Women's Asia Cup: இறுதிப்போட்டிக்குள் ENTRY.. கோப்பையை கைப்பற்றுமா இந்தியா?

துபாயில் நேற்று (செப்.10) நடைபெற்ற மகளிர் ஆசிய கோப்பை டி20 கிரிக்கெட் தொடரின் முதல் அரையிறுதி ஆட்டத்தில் இந்திய - வங்கதேச அணிகள் மோதின. டாஸ் வென்ற இந்திய அணி முதலில் பேட்டிங்கைத் தேர்வு செய்தது. தொடக்க வீராங்கனையாகக் களமிறங்கிய ஷபாலி வர்மா 40 பந்துகளில் 3 சிக்சர்கள் உட்பட 64 ரன்கள் விளாசி அசத்தினார். வங்கதேச வீராங்கனைகள் நழுவவிட்ட 3 கேட்ச் வாய்ப்புகளைச் சாதகமாகப் பயன்படுத்திய அவர், அணியின் ஸ்கோரை உயர்த்தினார். பிரதிகா ராவல் 20 ரன்களும், ரிச்சா கோஷ் 21 ரன்களும் சேர்க்க, கேப்டன் ஹர்மன்பிரீத் கவுர் ஆட்டமிழக்காமல் 24 ரன்கள் எடுத்தார். இதன் மூலம் இந்திய அணி 20 ஓவர்களில் 6 விக்கெட் இழப்பிற்கு 149 ரன்கள் குவித்தது.

சுழற்பந்தில் சுருண்ட வங்கதேசம்

150 ரன்கள் எடுத்தால் வெற்றி என்ற இலக்குடன் களம் புகுந்த வங்கதேச மகளிர் அணிக்கு, இந்திய அணியின் துல்லியமான சுழற்பந்து வீச்சு முட்டுக்கட்டையாக அமைந்தது. துவக்க வீராங்கனைகள் திலாரா அக்தர் 21 ரன்களிலும், ஜுவைரியா பெர்தௌஸ் 14 ரன்களிலும் வெளியேறினர். இதனிடையே கிராந்தி கவுட் ஓடிவந்து பிடித்த அபார கேட்ச் ஆட்டத்தின் முக்கியத் திருப்புமுனையாக மாறியது.

சீரான இடைவெளியில் விக்கெட்டுகளை இழந்த வங்கதேச அணி, 20 ஓவர்கள் முடிவில் 7 விக்கெட் இழப்பிற்கு 109 ரன்கள் மட்டுமே எடுத்துத் தோல்வியடைந்தது. இந்திய தரப்பில் சிறப்பாகப் பந்துவீசிய தீப்தி சர்மா 26 ரன்கள் விட்டுக்கொடுத்து 3 விக்கெட்டுகளைச் சாய்த்தார். ஸ்ரீ சரணி மற்றும் பிரேமா ராவத் தலா ஒரு விக்கெட்டைக் கைப்பற்றினர்.

கோப்பையைக் கைப்பற்றுமா இந்தியா?

ஏற்கனவே 7 முறை ஆசிய கோப்பையை வென்றுள்ள இந்திய அணி, தற்போது 8-வது முறையாகக் சாம்பியன் பட்டத்தைக் கைப்பற்றும் முனைப்பில் உள்ளது. வரும் ஞாயிற்றுக்கிழமை (செப்டம்பர் 13) நடைபெறவுள்ள இறுதிப்போட்டியில், பாகிஸ்தான் - இலங்கை அணிகளுக்கு இடையிலான 2-வது அரையிறுதியில் வெற்றிபெறும் அணியை இந்திய அணி எதிர்கொள்ளவுள்ளது. அடைந்த 2024 ஆம் ஆண்டு நடைப்பெற்ற மகளிர் ஆசிய கோப்பை இறுதி போட்டியில் இலங்கை அணியிடம் இந்திய அணி தோல்வியடைந்தது குறிப்பிடத்தக்கது.