LIVE 24 X 7
வாட்ஸ்அப், டெலிகிராம் உள்ளிட்ட செயலிகளைப் பயன்படுத்தும் லட்சக்கணக்கான இந்தியப் பயனர்களுக்கு உதவும் வகையில் மத்திய தொலைத்தொடர்புத் துறை ஒரு புதிய வழிகாட்டுதலை வெளியிட்டுள்ளது. வரும் 2027 ஜனவரி 1-ஆம் தேதி முதல் அமலுக்கு வரவுள்ள இந்த விதியின்படி, மெசேஜிங் கணக்குகள் அனைத்தும் அவை பதிவு செய்யப்பட்ட ஆக்டிவ் சிம் கார்டுடன் தொடர்ச்சியாக இணைக்கப்பட்டிருக்க வேண்டும்.
சிம் பைண்டிங் (SIM Binding) என்றால் என்ன?
இதுவரை வாட்ஸ்அப் போன்ற செயலிகளில் கணக்கு தொடங்கும்போது மட்டுமே தொலைபேசி எண் சரிபார்க்கப்பட்டு வந்தது. அதன் பிறகு, போனில் இருந்து சிம் கார்டை எடுத்தாலோ அல்லது வைஃபை மட்டுமே உள்ள டேப்லெட், மடிக்கணினிகளில் பயன்படுத்தினாலோ கணக்குகள் தொடர்ந்து இயங்கும் நிலை இருந்தது. ஆனால் இனி நடைமுறைக்கு வரவுள்ள 'சிம் பைண்டிங்' விதியின்படி, பதிவு செய்யப்பட்ட சிம் கார்டு சம்பந்தப்பட்ட போனில் ஆக்டிவ் ஆக இல்லையென்றால், அந்தச் செயலியைப் பயன்படுத்த முடியாது.
புதிய உத்தரவுக்கான காரணம்
இந்திய மொபைல் எண்களைப் பயன்படுத்தி நாட்டின் வெளியிலிருந்தும், பிற இடங்களில் இருந்தும் ஆன்லைன் மோசடிகள், டிஜிட்டல் கைது (Digital Arrest) மற்றும் முதலீட்டு மோசடிகள் செய்யப்படுவதைத் தடுக்கவே இந்த நடவடிக்கை எடுக்கப்பட்டுள்ளது. ஒருமுறை மட்டுமே எண்களைச் சரிபார்த்துவிட்டு, பின் சிம் கார்டு இல்லாமலேயே கணக்குகளை இயக்கும் வசதியைப் பயன்படுத்திப் பல சைபர் குற்றவாளிகள் மோசடியில் ஈடுபடுகின்றனர். 2024-ஆம் ஆண்டில் மட்டும் இந்தியாவில் ரூ.22,800 கோடிக்கும் அதிகமான நிதி சைபர் மோசடிகளால் இழக்கப்பட்டுள்ளது குறிப்பிடத்தக்கது.
எந்தெந்த செயலிகளுக்கு இது பொருந்தும்?
தொலைத்தொடர்புத் துறை வெளியிட்டுள்ள இந்த உத்தரவு வாட்ஸ்அப், டெலிகிராம், சிக்னல், ஸ்னாப்சாட், ஷேர்சாட், ஜியோசாட் மற்றும் ஜோஷ் உள்ளிட்ட பல செயலிகளுக்குப் பொருந்தும். இந்த விதியை அமல்படுத்துவதற்கான காலக்கெடு 2026 டிசம்பர் 31 வரை நீட்டிக்கப்பட்டுள்ளது.
வாட்ஸ்அப் வெப் பயன்பாடு
வலைதளங்கள் (WhatsApp Web) வழியாகச் செயலிகளைப் பயன்படுத்துபவர்கள் குறிப்பிட்ட கால இடைவெளியில் லாக்-அவுட் செய்யப்படலாம். அவர்கள் மீண்டும் கியூஆர் (QR) குறியீட்டை ஸ்கேன் செய்து மட்டுமே உள்ளே நுழைய முடியும். ஆபத்து சாத்தியக்கூறுகளை ஆய்வு செய்து இதற்குரிய நேரம் தீர்மானிக்கப்படும் என அரசு தெரிவித்துள்ளது.
பயனர்கள் கவனிக்க வேண்டியவை
இந்த உத்தரவால் வாட்ஸ்அப் அல்லது டெலிகிராம் போன்ற செயலிகள் இந்தியாவில் தடை செய்யப்படாது. இருப்பினும், பயனர்கள் தங்களது மெசேஜிங் செயலிகளுடன் இணைக்கப்பட்டுள்ள சிம் கார்டை எப்போதும் போனில் ஆக்டிவ் ஆக வைத்திருப்பது அவசியமாகும். அடிக்கடி சிம் கார்டுகளை மாற்றுபவர்கள் மற்றும் வைஃபை மூலம் மட்டுமே இயங்கும் இரண்டாம் கட்ட போன்/டேப்லெட் பயன்படுத்துபவர்கள் இனி தங்களின் பயன்பாட்டு முறையை மாற்றியமைக்க வேண்டியிருக்கும்.
