந்து, மாநாட்டில் கலந்து கொள்வேன் என்று விஷால் தெரிவித்திருந்தார் என்பது குறிப்பிடத்தக்கது.

மேலும், “விஜயகாந்துக்கு பிறகு மக்களிடம் மிகுந்த எதிர்பார்ப்பு கொண்ட அரசியல்வாதியாக விஜய் உள்ளார். நான் உட்பட மக்கள் அனைவரும் விஜய் மக்களுக்கு என்ன செய்யப் போகிறார்? என்ன மாற்றம் கொண்டு வரப் போகிறார்? என்ன விஷயங்களை அவர் மனதில் வைத்துக் கொண்டிருக்கிறார்? என தெரிந்துக்கொள்ள எதிர்பார்த்து கொண்டிருக்கிறோம். சினிமாவை விட்டு அரசியலுக்கு வரப்போகிறார் என்பது மிகப்பெரிய ஒரு முடிவு. அது ஒரு சாதாரண விஷயம் கிடையாது. கோடிக்கணக்கில் சம்பாதிக்கும் ஒரு நபர் அந்த கோடிகளெல்லாம் வேண்டாம் என்று மக்கள் சேவைக்காக போகிறேன் என்று வருகிறார். அது வரவேற்க வேண்டிய விஷயம். அவரை மனதார வாழ்த்துகிறேன். அவர் நல்லது செய்ய வேண்டும். அவர் என்ன செய்யப் போகிறார் என்பதை பார்க்க ஆவலுடன் காத்திருக்கின்றேன். விஜய்க்கு எல்லா கடவுள் அருளும் உண்டு. கர்த்தராக இருந்தாலும் சரி, அல்லாவாக இருந்தாலும் சரி, பார்வதி அம்மனாக இருந்தாலும் சரி, சிவனாக இருந்தாலும் சரி. யாராக இருந்தாலும் அவருக்கு அந்த ஆசீர்வாதம் உண்டு” எனக் கூறினார்.

இதையடுத்து செய்தியாளர்கள் விஷாலிடம் நீங்கள் அரசியலுக்கு எப்போது வர போகிறீர்கள்? என கேட்டதற்கு, “நடிகர் சங்க கட்டிடம் முதலில் வரட்டும். அதுதான் நாங்கள் நிறைவேற்ற வேண்டிய கடைசி வாக்குறுதி. 3500 நாடக நடிகர்களின் வாழ்வாதாரம் உயர்ந்துவிட்டது என்ற செய்தியை காதில் கேட்கும் பொழுது என்னுடைய அரசியல் பிரவேசம், என்னுடைய திருமணம் பற்றியெல்லாம் பேசுகிறேன், என் கல்யாணத்திற்கு உங்களை அழைக்கிறேன்” எனத் தெரிவித்துவிட்டு விடைபெற்று சென்றார்.